Բելգիան և Նիդեռլանդներն արտաքսում են ռուս դիվանագետներին

Նիդեռլանդների կառավարությունը վտարում է 17 ռուս դիվանագետների՝ նրանց ներկայությունը որակելով որպես «ազգային անվտանգությանը սպառնալիք»։ Երկրի ԱԳՆ-ը հայտնել է, որ նրանք «ռուսական հետախուզության սպաներ են»։

Արտաքին գործերի նախարարությունից հայտնել են, որ երեքշաբթի Ռուսաստանի դեսպանին կանչել եւ ասել են, որ «որպես դիվանագետներ հավատարմագրված սպաները պետք է վտարվեն երկրից», հաղորդում է AP-ն։

Նախարարությունը նշում է, որ «Նիդեռլանդների համար հետախուզական սպառնալիքը մնում է բարձր։ «Ռուսաստանի ներկայիս դիրքորոշումն ավելի լայն իմաստով անցանկալի է դարձնում հետախուզության այդ աշխատակիցների ներկայությունը։

Կառավարությունը հայտարարել է, որ որոշումը կայացվել է «մի շարք համախոհ երկրների հետ» խորհրդակցություններից հետո՝ վկայակոչելով ԱՄՆ-ի, Լեհաստանի, Բուլղարիայի, Սլովակիայի, Էստոնիայի, Լատվիայի, Լիտվայի եւ Չեռնոգորիայի կողմից նմանատիպ վտարումները:

Նշենք, որ Բելգիան նույնպես վտարել է 21 ռուս դիվանագետների՝ «ենթադրյալ լրտեսության եւ անվտանգությանը սպառնալիքի համար», հայտնում է Reuters-ը՝ վկայակոչելով ԱԳՆ-ին։

Խոսքը Բրյուսելում ՌԴ դեսպանության եւ Անտվերպենում հյուպատոսության աշխատակիցների մասին է։ Նախարարության ներկայացուցչի խոսքով՝ նրանք բոլորը հավատարմագրված էին որպես դիվանագետներ, սակայն «լրտեսությամբ եւ ազդեցություն գործելու օպերացիաներով էին զբաղվում»»: