Ռուս զինվորականները խափանել են Մարիուպոլի մերձակայքում «Ազովի» առաջնորդներին տարհանելու փորձը. ՌԴ ՊՆ

ՌԴ ՊՆ պաշտոնական ներկայացուցիչ, գեներալ-մայոր Իգոր Կոնաշենկովը հայտնել է, որ Մարիուպոլի շրջանում ՌԴ ԶՈւ-ն խափանել է «Ազովի» գումարտակի ղեկավարներին տարհանելու փորձը։

Ինչպես պարզաբանել է Կոնաշենկովը, երկու ուկրաինական Մի-8 ուղղաթիռներ, որոնք փորձում էին ծովից թափանցել քաղաք, խոցվել են շարժական զենիթահրթիռային համակարգով։

ՊՆ-ն ընդգծել է, որ ռուսական կողմը բազմիցս և բոլոր հասանելի ուղիներով Կիևի իշխանություններին է ներկայացրել իր առաջարկները Մարիուպոլից ինքնակամ զենքերը վայր դրած Ուկրաինայի զինված ուժերի ստորաբաժանումների դուրսբերման հնարավորության վերաբերյալ: Մասնավորապես, ապրիլի 5-ի առավոտյան ուկրաինացի զինծառայողներին «առաջարկվել է դադարեցնել ռազմական գործողությունները, վայր դնել զենքերը և համաձայնեցված ճանապարհով գնալ Կիևի ռեժիմի կողմից վերահսկվող տարածք»։

Սակայն այդ առաջարկները Կիևի ռեժիմի կողմից մշտապես անտեսվում են, ընդգծել է ռազմական գերատեսչության ներկայացուցիչը։ Նա հայտարարել է, որ, հաշվի առնելով Կիևի անտարբերությունն իր զինծառայողների կյանքը փրկելու հարցում, Մարիուպոլը կազատագրվի ՌԴ ԶՈւ և Դոնեցկի Ժողովրդական Հանրապետության ստորաբաժանումների կողմից։

ՊՆ-ն նաև հայտնել է, որ ՌԴ ԶՈւ-ն ոչնչացրել է Զոլոչև և Չուգուև բնակավայրերի տարածքային պաշտպանության ստորաբաժանման հրամանատարական կետը, վառելիքի պահեստարանները և զրահատեխնիկայի վերանորոգման գործարանը։

Գործակալության տվյալներով՝ օրվա ընթացքում ՌԴ օդատիեզերական ուժերի մարտավարական ավիացիան խոցել է ուկրաինական 33 ռազմական օբյեկտ, այդ թվում՝ ութ հրամանատարական կետ և երեք նյութատեխնիկական պահեստ, ռուսական հակաօդային պաշտպանությունը խոցել է հինգ անօդաչու թռչող սարք։

Ուկրաինայում հատուկ գործողության սկզբից ՌԴ ԶՈւ-ն ոչնչացրել է 125 ուկրաինական ինքնաթիռ, 93 ուղղաթիռ, 1981 զրահամեքենա, ավելի քան 800 դաշտային հրետանի, 1876 միավոր հատուկ տեխնիկա։