Պետությանը գումար վերադարձրած «նախկինների» տասնյակը

2018 թվականից ի վեր կոռուպցիայի դեմ պայքարի արդյունքում ՀՀ պետական բյուջե է վերադարձվել 105 մլն դոլարի գումար. դրանք այն գումարներն են, որոնք այս կամ այն ճանապարհով գողացվել են մեր երկրից: Սակայն, Բեռլինում՝ Ֆրիդրիխ Էբերտ հիմնադրամում, «Տեւական համագործակցություն նոր նախանշանների ներքո, Հայաստան-Գերմանիա հարաբերություններ» խորագրով հանդիպման ժամանակ ՀՀ վարչապետ Նիկոլ Փաշինյանն արձանագրել էր, որ, ամեն դեպքում, դժգոհ է այս արդյունքներից: «Ե՛վ անձամբ ես, ե՛ւ մեր հանրությունն այս ցուցանիշից դժգոհ ենք, որովհետեւմենք կարծում ենք, որ հակակոռուպցիոն պայքարը Հայաստանի Հանրապետությունում պետք է լինի շատ ավելի էֆեկտիվ», – նշել էր նա: 

Ձեզ ենք ներկայացնում այն նախկին պաշտոնյաների թոփ տասնյակը, ովքեր ամենամեծ գումարներն են վերադարձրել պետական բյուջե: 

Մաքսայինի նախկին ղեկավար Արմեն Ավետիսյանի ընտանիքը հարուցված քրեական գործից հետո պետությանը տարածք է նվիրաբերել. «Գոլդեն փելիս» հյուրանոցի համար մինչեւ հիմա, սակայն, գնորդ չի գտնվել: Գինը կազմում է 6 792 628 164 դրամ: 

Մանվել Գրիգորյանի կողմից պետությանը նվիրաբերվող տարածքի շուկայական արժեքը գնահատվում է 5.084 մլրդ դրամ՝ ավելի քան 10.5 մլն դոլար: 

Սամվել Ալեքսանյանի «Ալեքս Հոլդինգը» վերականգնել է պետբյուջեի 5,2 մլրդ վնասը: 

Սերժ Սարգսյանի անվտանգության նախկին պետ Վաչագան Ղազարյանն ու իր կինը պետական բյուջե են վերականգնել 2,8 մլրդ դրամ: 

ֆինանսների նախկին նախարար Գագիկ Խաչատրյանը վերականգնել է շուրջ 1 մլրդ դրամ: 

«Սպայկա» ընկերությունը պետությանն է վերադարձրել 1 միլիարդ դրամ. այն կապվում է Միքայել Մինասյանի անվան հետ:

«Նորֆոլկը» պետբյուջե է վերադարձրել 721,4 միլիոն դրամ. այն կապվում էր ՊԵԿ նախկին նախագահ Վարդան Հարությունյանի անվան հետ:

«Սեքյուրիթի Դրիմ» և «Էլլիպս Ջի Էյ» ընկերությունների աշխատակիցների կողմից առերևույթ կատարված խարդախության դեպքի առթիվ հարուցված քրեական գործի շրջանակներում պատճառված վնասից վերականգնվել է 210 մլն դրամը: Այս ընկերությունները կապվում էին Սերժ Սարգսյանի եղբոր՝ Սաշիկ Սարգսյանի անվան հետ: 

Մոտ 110 միլիոն դրամ ՀՔԾ-ում քննված գործի ընթացքում պետական բյուջե է վերականգնել ոստիկանության ՊՊԳ վարչության կարևորագույն օբյեկտների և հիմնարկ-ձեռնարկությունների պահպանության գնդի ավագ հաշվապահ Կարինե Միրզոյանը։ 2019-ի մարտին դատարանը դադարեցրել էր Միրզոյանի նկատմամբ քրական հետապնդումը։ Նա մեղադրվում էր 2015-2018 թթ. ոստիկանության կողմից պահպանված օբյեկտներից դրա դիմաց կանխիկ վճարներ ստանալու, այն դրամարկղ չմուտքագրելու և յուրացնելու համար։ Նշված գումարն ամբողջովին վերականգնվել է։ 

Հրազդանի նախկին քաղաքապետ Արամ Դանիելյանը պետությանը փոխհատուցել է 102 մլն դրամ: