ԵՄ-ն ակնկալում է, որ ամռանը Ադրբեջանից գազի մատակարարումը կհասնի 10 մլրդ խմ-ի

Եվրամիությունը ակնկալում է, որ Հարավային գազային միջանցքով դեպի Եվրոպա ադրբեջանական գազի մատակարարումների ծավալները մոտ ժամանակներս կհասնեն ծրագրված ցուցանիշներին ՝ 10 մլրդ խմ-ի: Այս մասին ուրբաթ օրը Հարավ-Արեւելյան գործընկերության խորհրդատվական խորհրդի շրջանակներում կայացած նախարարական նիստի ժամանակ հայտարարել է էներգետիկ հարցերով եվրահանձնակատար Քադրի Սիմսոնը, փոխանցում է ՏԱՍՍ-ը։

«Եթե հարցին մոտենանք մատակարարումների անվտանգության հեռանկարների տեսանկյունից, ապա այդ խողովակաշարը (Հարավային գազային միջանցքը) հնարավորություն է ստեղծում երթուղիների դիվերսիֆիկացման համար։ Մենք ակնկալում ենք, որ մոտ ժամանակներս նրա հնարավորությունները կավելանան եւ կհասնեն 10 մլրդ խմ - ի՝ նկատի ունեմ Եվրոպա մատակարարումները», - ասել է եվրահանձնակատարը:

Նա նշել է, որ ներկայումս ուսումնասիրվում են եվրոպական գազի շուկայի սպասումները։ «Հիմնվելով այդ հետազոտությունների արդյունքների վրա՝ մենք կարող ենք պլանավորել (մատակարարումների) ընդլայնումը», - հավելել Է Սիմսոնը։

Նրա գնահատմամբ՝ Եվրոպա գազի մատակարարումների ծավալը կարող է հասնել մինչեւ ամառ։

Ադրբեջանը 2020 թվականի դեկտեմբերի 31-ին սկսել է Տրանսադրիատիկ խողովակաշարով Եվրոպա գազի առեւտրային մատակարարումները, որը Հարավային գազային միջանցքի բաղկացուցիչ մասն է կազմում: Մատակարարումները, որոնք նախատեսված են 25 տարվա համար, նախատեսում են ավելի քան 10 մլրդ խորանարդ մետր ադրբեջանական գազի տարեկան արտահանում եվրոպական շուկա, որից 8 մլրդ խորանարդ մետր կստանա Իտալիան, 1 մլրդ խորանարդ մետր՝ Հունաստանը և Բուլղարիան։

Հարավային գազային միջանցքը, որը ձգվում է Բաքվից մինչեւ Իտալիայի հարավը 3,5 հազար կմ Վրաստանի, Թուրքիայի, Հունաստանի եւ Ալբանիայի տարածքով, իրենից ներկայացնում է խողովակաշարերի ինտեգրված համակարգ, որը ներառում է նաեւ Հարավկովկասյան եւ Տրանսանատոլիական գազատարները: Նրա թողունակությունը կազմում է 16 մլրդ խորանարդ մետր գազ։ Հարավային գազային միջանցքի համար հումքի հիմնական աղբյուրը Շահ Դենիզ հանքավայրն Է՝ 1,2 տրիլիոն խորանարդ մետր պաշարներով։