Ինչ գործունեությամբ է աչքի ընկել Ռումինիայում ՀՀ դեսպան Սերգեյ Մինասյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Ռումինիայում ՀՀ արտակարգ և լիազոր դեսպան Սերգեյ Մինասյանի գործունեությանը:  Վերջինիս կենսագրությունը բավական ուշագրավ է՝ 2002-2003թթ․ Դասախոս, Պետական կառավարման ակադեմիա, ՀՀ կառավարություն, Երևան, Հայաստան,2002-2006թթ․ Գիտաշխատող, Իրանագիտության կովկասյան կենտրոն, Երևան, Հայաստան, 2002-2006թթ․ Գիտաշխատող, Պատմության ինստիտուտ, ՀՀ ԳԱԱ, Երևան, Հայաստան , 2002-2008թթ․ Դասախոս, Համաշխարհային քաղաքականության և միջազգային հարաբերությունների ամբիոն, Հայ-Ռուսական (Սլավոնական) համալսարան, Երևան, Հայաստան, 2003-2005թթ․ Տնօրեն, Հարավային Կովկասի անվտանգության և ինտեգրացիոն ուսումնասիրությունների գիտահետազոտական կենտրոն, Երևան, Հայաստան, 2006-2009թթ․ Գիտաշխատող, Քաղաքական ուսումնասիրությունների ինստիտուտ, ՀՀ նախագահի աշխատակազմ, Երևան, Հայաստան, 2006-2017թթ․ Տնօրենի տեղակալ, Քաղաքական ուսումնասիրությունների բաժնի ղեկավար, Կովկասի ինստիտուտ, Երևան, Հայաստան, 2009-2010թթ․ Դասախոս, Միջազգային հարաբերությունների ֆակուլտետ, ԵՊՀ, Երևան, Հայաստան,2011- 2017թթ․ Ծրագրի տեղական համակարգող, Կովկասի Ակադեմիական Շվեյցարական Ցանց (ASCN), Երևան, Հայաստան, 2012- 2017թթ․ Տարածաշրջանային ռազմական վերլուծաբան, IHS Jane’s տեղեկատվական խումբ, Լոնդոն, ՄԹ, 2013-2015թթ․ Գիտաշխատող, ՀՀ ՊՆ Դրաստամատ Կանայանի անվան Ազգային ռազմավարական հետազոտությունների ինստիտուտ, Երևան, Հայաստան, 2017թ-ից Ռումինիայում ՀՀ արտակարգ և լիազոր դեսպան:

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է։ Հայերն ունեն փոքրամասնության կարգավիճակ, ինչի շնորհիվ պետության կողմից ֆինանսավորվում են համայնքային հաստատությունների եւ եկեղեցու գործունեությունը: 2010թ. սեպտեմբերին Ռոմանիո Հայոց թեմի առաջնորդ ընտրվեց Տաթեւ եպիսկոպոս Հակոբյանը, որը փոխարինեց Տիրայր Արք. Մարտիկյանին (1930-2010թթ.): Ըստ 2002թ. մարդահամարի իրենց հայ են համարել ընդամենը մի քանի հազար անձ, թեեւ հայկական ծագումով ռումինացիների թիվը զգալիորեն մեծ է, որոնց մեջ այսօր էլ կան աչքի ընկնող անհատներ: Վերջին երկու տասնամյակների ընթացքում Ռումինիայում հաստատվել են նաեւ որոշ թվով Հայաստանից գաղթած ընտանիքներ: Այսօր հայ փոքրամասնությունը Խորհրդարանում ներկայացված է ի դեմս Վարուժան Փամբուկչյանի, որը նաեւ գլխավորում է Խորհրդարանի ազգային փոքրամասնությունների խումբը: Սենատի տնտեսության, արդյունաբերության եւ ծառայությունների հանձնաժողովի նախագահն է Վարուժան Ոսկանյանը: Դեսպանատուն- համայնք համագործակցությունը բավական ակտիվ է: Ընդամենը վերջերս Մինասյանը մասնակցեց Լոռու մարզի քույր մարզ հանդիսացող Ռումինիայի Հարգիտա նահանգում կայացած Գեորգենի (պատմական հայաբնակ Ջուրջով) հայկական արվեստի փառատոնի 12-րդ թողարկմանը:  Մինասյանը Բուխարեստի հայկական մշակութային կենտրոնում մասնակցել է նաև վաղամեռիկ ռումինահայ լրագրող, պատմաբան Էդուարդ Անտոնյանին նվիրված հուշ-ցերեկույթին: Նախորդ տարվա ապրիլի 28-ին Տրանսիլվանիայի Կլուժ-Նապոկա քաղաքում Ռումինահայոց միության Կլուժի մասնաճյուղի նախաձեռնությամբ, Տրանսիլվանիայի ազգագրագիտության թանգարանի, Կլուժի համալսարանի հայագիտության ինստիտուտի և Կլուժի նահանգային խորհրդի համագործակցությամբ տեղի ունեցավ «Երբեք չենք մոռանա» խորագրով միջոցառումը՝ նվիրված Հայոց ցեղասպանության 107-րդ տարելիցին: Միջոցառմանը մասնակցեց նաև դեսպանը: Մարտի 26-ին Ռումինիայում ՀՀ դեսպան Սերգեյ Մինասյանը մասնակցեց Ռումինահայոց միության տարեկան Գլխավոր համաժողովին

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Կարևոր հանդիպումներից կարելի է առանձնացնել Մինասյանի հանդիպումը Ռումինիայի Պաշտպանության և ռազմական պատմության քաղաքական հետազոտությունների ինստիտուտի տնօրեն դոկտոր Կարմեն-Սորինա Ռիժնովեանուի հետ: 2022 թվականի մարտի 1-ից 2-ը տեղի ունեցավ Ռումինիայում ՀՀ դեսպան Սերգեյ Մինասյանի աշխատանքային այցը Ռումինիայի՝ Ուկրաինային և Մոլդովայի Հանրապետությանը սահմանակից նահանգներ՝ տեղում իրավիճակին ծանոթանալու նպատակով:  Մինասյանը հանդիպել է  նաև Ռումինիայի խորհրդարանի պատգամավոր, Ռումինիայի հրեական համայնքների ֆեդերացիայի նախագահ Սիլվիու Վեքսլերի/Silviu Vexler հետ։ Մինասյանը հանդիպել է նաև Բուխարեստի գյուղատնտեսության և անասնաբուժության համալսարանի ռեկտոր Ռազվան Թեոդորեսկուի/Razvan Teodorescu ու Ռումինիայի ԱԳՆ պետքարտուղար Դանիելա Գիտմանի/Daniela Gitman հետ:

Իսկ ինչ իրավիճակ է հանրային դիվանագիտության դաշտում: Դեսպան Մինասյանը աչքի չի ընկնում հաճախակի տրվող հարցազրույցներով: Կարելի է առանձնացնել թերևս միայն դեսպանի հարցազրույցը DefenseRomania-ին, որի ընթացքում վերջինս անդրադարձել է նաև Արցախյան երկրորդ պատերազմին։

Բացի այդ՝ Business Arena ռումինական ամսագրի հոբելյանական 100-րդ համարում հրապարկվել է Ռումինիայում Հայաստանի Հանրապետության դեսպան Սերգեյ Մինասյանի հարցազրույցը հայ-ռումինական առևտրատնտեսական հարաբերությունների և դրանց զարգացման հեռանկարների, Ռումինիայում հայ համայնքի ունեցած ավանդի, ինչպես նաև հայ-ռումինական բարեկամության և վստահության դարավոր պատմության վերաբերյալ:

Բավական ակտիվ է դեսպանությունը եկեղեցական դիվանագիտության ասպարեզում: Մասնավորապես, պետք է առանձնացնել Մինասյանի հանդիպումը Ալբա Յուլիայի ռոմանո-կաթոլիկ արքեպիսկոպոս, Ռումինիայի հայ կաթոլիկ համայնքի առաքելական առաջնորդ դոկտոր Կովաչ Գերգեյին (Kovács Gergely) հետ: