«Ինձ վրդովեցրել է նոր իշխանությունների վերաբերմունքը»

Ֆիրդուս (33-րդ) թաղամասի պաշտպանության նախաձեռնող խումբը Ֆիրդուս 1 հասցեում գտնվող տան ետնաբակում այսօր մամուլի ասուլիս էր հրավիրել, որի ժամանակ «Հելսինկյան ասոցիացիա» իրավապաշտպան հասարակական կազմակերպության ղեկավար Նինա Կարապետյանցը պարզաբանեց, թե ինչու է որոշել միանալ նախաձեռնությանը. «Ինձ, մեղմ ասած, զայրացրեց մեր իշխանությունների արձագանքը, որտեղ ես լսեցի հետևյալ հայտարարությունը՝  «ո՞ւր ա ընդեղ մշակութային արժեք, ընդեղ սարայներ են»:

Իրավապաշտպանի խոսքով՝ մենք գնահատման լրջագույն խնդիր ունենք. «Ուզում եմ հասկանալ, թե ինչու ներկայիս իշխանությունը չի արձագանքում և ինչի հետ համեմատելով են համարում, որ Երևանի մոտավորապես 100-150 տարվա պատմություն ունեցող շինությունները սարայներ են. ինչի՞ հետ համեմատելով են ասում: Եթե դուրսպրծուկ օլիգարխների տների հետ են համեմատում, այո՛, սրանք սարայներ են, որովհետև այս տները չունեն ոսկեզօծ զուգարաններ, ոսկեզօծ դռների բռնակներ։ Իհարկե, սրանք կարող են համեմատվել, բայց սա մեր մշակույթն է, մեր պատմության մի մասն է, և մենք չենք կարող ուղղակի թույլ տալ, որ Երևանը դառնա քառակուսի, ստնադարտ այնպիսի մի քաղաք, որը ոչ մի բանով չի տարբերվում եվրոպական ցանկացած քաղաքից: Մեզ հիմա փորձում են բացատրել, թե ինչ սիրուն է Հյուսիսային պողոտան. այո՛, գեղեցիկ է, բայց դա Երևանը չի ներկայացնում։ Մենք չպիտի ունենանք այնպիսի իրավիճակ, որտեղ մենք չենք կարող ունենալ տվյալ ժամանակահատվածի համար պատմական, մշակութային արժեք ունեցող տարածքներ»,- ընդգծեց Կարապետյանցը:

Բանախոսը մտահոգված է, թե ի՞նչ պատմական հուշարձաններ են փոխանցելու իրենց զավակներին. «Այն, որ քաղաքի կենտրոնը մեծ հետաքրքրություն է ներկայացնում մեծ փողերի համար,  բոլորին հասկանալի է և միայն Երևանի խնդիրը չէ, ամբողջ աշխարհի խնդիրն է։ Բայց ինչքանո՞վ ենք մենք պատրաստ պաշտպանել մեր պատմությունը, մեր քաղաքացիների իրավունքները, հենց այստեղ է մեր խնդիրը»,- ասաց իրավապաշտպանը։ 

Կարապետյանցը նշեց, որ այս ամենում իրենց մեղքի բաժինն ունեն երևանաբնակները, որոնք չպայքարեցին իրենց քաղաքի արժեքների համար,  չկարողացան միավորվել։ Կարապետյանցը  ընդգծեց, որ իրավապահ մարմիններից ոչինչ չի սպասում։ Նա կարծում է, որ միակ տարբերակը լինելու է բոլորի ճնշումը, որպեսզի թույլ չտան՝ քաղաքը, Երևանը ուղղակի քանդուքարափ անեն։

«Երևանն ունի իր կոլորիտը, Երևանն ունի իր տրամադրությունը, իր կատակները, երգերը։ Այդ կոլորիտը պահելու համար անհրաժեշտ է, որպեսզի մենք ունենանք հին բակերը, հին շենքերը։ Թող ոչ մեկ չնեղանա՝ Գյումրին գյումրեցիներինն է, Սպիտակը սպիտակցիներինն է և միայն Երևանն է, որ մեր բոլորինն է և մենք պետք է պահենք Երևանի կոլորիտը։ Ինձ վրդովեցրել է նոր իշխանությունների վերաբերմունքն այս հարցի վերաբերյալ»,-եզրափակեց Նինա Կարապետյանցը։