Գարիով դուք երբեք չեք հարստանա. Փաշինյանը՝ գյուղացուն

Հիմա մենք պետք է նաեւ մտածենք, որ այդ ծրագրերի բովանդակությունը լավացնենք, որ սկսած տնկիների ձեռքբերումից, վերջացրած խորհրդատվությունից, մենք օգնենք, որ այդ այգիները զարգանան: Այս մասին այսօր՝ հունիսի 8-ին, Արագածոտնի մարզի Եղնիկ համայնքում քարոզարշավի ժամանակ, դիմելով գյուղացիներից մեկին ասաց ՀՀ վարչապետի պաշտոնակատր, ՔՊ-ի վարչապետի թեկնածու Նիկոլ Փաշինյանը՝ խոսելով կաթիլային ոռոգման առավելությունների մասին: 

«Մեկ հեկտար գարուց հաստատ ավելի քիչ եկամուտ է ակնկալվում, քան մեկ հա ծիրանից կամ խնձորից, կամ տանձից: Այսինքն մեր խնդիրն այն է, որ սահմանափակ հողային, սոհմանափակ ջրային ռեսուրսը օգտագործենք այնպես, որ այսօրվա մեր արդյունքից կրկնակի, եռակի շատ եկամուտ ստանանք»,-ասաց նա:

Փաշինյանը հարցրեց գյուղացուն, թե իր գարու դաշտը քանի հեկտար է եւ ստանալով պատասխան, որ 1,5 հա է, արձագանքեց. «Դուք 1,5 հա գարիով երբեք չեք հարստանա»: