Ես սիրում եմ այս ժողովրդին, դրա համար էլ հաղթանակը նվիրել եմ նրանց. Դրագոևիչը՝ հայերին աջակցող հրապարակման մասին

Օրերս Չեռնոգորիայի հավաքականի՝ Ազգերի լիգայի շրջանակում Ադրբեջանի ընտրանու նկատմամբ տոնած հաղթանակից հետո չեռնոգորացի Անդրիա Դրագոևիչն իր երկրի հավաքականի հաղթանակը նվիրել էր Հայաստանին:

«Ալաշկերտի» չեռնոգորացի դարպասապահ Անդրիա Դրագոևիչը Sport24-ի հետ զրույցում անդրադարձել է հայերին աջակցող իր ինսթագրամյան սթորիին:

«Ամեն ինչ շատ հեռուն գնաց: Չէի կարծում, որ նման քննարկումների առիթ կդառնա: Շատերն ինձ շփոթեցին Չեռնոգորիայի հավաքականի մեկ այլ Դրագոևիչի հետ՝ ինձ ներկայացնելով որպես հավաքականի ֆուտբոլիստ՝ չնայած նրան, որ ավելի քան 8 ամիս է՝ հավաքական չեմ հրավիրվել: Այդ գրառումն իմ անձնական նախաձեռնությունն է ու կապ չունի հավաքականի հետ: Եղան լրատվամիջոցներ, որոնք գրեցին, թե ամբողջ հավաքականն է իր հաղթանակը նվիրում Հայաստանին:

Նույն Ադրբեջանում ելույթ ունեցող ֆուտբոլիստներն աջակցել են Ադրբեջանին, սերբերը՝ հայերին, իսկ ես պարզապես աջակցել եմ ինձ հարազատ երկրին: Ինձ քաղաքականությունը չի հետաքրքրում: Ես Հայաստանում ֆուտբոլ եմ խաղում ու աջակցում եմ մարդկանց, որոնց սիրում եմ: Ի դեպ, Չեռնոգորիայի հավաքականը շատ լավ ինձ հասկացավ, ու ոչ մի խնդիր չեղավ:

Ադրբեջանի ֆուտբոլի ֆեդերացիան Չեռնոգորիայի ֆուտբոլի ֆեդերացիային ասել էր, որ պետք չէ խառնել սպորտն ու քաղաքականությունը, իսկ հայրենակիցներս պատասխանեցին, որ ես չեմ խառնել, ու դա իմ անձնական տեսակետն է:

Ես արդեն երեք տարի է՝ ապրում եմ, խաղում եմ Հայաստանում, ընտելացել եմ երկրին: Ես սիրում եմ այս ժողովրդին, ինձ նրանք շատ հարազատ են: Դրա համար էլ հաղթանակը նվիրել եմ նրանց: Ես չեմ ցանկացել սադրել ինչ որ մեկին կամ վիրավորել: Շատ հաղորդագրություններ եմ ստացել այդ թեմայով: Հայերին շնորհակալ եմ իրենց հաղորդագրությունների համար, իսկ ադրբեջանցիների հաղորդագրությունները չեմ կարդացել:

Ես սիրում եմ կարդալ, հատկապես պատմություն, սակայն հիմա չեմ ցանկանում խոսել քաղաքականության մասին: Իհարկե, սարսափելի է, որ քաղաքացիական անձինք են զոհվում, 18 տարեկան պատանիներ: Ամեն դեպքում ես քաղաքագետ չեմ, այլ ուղղակի ֆուտբոլիստ: Այնպես որ, ես խաղաղ երկինք եմ մաղթում: Հուսով եմ՝ պատերազմը շուտով կավարտվի, ու մենք կապրենք խաղաղ: Գուցեև Ռուսաստանն իր ներդրումն ունենա տարածաշրջանում խաղաղություն հաստատելու գործում:

Միանշանակ, ես միշտ կլինեմ հայ ժողովրդի կողքին: Ինձ մեծ ցավ է պատճառում այն, որ հայերը տառապում են: Ես հիանում եմ այս ազգով: Երբ այս պատերազմն սկսվեց, ես տեսա, թե ինչպես են բոլորն անհանգստացած իրենց հայրենակիցներով, բոլորը՝ ֆուտբոլիստից մինչև մերսող: Այստեղ բոլորը պատրաստ են գնալ ու տեր լինել իրենց հայրենիքին, հողին:

Չեմ փոշմանել գրառմանս համար: Եթե ժամանակը հետ տայինք, ես նույնը կանեի: Ցավալի է, որ ինձ սխալ են հասկացել, բայց դա հարցի մյուս կողմն է: Ես չեմ ցանկացել վիրավորել որևէ մեկին»,- ասել է Անդրիա Դրագոևիչը: