Ովքեր են ՔՊ-ի «սպիտակ ագռավները»

Ընդհամենը մեկ տարի առաջ ՔՊ-ում այսպես ասած՝ տոն տվող անձինք այսօր, կարծես թե, ընդհատակ են անցել և դարձել են սպիտակ ագռավներ անգամ սեփական թիմակիցների համար: Ովքե՞ր են այդ ՔՊ-ականները և ո՞րն է վերջիններիս նման ինքնամեկուսացման պատճառը:

Դիցուք՝ 2020 թվականի նոյեմբերին հրաժարականի դիմում ներկայացրեց սոցապ նախարար Զարուհի Բաթոյանը: Դրանից հետո պարզ դարձավ, որ ՀՀ հաշվեքննիչ պալատը հրապարակել է 266 էջանոց զեկույց, որտեղ տեղ են գտել Սոցապնախարարությունում հայտնաբերված հրեշավոր խախտումների մասին տեղեկություններ: Փաստերն արդեն իսկ ուղարկվել են դատախազություն: Դրանք վերաբերում են 2019 թվականի հունվարի 1-ից մինչև դեկտեմբերի 31-ն ընկած ժամանակահատվածին, երբ ՀՀ աշխատանքի և սոցիալական հարցերի նախարարը Զարուհի Բաթոյանն էր: Այդ պահից ի վեր Բաթոյանը կարելի է ասել՝ ընդհատակ է անցել, թեև այսօր պատգամավորական գործունեություն է ծավալում:

Նույնը կարելի է ասել առողջապահության նախկին նախարար Արսեն Թորոսյանի մասին: Նախկին նախարարը վաղո՜ւց չի շփվում թիմակիցների հետ ու, ասես, մերժված լինի բոլորի կողմից: Նա այժմ ընդգծված մտերիմ է Ազգային ժողովի սոցիալական հարցերի մշտական հանձնաժողովի նախագահ Հերիքնազ Տիգրանյանի հետ: Ու դա պատահական չէ: Իսկ Տիգրանյանն իր հերթին Հակակառուպցիոն կոմիտեի նախագահ Սասուն Խաչատրյանի ու վերջինիս եղբոր՝ Բարձրագույն դատական խորհրդի անդամ Դավիթ Խաչատրյանի հետ է մտերիմ:  Նկատենք, որ Թորոսյանի ու ՔՊ-ականների հարաբերությունները էլ ավելի են լարվել կուսակցության՝ ավելի քան մեկ ամիս առաջ տեղի ունեցած վարչության նիստից ու արձանագրված խայտառակ ընտրակեղծիքներից հետո: ՔՊ-ականերին դուր չի եկել, որ Թորոսյանը հասկացել ու հանձն է առել մինչև վերջ բացահայտելու ընտրությունների հետ կապված խառնաշփոթը: 

ԲՏԱ նախկին նախարար Հակոբ Արշակյանը հրաժարական տվեց լրագրողին ծեծի ենթարկելու շուրջ առաջացած սկանդալից հետո: Թեև նա այսօր զբաղեցնում է ԱԺ փոխնախագահի պաշտոնը՝ նախկին ակտիվությամբ ակնհայտորեն աչքի չի ընկնում:

ՔՊ-ական Արփի Դավոյանը նույնպես վերջին շրջանում ակտիվորեն պասիվացել է, նա այլևս սուր գրառումներ չի անում և հարցազրույցներով հանդես չի գալիս: Սեպտեմբերի 25-ի ՏԻՄ ընտրություններից եւ Լոռվա համայնքներում կրած խայտառակ պարտությունից հետո ԱԺ ՔՊ խմբակցությունում Արփի Դավոյանն այլեւս չունի նախկին հեղինակությունը, որ ձեռք էր բերել նաեւ վարչապետի աչքն ու ականջը լինելու շնորհիվ: Բացի այդ, վերջինիս չներեցին ՔՊ վարչության խայտառակ անցկացված ընտրությունները:

ՔՊ-ական Կարեն Սարուխանյանը, ով նախկինում բավական ակտիվ էր և նույնիսկ համարում էր Շիրակի մարզպետի պաշտոնին վերադառնալու հիմնական թեկնածուն, նույնպես պասիվացել է: Դա տեղի ունեցավ Շիրակում և հատկապես Ամասիայում ՏԻՄ ընտրություններում ՔՊ-ի խայտառակ պարտություններից հետո:

Շատերի համար ընկալելի չէ նաեւ Մխիթար Հայրապետյանի պահվածքը․ պատերազմից հետո լուրեր էին հասնում, որ մեկուսացել, ինքնամփոփ է դարձել, կուսակցական հավաքների ժամանակ այն քչերից էր, որ Փաշինյանին մեղադրում էր կատարվածի մեջ։ Հայրապետյանն էլ չցանկացավ պատգամավոր դառնալ եւ ընտրացուցակում ամենավերջին հորիզոնականում էր։ Բայց որոշ ժամանակ անց հայտնվեց Փաշինյանի կնոջ կողքին՝ «Իմ քայլը» հիմնադրամի գործադիր տնօրենի պաշտոնում։