Խոշոր ավտովթար Արմավիրի մարզում. կան վիրավորներ

Այսօր՝ մայիսի 15-ին, խոշոր ավտովթար է տեղի ունեցել Արմավիրի մարզում:
 
Ժամը 18:30-ի սահմաններում, Արմավիրի մարզի բնակիչ, 23-ամյա Գևորգ Հովհաննիսյանը՝ իր վարած Mercedes C-240 մակնիշի ավտոմեքենայով, Սարդարապատ գյուղից դեպի Այգեվան գյուղ տանող ճանապարհի 2-րդ կմ հատվածում, դուրս է եկել ճանապարհի երթևեկելի գոտուց, բախվել երկաթե նստարանին, առաջ ընթանալով հայտնվել գերեզմանների տարածքում, կոտրելով 44-օրյա պատերազմում նահատակված, լեգենդ դարձած այգեվանցի Վահան Աղախանյանի գերեզմանի մոտ տեղադրված երկաթե էլեկտրասյունն ու հայտնվել հերոսի գերեզմանի մոտ:
 
Ինչպես հայտնում է Shamshyan.com-ը, վթարի հետևանքով վարորդ Գ. Հովհաննիսյանն ու ուղևոր, Արմավիրի մարզի բնակիչ, 37-ամյա Էդգար Մնացականյանը՝ մարմնական վնասվածքներով, որոնց առաջինը օգնության են հասել գյուղացիները, այնուհետև՝ օպերատիվորեն ժամանած «Արմավիր» բժշկական կենտրոնի շտապօգնության բժիշկների հերթապահ խումբը, նախ տեղում առաջին բուժօգնությունն են ստացել, ապա տեղափոխվել «Արմավիր» բժշկական կենտրոն, որտեղից նրանց տեղափոխել են Երևանի հիվանդանոցներից մեկը: