Փողոցները բացվեցին. ոստիկանները ցրեցին ցուցարարներին (թարմացվող)

12:50

Այս պահին Երևանի բոլոր փողոցները բաց են: Ոստիկանները ցրեցին Փաշինյանի հրաժարականը պահանջող ցուցարարներին: Կաթվածահար եղած երթևեկությունը վերականգնվեց:

12:45

Ոստիկանները խմբերով այցելում են փողոցներ փակած հատվածներ և ցուցարարներին հորդորում բացել ճանապարհը: «Ռազմական դրության պայմաններում հավաքներ անցկացնելը հակասում է օրենքին: Բոլորդ դուրս եք գալիս ճանապարհից»,- ասաց ոստիկանը՝ մեքենաներով ճանապարհ փակած վարորդներին:

Վիճաբանություն սկսվեց Նիկոլ Փաշինյանի հրաժարականը պահանջողների և աջակիցների միջև: Սակայն ոստիկանության ներկայացուցիչները հանդարտեցրին բոլորին:

12:30

Ոստիկանները բերման ենթարկեցին ճանապարհ փակած կանանց: «Ամո՛թ է, ամո՛թ, Նիկոլի ենթականեր»,- բղավում էին կանայք: 

Ակցիայի մասնակիցները փակել են Մյասնիկյան պողոտան, Իսակովի պողոտան, Բրազիլիայի հրապարակը և մի շարք այլ փողոցներ:

«2 րոպե ժամանակ, ով մնաց բերման է ենթարկվելու: Գնա՛ց ժամանակը», - հայտարարեց ոստիկանը՝ հորդորելով բացել փողոցները:

12:25

Քաղաքացիները փակել են նաև Տիգրան Մեծ-Խանջյան խաչմերուկը: Նրանք պնդում են՝ ճանապարհը չեն բացելու մինչև «հողեր հանձնող Նիկոլը» հեռանա:

12:16

Փաշինյանի հրաժարականը պահանջող քաղաքացիները փակել են Երևանի տարբեր փողոցները: 
Այս պահին, բողոքող քաղաքացիների մի մասը փակել է Մաշտոցի պողոտան՝ Մաշտոց-Ամիրյան խաչմերուկը: Երթևեկությունը կաթվածահար է եղել:

Վարորդներից մեկը արագ վարելով մեքենան վրաերթի ենթարկեց ճանապարհը փակած աղջիկներից մեկին: