2022-ին քաղաքացիների «գրպանը մտած» պաշտոնյաների թոփ 10-յակը

Չնայած այն բոլոր խոստումներին և հավաստիացումներին, որ հեղափոխությունից հետո շարքային հպարտ քաղաքացիների կյանքը կբարելավվի՝ վերջին չորս տարիները գալիս են ապացուցելու հակառակը: Ի տարբերություն ՔՊ-ական պաշտոնյաների, որոնց սոցիալական վիճակի բարվոքությունը որևէ կասկած չի հարուցում, վերջիններիս կողմից ընդունված բազմաթիվ որոշումներ ուղղակիորեն հարվածել և հարվածում են քաղաքացիների գրպանին՝ էլ ավելի բարդացնելով նրանց առանց այդ էլ ծանր ֆինանսական դրությունը: 

Առողջապահության նախարարությունը մի նախագիծ է դրել շրջանառության մեջ, որով նախատեսվում է պետական այն ծառայողներին, ովքեր չեն համաձայնվում պատվաստվել, պարտադրել ամիսը երկու անգամ սեփական գրպանի հաշվին թեստ անել: Այսինքն՝ պետական ծառայողները, որոնց աշխատավարձը չի բարձրացել, ստիպված են լինելու կամ պատվաստվել, կամ ամսական 30 հազար դրամ ծախսել թեստավորման վրա: Էլեկտրոնային առողջապահության համակարգին չմիանալը նույն ԱԺ թեթե ձեռամբ այսուհետ առաջացնում է տուգանք` 30․000 – 50․000 դրամի չափով: Պարտադիր վարման ենթակա բժշկական (այդ թվում` էլեկտրոնային) փաստաթղթեր չվարելն առաջացնում է տուգանք` 50․000 – 60․000 դրամի չափով: Իսկ նույն արարքը կրկին կատարելը վարչական տույժի միջոց կիրառելուց հետո` մեկ տարվա ընթացքում, առաջացնում է տուգանք` 70․000 – 100․000 դրամի չափով:

Առողջապահության նախարարությունից հետ չի մնացել Երևանի քաղաքապետարանը՝ հարվածելով քաղաքացիների գրպանին:  Սվագանու «Իմ քայլը» խմբակցությունը, ի թիվս այլ հարկերի եւ տուրքերի, բարձրացրեց նաեւ աղբահանության համար գանձվող վճարը: Հրաչյա Սարգսյանը որոշել է պատժել աղբը չթույլատրված վայրում նետողներին՝ 300 հազար դրամով:

Սահմանային շերտում լուսանկարահանումներ իրականացնելու համար «Իմ քայլի» պատգամավոր Արմեն Խաչատրյանն էլ առաջարկում է սահմանել շուրջ 300 հազար դրամի տուգանք:

ՊԵԿ-ի կողմից այս տարի ներկայացվեց «Հարկային օրենսգրքում փոփոխություններ և լրացումներ կատարելու մասին» նախագիծը: Այն վերաբերում է ՀԴՄ-ների կիրառության կանոնների խախտման դեպքում պատասխանատվության չափերի վերանայմանը: Նախագծով առաջարկվում է ուժը կորցրած ճանաչել կասեցման կարգավորումները, վերացնել այն սահմանափակումը, որի դեպքում տեղի է ունենում հարկման դաշտի փոփոխություն, և սահմանել ՀԴՄ-ների կիրառության կանոնների խախտման մեկ չափ բոլոր դեպքերի համար, այն է՝ 200 հազար դրամ` գումարած նախորդ եռամսյակի ՀԴՄ ֆիսկալ հասույթի 0.5 տոկոսը

Վարչական իրավախախտումների վերաբերյալ օրենսգրքում լրացում է կատարվել, ըստ որի՝ զինծառայողների համար սահմանված զինվորական համազգեստը զինվորական ծառայության մեջ չգտնվող և զինվորական համազգեստ կրելու իրավունք չունեցող անձի կողմից կրելու դեպքում կնշանակվի տուգանք՝ 100 հազար դրամի չափով: Ի դեպ, նույն արարքը, եթե կատարվել է կրկին կամ յուրաքանչյուր հաջորդ անգամ վարչական տույժ կիրառելուց հետո` մեկ տարվա ընթացքում, առաջացնում է տուգանքի նշանակում՝ 200 հազար դրամի չափով:

Ավտոմոբիլային ճանապարհներով առավելագույն զանգվածը գերազանցող ծանրաքաշ մեքենաներով երթևեկելու տուգանքի չափը կբարձրանա։ Նախագծով նախատեսվում է ՀՀ ընդհանուր օգտագործման պետական ավտոմոբիլային ճանապարհներով թույլատրելի առավելագույն զանգվածը գերազանցող ծանրաքարշ կամ մեկ սռնու վրա ընկնող բեռնվածքը գերազանցող տրանսպորտային միջոցներով երթևեկելու համար սահմանված տուգանքի չափը՝ 200.000 դրամը, փոփոխել և մինչև 1 տոննա և ավելի յուրաքանչյուր տոննայի համար սահմանել 200 հազար դրամ տուգանք: Օրենքի նախագիծը ներկայացրել է ՀՀ վարչապետի աշխատակազմի տեսչական մարմինների աշխատանքների համակարգման գրասենյակի ղեկավարի պարտականությունները կատարող Արմեն Դանիելյանը:

Դիլիջանի համայնքապետ ընտրվելուց հետո ՀՀԿ-ական նախկին պատգամավորի որդին՝ Վահագն Արսենյանը, ըստ որոշ տեղեկությունների, կտրուկ ՝ շուրջ 40 անգամ բարձրացրել է անշարժ գույքի համար վճարվող հարկը:

ԱԺ թեթե ձեռամբ թանկացավ նաև գույքահարկը` դոմինոյի էֆֆեկտով թանկացումներ առաջացնելով նաև մյուս ոլորտներում: Նախագծի հեղինակները «Իմ քայլը» խմբակցության պատգամավորներ Գևորգ Պապոյանն ու արդեն նախկին պատգամավոր Արգիշտի Մեխակյանն էին:

Էկոնոմիկայի նախարար Վահան Քերոբյանի անգործության և ընդունած որոշման արդյունքում գյուղատնտեսությամբ զբաղվողների համար պարարտանյութը և թունաքիմիկատները կտրուկ թանկացել են` հասնելով ընդհուպ 20 հազար դրամի:

Կառավարությունը մեկ այլ  որոշում էլ ընդունեց՝ բարձրացրեց անշարժ գույքի հարկի դրույքաչափերը։ Այժմ այն հաշվարկվում է ոչ թե անշարժ գույքի կադաստրային, այլ շուկայական արժեքի հիման վրա: 

Թերևս բոլորը կհիշեն, թե ինչ էր ասում Նիկոլ Փաշինյանը․ ասում էր՝ պետական բյուջեն ժողովրդի գրպանն է, ձեր աջ գրպանը համարեք ձերը, ձախը՝ պետական բյուջեն։ Այժմ կառավարությունը հարմար տեղավորվել է ժողովրդի թե՛ աջ գրպանի մեջ, թե՛ ձախ գրպանի մեջ։