«Սոցիալական աշխատողը Երևան համայնքում» խորագրով միջոցառում՝ Երևանի քաղաքապետարանում

Սոցիալական աշխատողի մասնագիտական օրն այս տարի համայնքը նշում է համակարգային մի շարք բարեփոխումներով: Դեռևս 2019 թ-ից սոցիալական պաշտպանության ոլորտում Երևանի քաղաքապետարանի նախաձեռնած փոփոխությունների ամփոփվում են «Սոցիալական աշխատողը Երևան համայնքում» խորագրով միջոցառմամբ:

Քաղաքապետարանից հայտնում են, որ հանդիսավոր արարողությանը ներկա են եղել Երևանի քաղաքապետ Հրաչյա Սարգսյանը, ՀՀ տարածքային կառավարման և ենթակառուցվածքների նախարար Գնել Սանոսյանը, ՀՀ աշխատանքի և սոցիալական հարցերի նախարարի տեղակալ Տաթևիկ Ստեփանյանը, ՀՀ ԱԺ պատգամավորներ Նարեկ Զեյնալյանը, Հերիքնազ Տիգրանյանը, Զարուհի Բաթոյանը, ԱՄՆ ՄԶԳ հայաստանյան առաքելության տնօրեն Ջոն Ալելոն, Հայաստանում ՅՈՒՆԻՍԵՖ-ի ներկայացուցիչ Քրիստինե Վայգանդը, պետական, միջազգային և հասարակական կառույցների այլ ներկայացուցիչներ:

«Սոցիալական պաշտպանության նոր համակարգը ներդնելու նպատակով մեր կողմից կազմակերպվել է մասնագիտական ուսուցում, վերապատրաստում, որոնք համայնքային աշխատողների մոտ ձևավորեցին համապատասխան հմտություններ և կարողություններ՝ սոցիալական պաշտպանության ոլորտում ծրագրեր իրականացնելու համար: Շատ կարևոր է, որ համայնքը և կառավարությունը նշված ոլորտում շարժվեն մի ուղղությամբ՝ ճիշտ դերաբաշխումներով, որը կնպաստի ՀՀ-ում, մասնավորապես՝ Երևան համայնքում հասցեական սոցիալական ծրագրերի իրականացմանը: Շնորհակալություն ենք հայտնում մեր գործընկերներին, միջազգային կառույցներին՝ USAID, UNICEF մեր այս դժվար գործընթացին աջակցելու համար և հուսով ենք՝ այդ համագործակցությունը շարունակական է լինելու»,- ելույթի իր խոսքում նշում է քաղաքապետ Հրաչյա Սարգսյանը:

Համայնքի նախաձեռնած կառուցվածքային, իրավական և բովանդակային փոփոխությունների նպատակը քաղաքացիներին առավել արդյունավետ սոցիալական աջակցության տրամադրումն էր, սոցիալական աշխատողի ինստիտուտի կայացումն ու նոր ծրագրերի արդյունավետ իրականացումը: Համակարգային փոփոխության առաջնային քայլը սոցիալական ապահովության վարչության ու ընտանիքի, կանանց և երեխաների իրավունքների պաշտպանության բաժնի փոխարեն երեխաների և սոցիալական պաշտպանության վարչության ձևավորումն էր, որն էլ վարչական շրջանների նորաստեղծ՝ երեխայի, սոցիալական պաշտպանության և առողջապահության բաժինների հետ համատեղ ոլորտային ծրագրեր է իրականացնում մայրաքաղաքում:

Եվ, որ կարևոր է, համայնքն այսուհետ բոլոր վարչական շրջաններում կունենա արհեստավարժ սոցիալական աշխատողներ և հոգեբաններ:

ՀՀ տարածքային կառավարման և ենթակառուցվածքների նախարար Գնել Սանոսյանն ու ՀՀ աշխատանքի և սոցիալական հարցերի նախարարի տեղակալ Տաթևիկ Ստեփանյանն իրենց հերթին նկատում են. հաջողված այս փորձը պետք է կիրառելի լինի նաև մարզերում և համայնքներում՝ ապահովելով ապակենտրոն աշխատանք:

