Միայն իմ ԱԺ գնալը հարց չի լուծում և պետք է շատերիս գնալը, որը վստահեցնում եմ կլինի. Սոֆյա Հովսեփյան

Բարեւ ձեզ հարգելիներս, ներեցեք, որ ձեր եւ անձնական նամակներին եւ հրապարակավ գրառումներին չեմ պատասխանել, որովհետեւ նոր եմ տուն հասել եւ դեռ չեմ հասցրել անգամ ամբողջի հետ ծանոթանալ, բայց շտապեմ տեղեկացնել, որ տանը նստած չեմ եղել եւ ոչ էլ թաքնվել եմ մարդկանցից, քանի որ դա իմ ոճը չէ, այլ գործել եմ, գործում եմ եւ պետք է գործեմ։ Այս մասին Facebook-ի իր էջում գրել է ԱԺ «Իմ քայլը» խմբակցության պատգամավոր Սոֆյա Հովսեփյանը:

Նա, մասնավորապես, նշել է. «Այսօր (երեկ) ունեցել եմ բազմաթիվ հանդիպումներ (թույլ տվեք չբացել փակագծեր), որպեսզի հասկանամ ստեղծված իրավիճակից անցնցում դուրս գալու մեր ճանապարհը: Կարծում եմ՝ բոլորս գիտակցում ենք, որ մենք ունենք Արցախում զորքի անվտանգության հարցի լուծման խնդիր, ինչպես նաեւ արցախցիների անվտանգության խնդիր եւ մեր ամեն մի չկշռադատված ու հուզական քայլերը կարող են այդ անվտանգությունը չեզոքացնել։

Ուստի խնդրում եմ ժամանակից շուտ թե կոշտ, թե մեղմ գնահատականներ մի տվեք քայլերիս, որովհետեւ դրանք ձեզ հայտնի չեն։ Շատ լավ հասկանում եմ, որ շատերդ ունեք մեծ կամ չնչին սպասումներ, որի համար շնորհակալ եմ, բայց այդ սպասումների թեկուզ փոքր քայլով արդարացնելու համար ես չեմ կարող վտանգել հազարավոր մարդկանց։

Ես շարունակելու եմ գործել, ինչպես դա արել եմ մինչեւ մանդատ ստանալս եւ մանդատ ստանալուց հետո։

Վաղը (այսօր) նույնպես մի քանի հանդիպումներ ունեմ, կոնկրետ մասնագետների հետ, որպեսզի հասկանամ խնդրի հնարավոր անցնցում լուծումների մասին։

Ինչ վերաբերում է կոչին, որ գնամ ԱԺ եւ մասնակցեմ նիստին, ապա ասեմ, որ միայն իմ գնալը հարց չի լուծում եւ պետք է շատերիս գնալը, որը վստահեցնում եմ կլինի:

Գիտեմ, որ հիմա նույնպես պետք է այս գրառման տակ ինձ համար ոչ պատվաբեր գնահատումներ գրեք, բայց հասկանալով գերհուզական վիճակը, չեմ նեղանա, միայն պարտավոր եմ տեղեկացնել , որ հարմարվողականություն չեմ ցուցաբերում եւ ոչ էլ անմտածված քայլի եմ գնալու ճնշումներին, պահանջներին, հորդորներին եւ խնդրանքներին տեղիք տալով:

Այս պահին այսքանը եւ կրկնեմ հորդորս, որ բանակի նկատմամբ պետք է ունենանք պատասխանատվություն եւ թեեւ մի շարք խութերին, մեր կանոնավոր բանակը եւ կամավորների մի մեծ մասը գործել է պրոֆեսիոնալ եւ պայքարել մի քանի անգամ իրենից շատ եւ տարբեր ուղղվածություն խմբերի հետ։

Չեմ տրվելու ոչ մի քաղաքական ճնշումների եւ նաեւ խնդրանքս է քաղաքական ուժերին ինձ կոչ չանել իրենց օրակարգով շարժվել։ Ես ունեմ հստակ գիտակցում եւ պատասխանատվություն ստեղծված իրավիճակից անցնցում ելքերի ճանապարհները գնելու , որից ամենաշահողը պետք է լինի հայ ժողովուրդը. Արցախը եւ Հայաստանը։

Հույս ունեմ, որ այդ ճանապարհները կան եւ կգտնենք, եւ կօգտվենք։

Հարգանքով ձեր Սոֆյա»: