Կորոնավիրուսի վարակման դեպքեր՝ ուսումնական հաստատություններում
ՀասարակությունԼՈՒՐԵՐ.com-ի տեղեկություններով «Հակոբ Կոջոյան» կրթահամալիրում կորոնավիրուսի դեպք է գրանցվել: Կորոնավիրուս է հայտնաբերվել դպրոցի աշակերտներից մեկի ծնողի մոտ և վարակը չտարածելու նպատակով տվյալ դասարանի երեխաներին տուն են ուղարկել: Տեղեկությունը ճշտելու համար ԼՈՒՐԵՐ.com-ը կապ հաստատեց Երևանի քաղաքապետի մամուլի խոսնակ Հակոբ Կարապետյանի հետ, քանի որ կրթահամալիրը գտնվում է քաղաքապետարանի ենթակայության տակ: «Հիմա տվյալ տեղեկության մասին ոչինչ ասել չեմ կարող, որովհետև չգիտեմ և չեմ կարող շաբաթ օրով ճշտել: Բայց ընդհանուր առմամբ, օրվա ընթացքում շուրջ 300-400 վարակակիր է գրանցվում և չեմ կարծում, որ արտասովոր կամ բացառիկ դեպք լինի, որ դպրոցի անձնակազմից կամ աշակերտներից մեկը լինի վարակակիր»,- ասաց Կարապետյանը՝ չբացառելով կրթական հաստատություններում վարակման դեպքերը:
Կրթության, գիտության, մշակույթի և սպորտի նախարարության հասարակայնության հետ կապերի և տեղեկատվության վարչության պետի տեղակալ Օֆելյա Կամավոսյանն էլ հայտնեց, որ Արտեմ Միկոյանի անվան թիվ 166 դպրոցում առաջին դասարանի 3 դասվարի կորոնավիրուսի թեստի պատասխանը դրական է եղել. «Դասվարներն ու նրանց դասարանի աշակերտները միանգամից անցել են հեռավար եղանակով ուսուցման: Իսկ ուսումնական գործընթացը բնականոն շարունակվում է: 500 հոգուց ընդամենը 40-ը չի հաճախել դպրոց»,- նշեց Կամավոսյանը:
Ավելի վաղ, կորոնավիրուսի վարակման դեպքեր էին գրանցվել նաև Շիրակի մարզի Ախուրյան համայնքում գործող 2, Տավուշի մարզի Նոյեմբերյան քաղաքի հիմնական և ավագ դպրոցներում:
Հիշեցնենք՝ կորոնավիրուսային հիվանդության (COVID-19) պատճառով հանրակրթական ուսումնական հաստատություններում դասերը սկսել են սեպտեմբերի 15-ից: Սակայն, այս ընթացքում հայտնի դարձան որոշ հաստատություններում վարակման դեպքերի մասին: