Հայտնի են «Ոսկե գլոբուս 2023»-ի հաղթողները (լուսանկարներ)

Լոս Անջելեսում կայացել է «Ոսկե գլոբուս» 80-րդ մրցանակաբաշխությունը։ Գլխավոր հաղթողները ռեժիսոր Սթիվեն Սփիլբերգը, դերասանուհի Քեյթ Բլանշեթը և դերասան Օսթին Բաթլերն են, գրում է BBC-ն։

Սփիլբերգն արժանացել է «Լավագույն ռեժիսոր» մրցանակին «The Fabelmans» ֆիլմի համար, որտեղ հայտնի հոլիվուդյան ռեժիսորը մասամբ նկարագրել է իր երիտասարդությունը: Ֆիլմը շահել է նաև «Լավագույն ֆիլմ» անվանակարգում։

Քեյթ Բլանշեթը ստացել է «Ոսկե գլոբուս» «Tar» ֆիլմում լավագույն դերասանուհի անվանակարգում, որտեղ նա մարմնավորել է Բեռլինի ֆիլհարմոնիկ նվագախմբի դիրիժորին։ Դերասանուհին չի մասնակցել արարողությանը, քանի որ այժմ նկարահանվում է Մեծ Բրիտանիայում։

Օսթին Բաթլերը արժանացել է «Լավագույն դերասան» մրցանակին «Elvis»-ի համար, որը հայտնի երգիչ Էլվիս Փրեսլիի մասին կենսագրական ֆիլմ է։ Ռեժիսորն է Բազ Լուրմանը:
Իռլանդացի դերասան Քոլին Ֆարելը ճանաչվել է «Լավագույն դերասան կատակերգություն/մյուզիքլ» անվանակարգում՝ «The Banshees of Inisherin» տրագիկոմեդիայի համար, որտեղ իրադարձությունները տեղի են ունենում հեռավոր իռլանդական կղզում: Այս ժապավենը լավագույնն է ճանաչվել նաև «կատակերգություն/մյուզիքլ» անվանակարգում, «Ոսկե գլոբուս» է ստացել է նաև դրա սցենարիստ Մարտին Մակդոնահը։

Միշել Յեոն արժանացել է կատակերգության/մյուզիքլի լավագույն դերասանուհի անվանակարգում՝ «Everything Everywhere All At Once» գիտաֆանտաստիկ կատակերգության համար, որը պատմում է զուգահեռ տիեզերքներում կյանքի մասին։
«Լավագույն անիմացիոն ֆիլմ» անվանակարգում հաղթել է Գիլերմո դել Տորոյի «Pinokio»-ն:

«House of the Dragon»-ը՝ «The game of Trones»-ի պրիքվելը, ճանաչվել է «Լավագույն հեռուստասերիալ»:

Արարողությանը ցուցադրվել է նաև Ուկրաինայի նախագահ Վլադիմիր Զելենսկու տեսաուղերձը։ Այն ներկայացրել է դերասան Շոն Փենը, ով բազմիցս այցելել է Ուկրաինա լայնամասշտաբ պատերազմի սկսվելուց հետո և նույնիսկ իր «Օսկարը» տարել է Կիև։

Ըստ The Hill-ի ամերիկյան հրատարակության՝ Զելենսկին հիշեցրել է, որ «Ոսկե գլոբուսները» սկսել են շնորհվել Երկրորդ համաշխարհային պատերազմի ժամանակ՝ 1943թվականին։ Նա ասել է, որ ուկրաինական ճակատամարտը ռուսական ներխուժման դեմ խորհրդանշում է «նոր սերնդի պայքարը՝ պատերազմի մասին միայն ֆիլմերից իմանալու իրավունքը»։ «Առաջին համաշխարհային պատերազմում միլիոնավոր մարդիկ են զոհվել: Երկրորդ համաշխարհային պատերազմը տասնյակ միլիոնավոր կյանքեր խլեց: Երրորդ համաշխարհային պատերազմ չի լինելու: Սա եռապատում չէ», - ասել է Զելենսկին:

Լավագույն օրիգինալ երգ է ճանաչվել հնդկական RRR ֆիլմի համար գրված «Naatu Naatu»-ն։ Այս կոմպոզիցիայի տեսահոլովակը նկարահանվել է 2021 թվականին Կիևի Մարիինյան պալատում՝ Ուկրաինայի նախագահի նստավայրում։

Այս տարվա արարողությունն առաջինն էր կորոնավիրուսի համաճարակի պատճառով ներդրված կարանտինային միջոցառումների վերացումից հետո։ Դրան մասնակցում էին բազմաթիվ աստղեր, այդ թվում՝ երգչուհի Ռիհաննան և այնպիսի դերասաններ, ինչպիսիք են Բրեդ Փիթն ու Մարգո Ռոբին։