Ինչ գործունեությամբ է աչքի ընկել Շվեյցարիայում ՀՀ դեսպան Անդրանիկ Հովհաննիսյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Շվայցարիայում ՀՀ արտակարգ և լիազոր դեսպան Անդրանիկ Հովհաննիսյանի գործունեությանը:  Վերջինս բավական ուշագրավ կենսագրություն ունի: 2000 – 2004թթ. աշխատել է որպես Սիրիայում ՀՀ դեսպանության կցորդ (Դամասկոս), 2004 – 2006թթ.` ՀՀ ԱԳՆ ՍՎՄԱ վարչության ռազմաքաղաքական համագործակցության բաժնի 3-րդ քարտուղար, 2006 - 2009թթ.` ԵԱՀԿ-ում ՀՀ մշտական ներկայացուցչության 2-րդ քարտուղար (Վիեննա, Ավստրիա), 2009 – 2010թթ.` ՀՀ ԱԳՆ Եվրոպայի վարչության Եվրոպայի խորհրդի բաժնի 1-ին քարտուղար, 2010 – 2012թթ.` ՀՀ ԱԳՆ Եվրոպայի վարչության ԵԱՀԿ բաժնի վարիչ, 2012 – 2014թթ.` ԱՄՆ-ում ՀՀ դեսպանության խորհրդական, դեսպանի տեղակալ (Վաշինգտոն), 2014 – 2019թթ.՝ ՀՀ ԱԳ նախարարի խորհրդական, 2019թ. ապրիլին  նշանակվել է Ժնևի Միավորված ազգերի կազմակերպության գրասենյակում և այլ միջազգային կազմակերպություններում ՀՀ մշտական ներկայացուցիչ (նստավայրը` Ժնև), 2019թ. հունիսին նշանակվել է Շվեյցարիայի Համադաշնությունում ՀՀ արտակարգ և լիազոր դեսպան (նստավայրը` Ժնև): 

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է։ Համայնքը թեպետ սակավաթիվ է, սակայն խիստ կազմակերպված, հատկապես` ֆրանսախոս մասում և սերտորեն համագործակցում է ՀՀ դեսպանության հետ: Տարվա ընթացքում համատեղ կազմակերպվում են միջոցառումներ: Համայնքը նաև տեխնիկական աջակցություն է ցուցաբերում ՀՀ դեսպանությանը կարևոր միջոցառումների, ինչպես նաև բարձրաստիճան պաշտոնյաների Ժնև ժամանման ժամանակ: Ցեղասպանության ճանաչման և դրան առնչվող բոլոր հարցերում կարևորագույն շարժիչ ուժ են հանդիսանում Շվեյցարիայում հայ համայնքը և կազմակերպությունները: Դաշնային մակարդակով ցեղասպանության ճանաչման գործընթացի հաջողությունը արդյունք էր համայնքի բոլոր կազմակերպությունների միասնական գործունեության, համատեղ կազմակերպված տարբեր ակցիաների և միջոցառումների, որոնք միտված էին պատգամավորների հետ նպատակաուղղված աշխատանքներ կատարելուն` վերջիններիս դրական ձայները ապահովելու նպատակով: Ամբողջ շրջանում սերտ համագործակցություն է ընթացել դեսպանության հետ, որի արդյունքում, դերերի հստակ բաշխման միջոցով, ծրագրվել և իրագործվել է սփյուռքի և պետական մակարդակներով լծակների օգտագործումը: Այս հարցի առնչությամբ համայնքային կազմակերպություններից յուրահատուկ տեղ է զբաղեցնում «Շվեյցարիա-Հայաստան Ընկերակցություն» կազմակերպությունը: Այն ամենաակտիվ դերն է կատարում շվեյցարական ներքաղաքական դաշտ մուտք գործելու հարցում:

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Այս առումով կարելի է առանձնացնել Հովհաննիսյանի հանդիպումը Ներքին տեղահանման մոնիտորինգի կենտրոնի (IDMC) տնօրեն Ալեքսանդրա Բիլակի հետ: Ինչպես նաև Շվեյցարիայի Դաշնային ժողովի (խորհրդարան) Կանտոնների խորհրդի (Վերին պալատ) նախագահ Ալեքս Կուպրեխտի և Շվեյցարիայի խորհրդարանի նախագահ Անդրեաս Աեբիի հետ։

Ինչ իրավիճակ է հանրային դիվանագիտության դաշտում: Պետք է նշել, որ դեսպան Հովհաննիսյանը բավական հաճախ է հանդես գալիս հարցազրույցներով: Դրանց շարքում կարելի է առանձնացնել դեսպանի հարցազրույցը շվեյցարական հանրային ռադիոյի իտալական ծառայության «Մոդեմ» ծրագրին։ Այդ հարցազրույցի ընթացքում դեսպանը նշել է, որ Ադրբեջանի նպատակն է նվաճել Լեռնային Ղարաբաղը և ենթարկել այն էթնիկ զտման։ Պետք է առանձնացնել նաև դեսպանի հարցազրույցը  «Corriere dell’ Italianita» պարբերականին:

Ակտիվ է նաև դեսպանատան պաշտոնական ֆեյսբուքյան էջը, որտեղ պարբերաբար բարձրաձայնվում է Ադրբեջանի կողմից Լաչինի միջանցքի շրջափակման հարցը։

Շարունակելի..