Հեռացող ՄԻՊ-ի գլխավոր «ձեռքբերումները». ում իրավունքներն էր պաշտպանում Քրիստինե Գրիգորյանը

Վերջին օրերին զանգվային լրատվության միջոցներն ակտիվ քննարկում են ՄԻՊ Քրիստինե Գրիգորյանի հավանական հրաժարականի հարցը: Արդեն իսկ հաստատված տեղեկությունների համաձայն՝ նա պատրաստվում է լքել ՄԻՊ պաշտոնը և տեղափոխվել Բարձրագույն դատական խորհուրդ:  Ստացվում է, որ ՄԻՊ-ն այս պաշտոնում աշխատել է ուղիղ մեկ տարի՝ օր առ օր:

Քանի որ մեկ տարին յուրաքանչյուր պաշտոնյայի համար համարվում է հանրությանը հաշվետվություն ներկայացնելու ժամանակահատված, իսկ ՄԻՊ-ը դեռևս այդ գործին չի լծվել՝ դա կանենք իր փոխարեն: Ինչո՞վ է աչքի ընկել Քրիստինե Գրիգորյանը պաշտոնավարման մեկ տարվա ընթացքում:

Նախ և առաջ ՄԻՊ-ի ընտրվելը համընկավ մայրաքաղաքում և մի շարք մարզերում ծավալվող բողոքի ակցիաների հետ, որոնց ընթացքում հաճախ ականատես ենք լինում քաղաքացիների իրավունքների կոպիտ ոտնահարմանը: Այս դրվագներով Քրիստինե Գրիգորյանը բարեհաճել է արձագանքել ընդամենը 2-3 անգամ, այն էլ այնքան բալանսավորված գնահատականներ տալով, որ լուրջ հարցեր են առաջանում, թե այդ դրվագներում ում շահերն է պաշտպանում ՄԻՊ-ը: Ոչ մի խոսք արցախցիների դեմ սանձահարված և հայտնի կենտրոններից ուղղորդվող ատելության քարոզի մասին, չենք խոսում այդ քարոզին հակազդելու մասին: Ոչ մի խոսք սահմանային իրավիճակի, ՀՀ սուվերեն տարածք ներխուժած և ՀՀ քաղաքացիների կյանքին սպառնացող ադրբեջանական զինված ուժերի գործողությունների մասին: Փոխարենը` Քրիստինե Գրիգորյանը հասցնում էր արտասահմանյան գործողում-վոյաժների մեկնել և այնտեղ կիսվել իր նախորդի ունեցած ձեռքբերումներով:

Արդեն նախկին ՄԻՊ-ի բուռն գործունեությունից կարող ենք առանձնացնել ակնհայտ ֆեյք օգտատերերի գրառումներին պարտաճանաչ արձագանքող և դրանց հիման վրա ուսումնասիրություններ իրականացնղ Քրիստինե Գրիգորյանը ջանասիրաբար արգելափակում է այն ռեալ օգտատերերին, ովքեր հանդգնում են հետաքրքրվել, թե ինչով է ընդհանրապես զբաղված ՀՀ հարկատուների հաշվին աշխատավարձ ստացող, սակայն՝ ֆեյքերի և իշխանությունների շահերը պաշտպանող ՄԻՊ-ը:

Սկանդալները, սակայն, այսքանով չավարտվեցին:  Հերթական սկանդալը վերաբերվում էր ՄԻՊ Քրիստինե Գրիգորյանի եւ նրա հոր՝ Սեւանի շուկայի տնօրեն Աղվան Գրիգորյանին: Համացանցում տարածվել է տեսանյութ, թե ինչպես են ՄԻՊ-ի հոր շուկայի աշխատողները ուղղորդված վերաբերմունք ցուցաբերում Իջեւան-Երեւան քայլերթի մասնակիցների նկատմամբ:

 Գրիգորյանը  այս ընթացքում գրառումներ է կատարել, որում անդրադարձել է հենց ատելության խոսքի դեմ ՀՀ իշխանությունների, ասել է թե իր պայքարին: Սակայն, հարց է առաջանում՝ ինչպե՞ս է ստացվել, որ Գրիգորյանը չի նկատել մի շարք ՔՊ-ական պաշտոնյաների կամ մերձիշխանական շրջանակների կողմից տարածվող ատելության խոսքին: Չի՞ նկատել, թե չի՞ ցանկացել նկատել: Դիցուք՝ Վաղարշապատ համայնքի ղեկավարի առաջին տեղակալ Արսեն Պետրոսյանն իր մի գրառման մեջ վիրավորական արտահայտություններ էր հնչեցրել ընդդիմադիրների եւ Մարդու իրավունքների նախկին պաշտպան Արման Թաթոյանի հասցեին:

Հայաստանյան պաշտոնյաների համար, կարծես թե, սովորական երևույթ է դարձել հակասել միմյանց, ավելին՝ հակասել իրենց իսկ նախկինում արած հայտարարություններին, պնդումներին: Այդ պաշտոնյաների թվին է դասվում նաև ՄԻՊ Քրիստինե Գրիգորյանը, ով վերջին շրջանում աչքի էր ընկնում ոչ միայն գործընկերներին, այլ նաև ինքն իրեն հակասելով:

Դիցուք՝  Քրիստիննե Գրիգորյանը մայիսի 3-ին մամուլի ասուլիսին անդրադարձել է վարչապետ Նիկոլ Փաշինյանի ավտոշարասյանը ուղեկցող ճանապարհային ոստիկանության մեքենայի կողմից հղի կնոջը վրաերթի ենթարկելու դեպքին։ Թեմայի վերաբերյալ «պարզաբանումներով» հանդես էր գալիս վարչապետի աշխատակազմի ղեկավարի տեղակալ Տարոն Չախոյանը, որը ապրիլի 27-ին ֆեյսբուքյան իր էջում պնդել էր, թե երկրների ղեկավարների շարասյանը ուղեկցող մեքենաները վրաերթի դեպքում իրավունք չունեն կանգ առնելու չնախատեսված տեղում։ Չախոյանի այս պնդումները մայիսի 3-ին փաստացի հերքել էր ՄԻՊ Քրիստիննե Գրիգորյանը՝ պնդելով, որ որևէ արարողակարգ և կանոն նման բան չեն սահմանում։ «…Կոնկրետ դեպքում ցավալի է տեսնել, որ ուղեկցող ծառայությունը ուղղակիորեն չի կանգնում, երբ նման դեպք է տեղի ունենում: Սա որևէ արարողակարգով կամ կանոնով կարգավորված չէ: Առնվազն մինիմալ հումանիզմ է, որ առաջին հերթին պետք է օգնություն ցույց տալ և հնարավորության դեպքում կնոջ ու երեխայի կյանքը փրկել»,- ասել էր Գրիգորյանը։

Սա էլ դեռ բավարար չէր՝ Քրիստինե Գրիգորյանն ու պաշտպանության նախարարությունը հերքում են միմյանց եւ հակասող հայտարարություններ տարածում: Բանն այն է, որ ՄԻՊ-ը հաստատել էր, որ ադրբեջանցի զինվորականները տեղակայվել են Ներքին Հանդի հարակից տարածքում: ՊՆ-ն, ըստ էության, ընդունում է տարածքի՝ Ադրբեջանի վերահսկողության տակ անցնելը, բայց ոչ թե այս տարվա մարտից, այլ նախորդ տարվա գարնանից: Բացի այդ, ՄԻՊ-ը շեշտում էր՝ անասնապահությամբ ու գյուղատնտեսությամբ զբաղվող բնակիչների համար այս իրավիճակը լրջագույն դժվարություններ է ստեղծել իրենց ապրուստը հոգալու առումով։ ՊՆ-ն հակառակն էր պնդում՝ հիմնավորելով, որ ադրբեջանցիները չեն կարող դիտարկել Ներքին Հանդը, քանի որ նրանց դիրքերը 2 կիլոմետր հեռու են, բացի այդ, գյուղի եւ նրանց միջեւ մի քանի բարձունք կա։

2019-ին ՀՀ արդարադատության նախարարությունը «Կանանց նկատմամբ բռնության և ընտանեկան բռնության կանխարգելման ու դրա դեմ պայքարի մասին Եվրոպայի խորհրդի կոնվենցիա»-ի (Ստամբուլի կոնվենցիա) հարցով դիմել էր Վենետիկի հանձնաժողովին` խորհրդատվական կարծիք ստանալու համար: Պատճառն էլ այն էր, որ ըստ նախարարության՝ այդ կոնվենցիան կարող է հակասել հայկական ավանդական ընտանիքի կոնցեպտին։ Հիշեցնենք, որ այն ժամանակ փոխնախարար էր հենց Քրիստինե Գրիգորյանը: Զբաղեցնելով ՄԻՊ պաշտոնը՝ սակայն Գրիգորյանը, կարծես, մոռացել է հայկական ավանդական ընտանիքի կոնցեպտը։ Նա իր պաշտոնում առավելապես զբաղված էր ԼԳԲՏ համայնքի համար գրասենյակների բացմանը մասնակցելով:

Կարող ենք փաստել, որ մեկ տարվա գործունեության ընթացքում ՄԻՊ Քրիստինե Գրիգորյանն աչքի է ընկել իշխանությունների հանդեպ իր լոյալությամբ և մարդու իրավունքների պաշտպանության ոլորտում առկա հիմնախնդիրները չնկատելու տալով: