Ինչ գործունեությամբ է աչքի ընկել Կորեայում ՀՀ դեսպան Արեգ Հովհաննիսյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Կորեայում ՀՀ արտակարգ և լիազոր դեսպան Արեգ Հովհաննիսյանի գործունեությանը: Վերջինիս կենսագրությունը բավական հարուստ է: 2001-2006թթ․աշխատել է Լիբանանի Հանրապետությունում ՀՀ արտակարգ և լիազոր դեսպան, 2006-2007թթ․` ՀՀ ԱԳՆ խորհրդական, 2007-2010թթ․` ՀՀ ԱԳՆ Ասիայի, Օվկիանիայի և Աֆրիկայի վարչության պետ, 2010-2013թթ․` ՀՀ ԱԳՆ Մերձավոր Արևելքի վարչության պետ, 2013-2017թթ․` Վիեննայում միջազգային կազմակերպություններում ՀՀ մշտական ներկայացուցչի տեղակալ, 2017-2021թթ․` ՀՀ ԱԳՆ Ասիայի, Օվկիանիայի վարչության պետ, 2021թ․ փետրվարի 16-ից Ճապոնիայում և Կորեայում Հայաստանի Հանրապետության արտակարգ և լիազոր դեսպան (նստավայրը՝ Տոկիո):

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է: Հաշվի առնելով, որ Կորեայում հայ համայնքը այնքան էլ բազմամարդ չէ, դեսպանատուն-համայնք համագործակցություն որպես այդպիսին առկա չէ: Սակայն, դեսպան Հովհաննիսյանի վերջին հանդիպումներից կարելի է առանձնացնել Նոր Զելանդիայի Օքլենդ քաղաք կատարած աշխատանքային այցելության շրջանակներում  Նոր Զելանդիայի Հայկական Միության 25-ամյակին նվիրված միջոցառման մասնակցությունը:

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Այս առումով պատկերը բավական տխուր է, քանի որ Կորեայի քաղաքական վերնախավի հետ դեսպանի հանդիպումների մասին ընդհանրապես ոչինչ հայտնի չէ: Կարելի է առանձնացնել միայն  Կորեայի Հանրապետության ԱԳՆ-ում տեղի ունեցած՝ Հայաստանի Հանրապետության և Կորեայի Հանրապետության արտաքին գերատեսչությունների միջև հերթական քաղաքական խորհրդակցությունները։

Ինչ իրավիճակ է հանրային դիվանագիտության դաշտում: Այստեղ իրավիճակը շատ ավելի տխուր է: Դեսպանատան պաշտոնական ֆեյսբուքյան էջում կարելի է գտնել ցանկացած տիպի տեղեկատվություն, բացառությամբ Կորեայում ՀՀ դեսպանատան գործունեությունը լուսաբանող ռելիզներից: 

Դեսպանը որևէ կերպ հանրային հարթակներում չի անդրադարձել Ադրբեջանի կողմից սանձազերծած երկու պատերազմներին և Լաչինի շրջափակման թեմային: Դրա փոխարեն դեսպանատան էջում կարելի է գտնել ԱԳՆ նախարարի ելույթների ռելիզները, այն էլ՝ ֆրանսերենով