Հայկական կողմից կան անհետ կորած մի քանի հարյուր զինվորներ. Նիկոլ Փաշինյան

Հայաստանի Հանրապետության վարչապետ Նիկոլ Փաշինյանը հայտնել է, որ Լեռնային Ղարաբաղում տեղի ունեցած պատերազմի ընթացքում անհետ կորած հայ զինծառայողների թիվը հայտնի է, սակայն կոնկրետ թիվ վարչապետը չի նշել: Վարչապետն այս մասին ասել է առցանց մամուլի ասուլիսի ընթացքում:

«Այո, թիվը հայտնի է, ես հիմա կոնկրետ թիվ չհրապարակեմ, բայց մենք ունենք թիվ: Ցավոք սրտի, անհետ կորած մի քանի հարյուր մեր զինվորների մասին է խոսքը: Եվ մենք հույս ունենք, որ բոլորի դեպքում չէ, որ մենք նույն եզրակացությանը կհանգենք: Մենք հույս ունենք, որ մի մասին կգտնենք ողջ: Օրինակ, երեկ ես իմացա, որ վիրավոր զինվոր է հայտնաբերվել, ով նախկինում համարվում էր անհետ կորած»,- մանրամասնեց վարչապետը:

Անդրադառնալով գերիների փոխանակման ժամկետների մասին հարցին՝ վարչապետն ասաց, որ գերիների փոխանակությունը տեղի կունենա զոհվածների մարմինների փոխանակումից հետո: «Շատ է քննարկվում և շատ կարևոր հարց է, նաև առաջարկներ կան, որ սգո օր հայտարարվի: Ես կարծում եմ, որ ճիշտ կլինի, որ այդ որոշումը կայացվի, երբ մենք մարմինների հայտնաբերման գործընթացը հասցնենք ավարտին և հնարավորություն ունենանք հարգանքի տուրք մատուցել նաև պետական մակարդակով կայացված որոշումների շրջանակում»,- նշեց Փաշինյանը:

Վարչապետը կարևոր է համարում այս ընթացքում զոհված և հաշմանդամություն ստացած զինծառայողների ընտանիքների համար նախատեսված սոոցիալական երաշխիքների ապահովումը: «Կառավարությունը միջոցներ ձեռնարկում է և ունի վստահություն, որ այդ ամեն ինչը կարվի պատշաճ մակարդակով: Իհարկե, շատ կարևոր եմ համարում շփումը զոհվածների ընտանիքների անդամների հետ: Իհարկե, այդ շփումն անպայման պետք է կառավարության և զոհվածների ընտանիքների անդամների միջև լինի և լինի շարունակական: Շատ կարևոր եմ համարում հաշմանդամություն ստացած մեր զինվորների հետ շփումը, որովհետև նրանց հետագա կյանքի կազմակերպումը կարևորագույն խնդիրներից մեկն է, և կառավարությունն այստեղ պետք է շատ կարևոր դերակատարություն ունենա: Զինվորը պետք է տեսնի, որ պետությունը կանգնած է իր կողքին և իրենից կախված ամեն ինչ անում է: Պարզ է՝ առողջական խնդիրների լուծումը նույնիսկ քննարկման թեմա էլ չի: Այդտեղ քննարկելու բան չկա: Նաև օրենսդրությամբ նախատեսված են սոցիալական որոշակի երաշխիքներ, այդտեղ էլ քննարկելու ոչ մի բան չկա: Բայց շատ կարևոր է նաև, որպեսզի կառավարությունն աջակցի հաշմանդամություն ստացած մեր զինծառայողներին, ովքեր մասնագիտական վերապատրաստման խնդիր ունեն իրենց հետագա կյանքի կազմակերպման առումով, և սա մեր գործունեության կարևորագույն ուղղություններից մեկը պետք է դառնա»,- եզրափակեց Փաշինյանը: