Սիրիայի նախագահը խոսել է Ռուսաստանի մասնակցությամբ Թուրքիայի հետ շփումների մասին

Սիրիայի նախագահ Բաշար ալ-Ասադը հայտարարել է, որ Անկարա-Դամասկոս-Մոսկվա ձևաչափով շփումները լուրջ աշխատանք են պահանջում, այդ թվում՝ սիրիա-ռուսական համագործակցության միջոցով, փոխանցում է РИА Новости-ն։ Նրա խոսքով, դա անհրաժեշտ է բանակցություններից հետո որոշակի արդյունքների հասնելու համար։

«Հանդիպումները [ինչպես անցյալ դեկտեմբերին Ռուսաստանի, Սիրիայի և Թուրքիայի պաշտպանության նախարարների եռակողմ բանակցությունները] պետք է նախապատրաստվեն Ռուսաստանի և Սիրիայի միջև նախնական համակարգմամբ և պլանավորմամբ, որպեսզի արդյունավետ լինեն և հասնեն այն կոնկրետ նպատակներին, որոնց սպասում է Սիրիան»,- ասված է Ասադի գրասենյակի հայտարարության մեջ։

Ինչպես նշել է Սիրիայի նախագահը, Դամասկոսի համար կոնկրետ արդյունքը, մասնավորապես, վերաբերում է հանրապետության տարածքի օկուպացիայի դադարեցմանը։ Բացի այդ, Ասադը արդյունքների թվում անվանել է նաև երկրում ահաբեկիչներին տրամադրվող օգնության ավարտը։

Սիրիայի ղեկավարը համապատասխան հայտարարություն է արել Սիրիայի հարցով ՌԴ նախագահի հատուկ բանագնաց Ալեքսանդր Լավրենտևի հետ հունվարի 12-ին Դամասկոսում կայացած երկխոսության ժամանակ։