Միլիարդատեր Բեռնար Առնոն դստերը նշանակել է Dior-ի ղեկավար

Աշխարհի ամենահարուստ մարդը՝ Բեռնարդ Առնոն, իր դստերը՝ Դելֆինային, նշանակել է Christian Dior-ի ղեկավար։ Սա նրա LVMH շքեղ ապրանքների կայսրության երկրորդ ամենամեծ ապրանքանիշն է: Այդ մասին գրում է The Guardian-ը։

Չորեքշաբթի օրը՝ հունվարի 11-ին, Բեռնար Առնոն հայտարարեց, որ Դելֆինան կդառնա Dior-ի գործադիր տնօրեն և տնօրենների խորհրդի նախագահ՝ որպես 382 միլիարդ եվրո արժողությամբ կոնգլոմերատի վերադասավորումների մաս: Դելֆինա Առնոն, ով այժմ Louis Vuitton-ի գործադիր փոխնախագահն է և բրենդի արտադրանքի պատասխանատուն, նոր պաշտոնը կզբաղեցնի փետրվարի 1-ից։

«Դելֆինայի ղեկավարությամբ Louis Vuitton-ի արտադրանքը դարձել է ավելի ցանկալի՝ թույլ տալով ապրանքանիշին կանոնավոր վաճառքի նոր ռեկորդներ սահմանել: Նրա խորաթափանցությունը և անհամեմատելի փորձը որոշիչ են լինելու Christian Dior-ի հետագա զարգացման գործում»,- ասել է Բեռնար Առնոն:

Ֆրանսիացի գործարարի 47-ամյա դուստրը ընտանեկան բիզնեսին միացել է 2000 թվականին՝ երկու տարի McKinsey խորհրդատվական ընկերությունում աշխատելուց և Լոնդոնի տնտեսագիտության դպրոցում սովորելուց հետո: Նա միացել է LVMH-ի տնօրենների խորհրդին 2003 թվականին՝ դառնալով ղեկավար խմբի առաջին կին և ամենաերիտասարդ անդամը։

Անցյալ ամիս Բեռնար Առնոն իր որդուն՝ Անտուանին, նշանակեց գլխավոր գործադիր տնօրեն և Christian Dior SE հոլդինգի նախագահ, որը վերահսկում է LVMH խմբում կապիտալի 41%-ը և ձայնի իրավունքի 56%-ը: