«Պարեկ դառնալու համար բարձրագույն կրթությունը պարտադիր չէ». Նիկոլ Փաշինյան

Կառավարությունն իր այսօրվա՝ մարտի 17-ի նիստում վերաբաշխում կատարեց «Հայաստանի Հանրապետության 2022 թվականի պետական բյուջեի մասին» օրենքում, նաեւ ՀՀ ոստիկանությանը գումար հատկացրեց:

Ոստիկանապետ Վահե Ղազարյանը ներկայացնելով փաթեթը նշեց, որ որոշման անհրաժեշտությունը՝ պայմանավորված է ՀՀ ոստիկանության Լոռու և Շիրակի մարզերում պարեկային ծառայության ներդրման նպատակով ավտոտրանսպորտային միջոցների ձեռքբերման, դրանց նպատակային նշանակությանը համապատասխան կահավորման նպատակով:

Նախագծով նախատեսվող ծախսերի  գծով ՀՀ ոստիկանության ընթացիկ տարվա բյուջեով միջոցներ հատկացված  չեն, քանի որ բյուջետային քննարկումների ժամանակ առկա պահանջարկն ամբողջությամբ, քանակական և գումարային առումով,  հստակեցված և գնահատված չի եղել։  Ըստ այդմ նախագծով նախատեսվում է  1158 ծրագրով սահմանված հատկացումներն ավելացնել 2 մլրդ 35 մլն դրամով, որից 289 մլն 900 հազար դրամ կհատկացվի 2 մարզերում 140 պարեկային ավտոմոբիլի ձեռքբերման նպատակով: 62 մլն 200 հազար դրամ՝ պարեկային ավտոմոբիլների կահավորման նպատակով, 1 մլրդ 670 մլն 100 հազար դրամ՝ վարչական  սարքավորումների ձեռքբերման նպատակով:

Իր հերթին վարչապետ Նիկոլ Փաշինյանն ասաց, որ ապրիլի ընթացքում կգործարկվի պարեկային ծառայությունը Շիրակի եւ Լոռու մարզերում, եւ այս որոշումը այդ գործընթացի ֆինանսական հատվածն ապահովելու մասին է.

«Սա իսկապես մեզ համար շատ կարեւոր նշանակություն ունեցող բարեփոխում է: Երեւանում պարեկային ծռայությունը գործում է այս տարվա հուլիսից եւ պետք է արձանագրել, որ պարեկային ոստիկանության գործունեության արդյունքները գոհացուցիչ են: Ես ուզում եմ ընդգծել, որ ՀՀ արտաքին դիմագծի ամենակարեւոր բրենդը ժողովրդավարությունն է եւ մենք, ըստ էության, ձեւավորում ենք ժողովրդավարական չափանիշներին համապատասխանող ոստիկանություն: Իհարկե, այս գործընթացն առանց թերությունների ու բարդությունների չի անցնում: Այս բաեփոխումն իրեն արդարացնում է: Շիարկի եւ Լոռու մարզում էլ գործընթացն անթերի չէ:

Հաջորդ փուլով պարեկային ոստիկանություն կներդրվի Տավուշի, Կոտայքի, Գեղարքունիքի և Արագածոտնի մարզերում: Արդեն ընդունելություն է հայտարարվել: Կա ռեալ մրցակցություն, մեկ տեղի համար արդեն մի քանի հավակնորդ կա»,-ասաց Փաշինյանը՝ հիշեցնելով, որ պարեկային ոստիկանությունում աշխատելու համար պարտադիր չէ նախկինում ոստիկանությունում աշխատած լինելու հանգամանքը, նաեւ բարձրագույն կրթություն ունենալը: