Ինչ գործունեությամբ է աչքի ընկել Սինգապուրում ՀՀ դեսպան Սերոբ Բեջանյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Սինգապուրում ՀՀ արտակարգ և լիազոր դեսպան Սերոբ Բեջանյանի գործունեությանը:  Վերջինիս կենսագրությունը բավական ուշագրավ է։ 2004-2006թթ. Բեջանյանը աշխատել է ՀՀ ԱԳՆ մամուլի և տեղեկատվության վարչության տեղեկատվության բաժնի վարիչ, 2006-2007թթ.՝ Հունաստանում ՀՀ դեսպանության 1-ին քարտուղար., 2007-2009թթ.՝ Հունաստանում ՀՀ դեսպանության խորհրդական, 2009-2014թթ.՝ ՀՀ ԱԳՆ քարտուղարության խորհրդական, 2014-2016թթ.՝ ՆԱՏՕ-ում ՀՀ առաքելության խորհրդական, 2016-2018թթ.՝ ՆԱՏՕ-ում ՀՀ առաքելության արտակարգ դեսպանորդ և լիազոր նախարար, 2018թ.՝ հունիս-հոկտեմբեր ՀՀ ԱԳՆ սպառազինությունների վերահսկման և միջազգային անվտանգության վարչության խորհրդական, 2018-2022թթ.՝ ՀՀ ԱԳՆ լրատվության և հանրային դիվանագիտության վարչության պետ, 2022թ. հուլիսի 11-ից՝ Ինդոնեզիայի Հանրապետությունում Հայաստանի Հանրապետության արտակարգ և լիազոր դեսպան (նստավայրը՝ Ջակարտա):

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է։ Սինգապուրում բնակվող հայերի թիվը բավական փոքր է, այս առումով պետք է փաստել, որ դեսպանատուն-համայնք համագործակցություն՝ որպես այդպիսին, գոյություն չունի։

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Սակայն, բացակայում է որևէ տեղեկատվություն, թե հավատարմագրերի հանձնումից հետո դեսպան Բեջանյանը հանդիպումների ինչ շարք է ունեցել Սինգապուրի քաղաքական էլիտան ներկայացնող ուժերի կամ առանձին քաղաքական գործիչների հետ: Պետք  է միայն փաստել, որ Հայաստան-Սինգապուր հարաբերություններում այս ընթացքում միակ դրական տեղաշարժը Հայաստանի ԱԺ-ում ձևավորված ՀՀ-Սինգապուր բարեկամական խումբն էր: Եթե հարաբերություններում որոշակի դրական դինամակի էլ կա, ապա այն առկա է ԵԱՏՄ-Սինգապուր և ոչ թե ՀՀ-Սինգապուր գծով: Մինչդեռ դեսպանատունը միանշանակ անելիք ուներ և կարող էր իր աշխատանքով նպաստել քաղաքական և տնտեսական կապերի ակտիվացմանն ու խորացմանը:

Իսկ ինչ իրավիճակ է հանրային դիվանագիտության դաշտում: Նշենք, որ դեսպանատունը չունի պաշտոնական էջ, ինչը տեխնոլոգիաների դարում գրեթե նոնսենս է: Քիչ թե շատ ակտիվ է Ինդոնեզիայում ՀՀ դեսպանության ֆեյսբուքյան էջը․ հիշեցնենք, որ Բեջանյանը համատեղության կարգով դեսպան է նաև Ջակարտայում: Սակայն, դեսպանատան ֆեյսբուքյան էջում նույնպես դժվար է գտնել տեղեկատվություն դեսպանության գործունեության մասին, այստեղ ևս գերակշռում են ԱԳՆ կողմից տարածված ռելիզները: