Հոգեբանները պարզել են, թե որ մարմիններն են մարդիկ համարում առավել սեքսուալ

Մեծ Բրիտանիայի Նորթումբրիայի համալսարանի հոգեբանները պարզել են, որ հասարակության մեջ ամենագրավիչ են համարվում համեմատաբար ցածր կամ չափավոր մարմնի ճարպերով և չափավոր մկանային զանգվածով կանացի մարմինները, մինչդեռ տղամարդկային ամենագրավիչ մարմիններն ունեն նույն մակարդակի ճարպ, սակայն շատ ավելի մկանուտ են: Հետազոտության արդյունքները հրապարակվել են Frontiers in Psychology ամսագրում։

Հետազոտությանը մասնակցել է 134 կին և 134 տղամարդ: Նրանց խնդրել են գնահատել համակարգչով ստեղծած 3D մարմինների գրավչությունը, որոնք տարբերվում էին մկանային զանգվածի և մարմնի ճարպի մակարդակներով: Մասնակիցներին թույլ է տրվել նաև ինքնուրույն կարգավորել մկանների և ճարպերի քանակը 3D մոդելներում, որպեսզի ստեղծեն առավել գրավիչ մարմին:

«Մենք պարզեցինք, որ որքան շատ էին մասնակիցները ներգրավված սպորտային մշակույթում, այնքան ավելի շատ էր գրավիչ մարմնի իրենց պատկերացումներում ճարպային շերտը նվազում, իսկ մկանային զանգվածը՝ մեծանում: Սա սպորտային մշակույթի ազդեցության հետեւանք է, որը տարածված է սոցիալական ցանցերում։ Նման մարդիկ մարմնի իդեալների մասին անառողջ պատկերացում կազմելու վտանգի տակ են»,- եզրակացրել են հետազոտողները: