ՆԱՏՕ-ի դաշնակիցները համաձայնել են ուժեղացնել գործնական աջակցությունը Վրաստանին եւ Ուկրաինային

ՆԱՏՕ-ի արտգործնախարարները պայմանավորվել են պահպանել եւ ուժեղացնել աջակցությունն Ուկրաինային եւ ակտիվացնել համագործակցությունը գործընկերների հետ՝ «հաշվի առնելով Ուկրաինայի դեմ նախագահ Պուտինի չհրահրված պատերազմի գլոբալ հետեւանքները»: Այս մասին ասվում է Բրյուսելում ՆԱՏՕ-ի արտգործնախարարների հանդիպման արդյունքներով տարածված հայտարարության մեջ։

«Նախարարները նաեւ պայմանավորվել են ուժեղացնել գործնական աջակցությունը ռուսական ագրեսիայի սպառնալիքի տակ գտնվող մյուս գործընկերներին, այդ թվում՝ Վրաստանին եւ Բոսնիա եւ Հերցեգովինային, որպեսզի օգնեն ամրապնդել նրանց կայունությունը: ՆԱՏՕ-ի ԱԳ նախարարներին միացել են Ուկրաինայի, Վրաստանի, Ֆինլանդիայի, Շվեդիայի եւ Եվրամիության գործընկերները, ինչպես նաեւ ՆԱՏՕ-ի Ասիա-Խաղաղօվկիանոսյան գործընկերներ Ավստրալիան, Ճապոնիան, Նոր Զելանդիան եւ Կորեայի Հանրապետությունը»,- նշվում է տեքստում:

«ՆԱՏՕ-ն կընդլայնի համագործակցությունը Ասիա-Խաղաղօվկիանոսյան գործընկերների հետ այնպիսի ոլորտներում, ինչպիսիք են կիբեռնետիկան, նոր տեխնոլոգիաները, ապատեղեկատվությունը, ծովային անվտանգությունը, կլիմայի փոփոխությունը եւ կայունությունը, քանի որ գլոբալ խնդիրները պահանջում են գլոբալ լուծումներ»,- ասել է ՆԱՏՕ-ի գլխավոր քարտուղար Յենս Սթոլթենբերգը:

Նախարարները համաձայնել են, որ ՆԱՏՕ-ի հաջորդ ռազմավարական հայեցակարգը, որը վերջնական տեսքի կբերվի Մադրիդի գագաթաժողովում հունիսին, պետք է հաշվի առնի «Ռուսաստանի հետ ՆԱՏՕ-ի ապագա հարաբերությունները եւ դաշնակիցների անվտանգության վրա Չինաստանի աճող ազդեցությունը»։