Ուկրաինայում ԱՄՆ-ի կողմից վերահսկվող լաբորատորիաները համագործակցել են վրացական լաբորատորիաների հետ. ՌԴ ՊՆ

Չղջիկներից մարդուն փոխանցվող հարուցիչների ուսումնասիրություն են իրականացրել ԱՄՆ-ի կողմից վերահսկվող ուկրաինական լաբորատորիաները՝ վրացական լաբորատորիաների եւ ամերիկյան ինստիտուտի հետ միասին։ Այս մասին հինգշաբթի հայտարարել է ՌԴ ԶՈւ ճառագայթային, քիմիական եւ կենսաբանական պաշտպանության զորքերի ղեկավար Իգոր Կիրիլովը, փոխանցում է ՏԱՍՍ-ը։

«[Ուկրաինայում կենսաբանական լաբորատորիաների աշխատանքի] առաջնահերթությունների թվում է բակտերիալ եւ վիրուսային պաթոգենների ուսումնասիրությունը, որոնք կարող են չղջիկներից մարդկանց փոխանցվել՝ ժանտախտի, լեպտոսպիրոզի, բրուցելյոզի, ինչպես նաեւ կորոնավիրուսների եւ ֆիլովիրուսների հարուցիչները։ Ծրագիրն իրականացվում է ոչ միայն ուկրաինական, այլեւ վրացական կենսաբանական լաբորատորիաների ներգրավմամբ, որոնք վերահսկվում են Պենտագոնի կողմից՝ Վիրջինիայի պոլիտեխնիկական ինստիտուտի եւ ԱՄՆ երկրաբանական ծառայության հետ համագործակցությամբ»,- ասել է նա։

Ըստ Կիրիլովի, հետազոտություններն իրականացվում են Ռուսաստանի սահմանների անմիջական մերձակայքում՝ Սեւ ծովի ափամերձ շրջաններում եւ Կովկասում։

Հինգշաբթի ավելի վաղ Ռուսաստանի պաշտպանության նախարարության ներկայացուցիչ, գեներալ-մայոր Իգոր Կոնաշենկովն ասել էր, որ Ռուսաստանի զինված ուժերը ուկրաինական կենսալաբորատորիաների փաստաթղթերում ապացույցներ են գտել, որ Պենտագոնը ֆինանսավորել է մահացու պաթոգենների գաղտնի տարածման մեխանիզմի հետազոտությունը: