Եկե՛ք ծնողի սրտով և մտքով մտածենք. անհետ կորածի ծնողը՝ Փաշինյանին (տեսանյութ)

Անհետ կորածների հարազատները կրկին բողոքի ակցիա են իրականացնում ՊՆ-ի դիմաց: Նրանք փորձում են ամեն կերպ որևէ տեղեկություն ստանալ իրենց կորած հարազատների մասին: Այսօր անհետ կորածների հարազատները  հավաքվել են ՊՆ-ի դիմաց՝ ԳՇ պետ Օնիկ Գասպարյանի հետ հանդիպելու, քանի որ ինչպես նշում է անհետ կործներից մեկի հարազատը, արդեն 55 օր է, ինչ սպասում են, սակայն այդպես էլ որևէ տեղեկություն չկա. «Մենք ուզում ենք հասկանալ՝ երբ մեզ կընդունի Օնիկ Գասպարյանը, քանի որ դիմել ենք թե՛ անհատներին, թե՛ պաշտոնյաներին, Հայաստանում այնպիսի մեկը չկա, որին դիմած չլինենք: Մնացել է միայն հանդիպում Օնիկ Գասպարյանի հետ, հասկանալու՝ ինքը կկարողանա մեզ ընդունել և մեր հարցին լուծում տալ» ,- այս մասին լրագրողների հետ զրույցում ասաց անհետ կորածների հարազատներից մեկը՝ Անահիտ Ադոյանը:

Ըստ վերջինիս՝ 55 օր իրենք բարձրացնում են միևնույն հարցը՝ կորած հերոս տղաների խնդիրը, և պետք է արդեն պլաններ մշակված լինեին: Նա նաև անդրադարձավ վարչապետի այն հորդորին, թե անհետ կորածներրի հարազատները պետք է հանգստություն պահպանեն, ըմբռնմամբ մոտենալ. «Այդ ասելը այնքան հեշտ է, եկե՛ք ծնողի սրտով և մտքով մտածենք: Մենք արդեն 55 օր ա, ինչ պայքարում ենք էս ամենի դեմ: Եթե իմանանք անհետ կորածները գերիներ են, այդ սպասումը կարող է այլ տեսակի լինել, բայց այս անորոշությունն է մեզ այս վիճակի մեջ գցում» ,- նշեց Անահիտ Ադոյանը:

Անհետ կորածի հարազատը նաև ասաց, որ երեկ Ադրբեջանի գերությունից վերադարձվածների մեջ կար իրենց ծնողներից մեկի որդին, որի համար շատ ուրախ են, բայցև չպետք է մոռանալ մնացած 40 հոգու մասին: