Հայաստանի և Լաոսի դիվանագետներն ու պաշտոնյաները միմյանց երկրներ կայցելեն առանց մուտքի արտոնագրի

Որոշման հիմնավորման մեջ նշվում է, որ Հայաստանի և Լաոսի միջև դիվանագիտական հարաբերությունները հաստատվել են 1998 թ. ապրիլի 21-ին: Վիետնամում ՀՀ դեսպանը համատեղության կարգով հավատարմագրված է նաև Լաոսում, իսկ ՌԴ-ում ԼԺԺՀ-ի դեսպանը՝ Հայաստանում: Հայաստանը և Լաոսն արդյունավետ համագործակցում են նաև միջազգային կազմակերպությունների շրջանակներում:

2021 թ. ընթացքում հայկական կողմի նախաձեռնությամբ Լաոսի պաշտոնական ներկայացուցիչների հետ ՀՀ ԱԳ նախարարության ղեկավարության և Լաոսում Հայաստանի Հանրապետության դեսպանի հետ հանդիպումների ժամանակ առաջարկվել և երկուստեք դրական է գնահատվել Հայաստանի Հանրապետության կառավարության և Լաոսի Ժողովրդական Ժողովրդավարական Հանրապետության կառավարության միջև դիվանագիտական և ծառայողական/պաշտոնական անձնագրեր ունեցող անձանց համար մուտքի արտոնագրի պահանջի վերացման հարցը:

Համաձայնագրի նպատակն է՝ յուրաքանչյուր կողմի պետության՝ դիվանագիտական և պաշտոնական/ծառայողական վավեր անձնագրեր ունեցող քաղաքացիներին ազատել միմյանց տարածք մուտքի, տարանցման և կեցության արտոնագրի պահանջից: Այն կվկայի երկու երկրների միջև բարձր մակարդակի հարաբերությունների հաստատման մասին։