Այս տարվա 6 ամսում ապօրինի շրջանառությունից առգրավվել է 28,2 կգ տարբեր տեսակի թմրամիջոց, շուրջ 6,85 կգ հոգեմետ նյութ

Հասարակություն 16 Հուլիս, 2020 20:27

Քրեական ոստիկանության գլխավոր վարչության մասնաշենքն է։ Ի թիվս այլ հանցատեսակների դեմ պայքարող ստորաբաժանումների՝ այստեղ է տեղակայված նաեւ թմրամիջոցների անօրինական շրջանառության դեմ պայքարի վարչությունը։

Հենց այս ծառայողներն են վարչության պետ Կորյուն Հարթենյանի ղեկավարությամբ կանգնած թմրամիջոցների շրջանառության դեմ պայքարի առաջնագծում։

40 տարի համակարգում ծառայած ոստիկանության գնդապետը նշեց, որ թմրանյութը քայքայում է ոչ միայն օգտագործողի կյանքն ու առողջությունը, այլեւ կարող է անդառնալի հետք թողնել ընտանիքի ու թմրամոլի սերունդների վրա։

Կարելի է ասել՝ թմրամոլը թմրամիջոց ձեռք բերելու համար պատրաստ է նույնիսկ հանցագործությունից մինչեւ հասարակության համար վտանգավոր այլ արարքներ կատարել։ Գիտակցելով այս ամենը՝ վարչության անձնակազմն իր գործն անում է պատասխանատվությամբ ու արժանապատվորեն։

Վարչությունում գործում են սինթետիկ թմրամիջոցների պատրաստման եւ անօրինական շրջանառության դեմ պայքարի, թմրաբիզնեսի դեմ պայքարի եւ բժշկական թմրադեղերի շրջանառության եւ տարածման դեմ պայքարի բաժիններ։ Ստորաբաժանումների անվանումներն արդեն իսկ հուշում են նրանց գործառույթները։ Վարչությունը թմրամիջոցների ապօրինի շրջանառության ոլորտում ունի նաեւ համակարգող դեր՝ ոստիկանության տարածքային բաժիններին տրամադրում է մեթոդական օգնություն, խորհրդատվություն, աջակցում է օպերատիվ-հետախուզական միջոցառումների անցկացմանը եւ իրականացնում համատեղ աշխատանք։

Վարչությունը սերտ համագործակցում է ոստիկանության փորձաքրեագիտական վարչության, ճանապարհային ոստիկանության, Երեւան քաղաքի եւ մարզային վարչությունների հետ։ Արդյունավետ համագործակցում են նաեւ այլ գերատեսչությունների հետ։

Ստորաբաժանումը ակտիվ համագործակցում է Ռուսաստանի Դաշնության, Վրաստանի, Իրանի Իսլամական Հանրապետության եւ այլ երկրների իրավապահ կառույցների հետ։ Արդյունավետ համագործակցում են նաեւ միջազգային կազմակերպությունների հետ, ինչպիսիք են՝ ԱՊՀ-ն, ՀԱՊԿ-ն, Ինտերպոլը, ՄԱԿ-ը, DEA-ն եւ այլն։

2020 թվականի առաջին կիսամյակում թմրամիջոցների անօրինական շրջանառության դեմ պայքարի վարչության ծառայողները բացահայտել են հանցագործության 119 դեպք, նույն ժամանակահատվածում հայտնաբերվել է թմրամիջոցների մաքսանենգության 21 դեպք, ձեռնարկված միջոցառումներով ապօրինի շրջանառությունից առգրավվել եւ փորձաքննության է ներկայացվել 28 կգ 222 գրամ տարբեր տեսակի թմրամիջոց, շուրջ 6853 գրամ հոգեմետ նյութ, 783 գրամ պրեկուրսոր։ Ամեն տարի վարչությունը կազմակերպում եւ իրականացնում է «Կանեփ-կակաչ» համալիր օպերատիվ-կանխարգելիչ միջոցառումը, որին ներգրավվում են ոստիկանության բոլոր ստորաբաժանումներն ու տարածքային բաժինները։ Միայն 2019 թվականին իրականացված միջոցառման տվյալներով հայտնաբերվել եւ ոչնչացվել է շուրջ 57 տոննա կանեփի եւ 42 կգ կակաչի վայրաճ զանգված, տնամերձ 115 հողամասերից հայտնաբերվել է ապօրինի աճեցրած 31428 կանեփի բույս։

Վարչության անձնակազմը մասնակցում է նաեւ «Կանալ» տարածաշրջանային հակաթմրանյութային գործողությանը, որը 2019 թվականին անցկացվեց Հայաստանում։ Գործողության ընթացքում հայտնաբերվել են ինչպես տարբեր տեսակի թմրամիջոցներ, այնպես էլ ապօրինի զենք-զինամթերք, հետախուզվողներ, բացահայտվել են հանցագործություններ։

Վերջերս վարչության ծառայողները, համագործակցելով ինչպես այլ գերատեսչությունների, այնպես էլ ոստիկանության այլ ստորաբաժանումների հետ, բացահայտել են հասարակական հնչողություն ստացած մի շարք հանցագործություններ, որոնց բացահայտման ընթացքում հայտնաբերվեցին շուրջ 2000 հատ լիրիկա, 100-ից ավելի LSD հոգեներգործուն դեղահաբեր, մեծաքանակ հերոին ու մեթամֆետամին։

Սա քրեական ոստիկանության գլխավոր վարչության թմրամիջոցների անօրինական շրջանառության դեմ պայքարի վարչության ծառայության մասին մի փոքր անդրադարձ է, իսկ ստորաբաժանման ծառայողները շարունակում են ակտիվ պայքարը թմրանյութ-չարիքի դեմ։