Թրամփի վարչակազմը Իրանի դեմ նոր պատժամիջոցների նախագիծ է պատրաստում

ԱՄՆ ներկայիս նախագահ Դոնալդ Թրամփի վարչակազմը, Իսրայելի և Պարսից ծոցի երկրների հետ միասին, պատրաստվում է մի շարք նոր պատժամիջոցներ կիրառել Իրանի դեմ՝ նախքան հունվարին Ջո Բայդենի երդմնակալությունը, հայտնում է Axios-ը՝ հղում անելով աղբյուրներին:
Ըստ թերթի՝ Իրանի հարցով ԱՄՆ հատուկ ներկայացուցիչ Էլիոթ Աբրամսը կիրակի օրը Իսրայելում հանդիպել է վարչապետ Բենյամին Նեթանյահուի և Ազգային անվտանգության խորհրդի ղեկավար Մեյր Բեն Շաբբաթի հետ՝ քննարկելու պատժամիջոցների ծրագիրը: Իսրայելում աղբյուրները պորտալին հայտնել են, որ պատժամիջոցների նման «հեղեղը» կբարձրացնի ճնշումը Իրանի վրա և թույլ չի տա, որ Բայդենը վերադառնա Գործողությունների համատեղ համապարփակ ծրագրին (JCPOA): Ըստ Axios-ի՝ Աբրամսը նախկինում փակ միջոցառման ժամանակ հայտարարել էր, որ Թրամփի վարչակազմը ծրագրում է ամեն շաբաթ նոր պատժամիջոցներ կիրառել Իրանի դեմ՝ մինչ նոր նախագահի երդմնակալության օրը՝ հունվարի 20-ը: «Նպատակը Իրանի նկատմամբ հնարավորինս շատ պատժամիջոցներ սահմանելն է», - հրատարակությանը հայտնել է Սպիտակ տան ծրագրերին քաջատեղյակ իսրայելական աղբյուրը։