ՔԿՀ-ներում տարին մեկ անգամ անցկացվում է կանխարգելիչ բուժզննություն

Ազատազրկված անձանց բուժումն իրականացնելու համար առկա է 442 անուն դեղորայք: «ՔԿՀ-ներում դատապարտյալների առողջության պահպանում. ինչպե՞ս է աշխատում բուժօգնության ծառայությունը» թեմայով ասուլիսին այս մասին նշեց «Քրեակատարողական բժշկության կենտրոն» ՊՈԱԿ-ի բժշկական օգնության կազմակերպման, սպասարկման և հասարակայնության հետ կապերի բաժնի պետ Նաիրա Բաբայանը: 

«Նյարդային լարվածությունը կարող է բերել մի շարք հիվանդությունների զարգացման: Դրա պատճառով արձանագրվում են դեպքեր, երբ դատապարտյալները քրեակատարողական հիմնարկ են մտնում առողջ և դուրս գալիս ինչ-ինչ խնդիրներով»,- նշեց Բաբայանը

Վերջինիս խոսքով՝ «Քրեակատարողական բժշկության կենտրոն» ՊՈԱԿ-ի կողմից տարեկան մեկ անգամ իրականացվում է կանխարգելիչ զննություն: Այդ թվում՝ որովայնի, կոնքերի սոնոգրաֆիկ հետազոտություն, արյան, մեզի անալիզ, բիոքիմիական հետազոտություններ և այլն:

«Եթե կանխարգելիչ զննությունների ժամանակ հայտնաբերվում են խնդիրներ, անհրաժեշտություն է առաջանում, որ կոնկրետ անձը լրացուցիչ հետազոտություններ անցնի»,- ընդգծում է Բաբայանը:

Բաբայանը վստահեցնում է՝ դատապարտյալներին ժամկետանց դեղորայք չի առաջարկվում: Նշում է՝ լինում են դեպքեր, երբ դատապարտյալներն իրենց մոտ երկար ժամանակ դեղորայք են պահում, և հետո ընդունում այն: Հնարավոր է՝ այդ ընթացքում դեղորայքի ժամկետն անցնում է, և այն պիտանելի չի լինում օգտագործման համար:

Անդրադառնալով հացադուլում գտնվող դատապարտյալներին՝ Բաբայանը նշեց, որ դա դատապարտյալի իրավունքն է, այդկերպ է ուզում իր խոսքը տեղ հասցնել:

Նրա խոսքով՝ հացադուլում գտնվող դատապարտյալը ստանում է դեղորայքային բուժում, եթե ունի դրա անհրաժեշտությունը: Բուժաշխատողները հացադուլում գտնվող դատապարտյալին մշտապես ուշադրության կենտրոնում են պահում: