Հայոց ցեղասպանության թեման եվրոպական դպրոցական ծրագրերում

ՀՀ կրթության և գիտության նախարար Արմեն Աշոտյանն այսօր ընդունել է Գերմանիայի Դաշնային Հանրապետության Սաքսոնիա-Անհալթ երկրամասի մշակույթի և կրթության նախարար Շտեֆան Դորգերլոհի գլխավորած պատվիրակությանը: Հանդիպմանը ներկա էին նաև ՀՀ-ում ԳԴՀ նորանշանակ արտակարգ և լիազոր դեսպան Ռայներ Մորելին և Վիթենբերգի քաղաքապետ Էկհարդ Նաումանը:

Ողջունելով հյուրերին՝ նախարարը նշել է, որ Սաքսոնիա-Անհալթ երկրամասն իր առաջատար դերն է պահպանել երկու երկրների միջև կրթության և մշակույթի ոլորտում հարաբերությունների զարգացման գործում և հույս հայտնել, որ պատվիրակության այցը հերթական էջը կբացի այդ փոխգործակցության: «Ուրախ եմ, որ Գերմանիա կատարած այցի ընթացքում պատիվ եմ ունեցել ներկա գտնվել Սաքսոնիա-Անհալթ երկրամասի կրթության և մշակույթի ներկայացուցչությունում և տպավորված եմ այնտեղի ավանդույթներով: Հատուկ ցանկանում եմ շեշտել Հալեի համալսարանում գործող «Մաշտոց» կենտրոնի գործունեությունը, որը փաստում է, որ երկրամասում հայերի նկատմամբ վերաբերմունքն ունի ոչ միայն ընդհանրական, այլ գիտական մեծ հետաքրքրություն»,-դիմելով պատվիրակության անդամներին՝ նշել է Արմեն Աշոտյանը և հավելել, որ աշակերտների փոխանակման ծրագրերով Հայաստանում գտնվող գերմանացի դպրոցականները տպավորված են հայ աշակերտների ջերմ ընդունելությունից և բազմաթիվ ընկերներ են ձեռք բերել' նշելով, որ նմանատիպ կապերն առավել խորն են, քան միջգերատեսչական: Նախարարը նաև տեղեկացրել է, որ վերջերս Երևանում բացվել է Գյոթեի ինստիտուտի գերմաներեն լեզվի ուսուցման կենտրոնը, որը, ըստ Արմեն Աշոտյանի, վաղուց սպասված իրադարձություն էր և միաժամանակ հույս հայտնել, որ այն առաջին քայլն է՝ Գյոթեի համալսարանի լիարժեք մասնաճյուղ բացելու ճանապարհին: Նախարարը նաև առաջարկել է Գերմանիայի կառավարությանը՝ Հայաստանում գերմաներենի խորացված ուսուցմամբ ավագ դպրոց հիմնել, որը, ըստ Արմեն Աշոտյանի, նոր որակի կբարձրացնի հայ-գերմանական հարաբերությունները:

Սաքսոնիա-Անհալթ երկրամասի մշակույթի և կրթության նախարար Շտեֆան Դորգերլոհը, շնորհակալություն հայտնելով հանդիպման համար, իր հերթին նշել է, որ որ 2005 թվականից սկիզբ առած հարաբերություններն օրեցեօր ավելի ու ավելի են զարգանում' մատնանշելով հատկապես «Մաշտոց» կենտրոնի գործունեությունը. ««Մաշտոց» կենտրոնը՝ որպես փոքրիկ ծաղիկ, երկու երկրների հարաբերություններում ունի մեծ կարևորություն, և այն մշտապես պետք է լինի հոգտարության և ուշադրության կենտրոնում: Նշված կենտրոնի շրջանակում իրականացվել են բազմաթիվ ծրագրեր, մասնավորապես, Քրիստոնեության ընդունման 1700-ամյակին նվիրված միջոցառումներ, համատեղ համաժողով' նվիրված հայ գրատպության 500-ամյակին, տարբեր ցուցադրություններ: Նշված փաստերը ցույց են տալիս, որ հայկական մշակույթի նկատմամբ մեծ հետաքրություն կա, որն էլ իր հերթին հուշում է, որ պետք է խորացնել առկա փոխգործակցությունը»,-նշել է նախարարը՝ հավելելով, որ դպրոցականների փոխանակման ծրագրերը նպաստում են ոչ միայն դպրոցականների միջև սերտ կապերի ամրապնդմանը, այլ նշված գործընթացին հաճախ միանում են նաև ընտանիքներ, համայնքներ, քաղաքներ: Շտեֆան Դորգերլոհը կարևորել է նաև հայ ուսուցիչների գործունեությունը, որոնց ջանքերը, ըստ նախարարի, նպաստում են գերմաներեն լեզվի դիպլոմ ստանալու՝ հայ աշակերտների ջանքերին և հույս հայտնել, որ ապագայում ևս մեկ երևանյան դպրոց կընդգրկվի հայ-գերմանական համատեղ ծրագրերում:

Հանդիպման ընթացքում նախարար Արմեն Աշոտյանը նաև տեղեկացրել է, որ Հայոց ցեղասպանության 100-ամյակին ընդառաջ մի շարք գործընկերների հետ մշակվել է գաղափար՝ եվրոպական դպրոցական ծրագրերում Հայոց ցեղասպանության վերաբերյալ դասընթացներ ներառելու ուղղությամբ: «Նշված գործընթացի նպատակն է Եվրոպայի երիտասարդ սերնդին պատմել 20-րդ դարի մեծագույն ոճիրներից մեկի մասին և կանխարգելել ու բացառել հետագայում նման հանցագործությունների կրկնությունը: Որոշ եվրոպական երկրներ արդեն իսկ ցեղասպանության մասին նյութերը ներառել են հանրակրթական ծրագրերում: Հաշվի առնելով, որ տարիներ առաջ Գերմանիայի Բունդեստագը տվել է իր քաղաքական գնահատականը նշված իրադարձությունների շուրջ՝ կարծում եմ՝ հարկ է երկրի քաղաքական դիրքորոշումը փոխանցել նաև երիտասարդ սերնդին»,-նշել է Արմեն Աշոտյանը: Շտեֆան Դորգերլոհը, դրական գնահատելով նշված նախաձեռնությունը, նշել է, որ հարևան Բրանդենբուրգի երկրամասում արդեն օժանդակ ուսումնական նյութեր են պատրաստվել, որտեղ մարդկության դեմ նմանատիպ այլ ոճիրների շարքում հանգամանալից ներկայացված է նաև Հայոց ցեղասպանությունը՝ նշելով, որ նշված քայլերը ոչ միայն հիշեցնում են ապագա սերունդներին վերոնշյալ ոճրագործությունների մասին, այլ նաև նպաստում են ժողովուրդների երկխոսությանը և հաշտեցմանը՝ որպես օրինակ բերելով գերմանաֆրանսիական հաշտեցման պայմանագիրը:
Հանդիպման ընթացքում անդրադարձ է եղել նաև Հայաստանի և Գերմանիայի Դաշնային Հանրապետության Սաքսոնիա-Անհալթ երկրամասի միջև գիտության, կրթության և մշակույթի բնագավառներում 2005 թվականից գործող պայմանագիրն ավելի արդիական դարձնելու և դրա դրույթները խորացնելու հետ կապված հարցերին: