Դերասան Լիև Շրայբերը կարմիր գորգին ներկայացել է 13-ամյա որդու հետ

Ամերիկացի դերասան Լիև Շրայբերի 13-ամյա որդին հոր հետ ներկայացել է վարդագույն զգեստով և սանդալներով։ Նրանք ժամանել են  «Շատ տարօրինակ գործեր» (Stranger Things) սերիալի չորրորդ սեզոնի պրեմիերային և լուսանկարիչների համար կեցվածք ընդունել կարմիր գորգի վրա։ Այս մասին հայտնում է Gazeta.ru-ն:

Սամուել Քայը մի քանի տարի է, ինչ երկարեցնում է մազերը, կրում է նաև վառ զգեստներ, կիսաշրջազգեստներ, տոպեր։ Տղայի մայրը՝ հոլիվուդյան դերասանուհի Նաոմի Ուոթսը, չնայած բացասական մեկնաբանություններին ու դատապարտումներին, պարբերաբար սոցցանցերում հրապարակում է երեխայի նկարները։ Նա անձնական բլոգում ասել է, որ աջակցել է որդու փորձարկումներին և չի պատրաստվում սահմանափակել նրա ազատությունը հագուստի ընտրության հարցում։ Իսկ Լիեւ Շրայբերը Սամուելի արտաքինի վերաբերյալ քննադատություններից հետո դադարել է երեխային ցուցադրել Instagram-ում:

Հոլիվուդյան դերասաններ Նաոմի Ուոթսը և Լիև Շրայբերը բաժանվել են 2016 թվականին՝ 11 տարի միասին լինելուց հետո։ Արվեստագետները պատմել են, որ կարողացել են լավ հարաբերություններ պահպանել, ուստի պարբերաբար հանդիպում և ժամանակ են անցկացնում իրենց երեխաների հետ։ Նրանք երկու որդի ունեն՝ 14-ամյա Սաշա Փիթը և 13-ամյա Սամուել Քայը։