«Իսկապես, շատ ուրախալի է, որ տարեցտարի և՛ հասարակության մեջ, և՛ պետական ու տեղական կառավարման համակարգերում գնալով սոցիալական աշխատողի տեղն ու դերը գնահատում ու մեծացնում ենք: Խոշորացման գործընթացում նույնպես գործընկերների ներկայացվածությանը մեծ տեղ ենք տալիս, և բոլորիս նպատակն է առողջ ու բարեկեցիկ հասարակություն ունենալը, իսկ այդ գործում անգնահատելի է սոցիալական աշխատողի դերը,- նշում է Գնել Սանոսյանը:

«Ուզում եմ մեկ անգամ ևս հաստատել, որ ՀՀ կառավարությունը շարունակում է այն քաղաքականությունը, որ սոցիալական աշխատանքը պետք է մատուցվի ապակենտրոն, պիտի գնանք դեպի համայնքներ, պիտի զարգացնենք սոցիալական աշխատողի դերն ու արժևորենք կարևորությունը հենց համայնքում, քանի որ համայնքն է հասցեատերը հիմնական բոլոր խնդիրների: Մենք շարունակելու ենք աջակցել այս բարեփոխումներին, որի վառ ապացույցն է միասնական սոցիալական ծառայության ներդրումը, այն ուղենիշների մշակումը, որով, բոլորս մեկտեղելով մեր ջանքերը, պիտի գնանք դեպի ավելի ապահով համայնքներ»,- ընդգծում է Տաթևիկ Ստեփանյանը:

«Մենք բոլորս միասին ունենք շատ կարևոր տեսլական՝ հասնելու շատ արդյունավետ սոցիալական համակարգի, որը կօգնի հասցեական ծրագրեր իրականացնել համայնքներում: Շնորհակալ եմ համայնքին միացած բոլոր կառույցներին, որովհետև բոլորը միասին հավաքվեցին այդ տեսլականի շուրջ, և սկսեցինք ձևավորել այն ճանապարհը, որով պետք է միասին աշխատենք»,- նշում է Երևանի քաղաքապետարանի երեխաների և սոցիալական պաշտպանության վարչության պետ Լուսինե Հովհաննիսյանը:

Ամփոփելով բարեփոխումների արդյուքները՝ միջազգային գործընկեր կառույցների ներկայացուցիչները ևս փաստում են. համատեղ անցած ճանապարհը ցանկալի արդյունք տվեց, իսկ առջևում նոր նախաձեռնություններ ու ծրագրեր են:

«Մենք հպարտ ենք աջակցել Հայաստանին ուժեղացնելու երկրի սոցիալական պաշտպանության համակարգը՝ արդյունավետ համայնքային սոցիալական աշխատանքի եղանակով: Այս ոլորտում սերտորեն գործակցում ենք Հայաստանի կառավարության հետ՝ մեր գործընկերներ «Վորլդ Վիժն»-ի և «Մանկական զարգացման հիմնադրամ»-ի հետ համատեղ՝ «Հասանելի համայնքային սոցիալական ծառայություններ» (CLASS) ծրագրով։ ԱՄՆ ՄԶԳ-ն օգնել է համայնքի սոցիալական աշխատողների թիվը երկրում բազմապատկել 15 գործակցով՝ 2017-ի 8 սոցիալական աշխատողների թիվը 2022-ին հասցնելով 125-ի։ Մենք արդյունավետ կերպով համագործակցություն ունենք նաև Երևանի քաղաքապետարանի հետ. աջակցել ենք քաղաքապետարանի նախաձեռնած մի շարք համակարգային բարեփոխումներին։ Դրա շնորհիվ Երևանը նախկին մեկ համայնքային սոցիալական աշխատողի փոխարեն հիմա ունի մոտ 60-ը։ Ու սա դեռ սկիզբն է»,-իր ելույթում նշում է ԱՄՆ ՄԶԳ/Հայաստանի տնօրեն Ջոն Ալելոն։

«Երևանի քաղաքապետարանի գլխավորությամբ վերջին մի քանի տարիներին ՅՈՒՆԻՍԵՖ-ը, ԱՄՆ ՄԶԳ և «Վորլդ Վիժն»-ի հետ սերտ համագործակցությամբ, աշխատել է բարելավել համայնքում սոցիալական պաշտպանության համակարգը՝ բարեփոխումներին միտված աշխատանքը չդադարեցնելով նույնիսկ 2020թ. ծանր ճգնաժամային իրավիճակներում: Սոցիալական աշխատանքը կարևորագույն գործիք է արդյունավետ սոցիալական պաշտպանության գործում՝ ապահովելու համար, որ խոցելի ընտանիքներն ստանան անհրաժեշտ աջակցություն: Հուսանք, որ Երևանի քաղաքապետարանում իրականացված սոցիալական պաշտպանության ոլորտի բարեփոխումներից քաղած դասերը կկիրառվեն ազգային մակարդակում իրականացվող նոր սոցիալական պաշտպանության ռազմավարությունը մշակելու, ինչպես նաև կից համակարգի բարեփոխման գործընթացներում, որոնց կյանքի կոչման համար ՅՈՒՆԻՍԵՖ-ն իր աջակցությունն է հայտնում»,- ասում է Հայաստանում ՅՈՒՆԻՍԵՖ-ի ներկայացուցիչ Քրիստինե Վայգանդը:

Երևանի քաղաքապետի որոշմամբ սոցիալական ոլորտի համակարգային փոփոխությունների գործընթացում ներդրած նշանակալի ավանդի համար քաղաքացիական հասարակության ոլորտի փորձագետ Գայանե Վարդանյանն արժանացել է «Երևան քաղաքի պատվավոր սոցիալական ծառայող» կոչմանը:

Երևանի սոցիալական պաշտպանության ոլորտի զարգացման գործում ունեցած մեծ ներդրման, ինչպես նաև 2020թ. երկրում ստեղծված COVID-19-ով ու պատերազմով պայմանավորված արտակարգ իրավիճակներում սոցիալական բազմաթիվ խնդիրների լուծման համար համայնքային մի շարք ծառայողներ ու միջազգային կառույցների ներկայացուցիչներ էլ արժանացել են Երևանի քաղաքապետի պատվոգրերի և շնորհակալագրերի:

«Վստահ եմ, որ մենք կշարունակենք այս աշխատանքը՝ գրանցելով նորանոր արդյունքներ: Երբ տարին ավարտենք ու ամփոփենք, կարծում եմ, ներկայացվածից մեր ձեռքբերումներն ավելի շատ կլինեն: Սոցիալական աշխատողների գործը հաճախ չի երևում, տեսանելի չէ շատերի համար, բայց նրանց աշխատանքն ամենակարևորն է, քանի որ այդ աշխատանքի նպատակը մարդկանց միջավայրը բարելավելն է, ինչը հնարավորություն կտա ստեղծել նոր արժեքներ: Աշխարհը փոխվում է, և մենք անընդհատ պետք է զարգացնենք մեր կարողություններն ու գիտելիքները՝ հաղթահարելով բոլոր մարտահրավերները»,- ընդգծում է քաղաքապետը:

Համակարգային բարեփոխումները կշարունակվեն քաղաքային տնտեսության տարբեր ոլորտներում՝ վստահեցնում է քաղաքապետ Սարգսյանը: Նախաձեռնված ու նախաձեռնվող ծրագրերի հիմքում մեկ նպատակ կա՝ որակյալ ծառայություններ մատուցել քաղաքացիներին՝ առավել վերահսկելի և թափանցիկ դարձնելով համայնքի գործառույթները: