Ինչ գործունեությամբ է աչքի ընկել Իտալիայում ՀՀ դեսպան Ծովինար Համբարձումյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Իտալիայում ՀՀ արտակարգ և լիազոր դեսպան Ծովինար Համբարձումյանի գործունեությանը:  Վերջինիս կենսագրությունը բավական ուշագրավ է՝

1992-1995թթ. Էջմիածնի Ներսիսյան վարժարան, թուրքագիտության ուսուցիչ,
1995-1996թթ. ՀՀ նախագահի աշխատակազմի վերլուծական բաժին, փորձագետ,
1996-1998թթ. ՀՀ նախագահի գլխավոր խորհրդականի աշխատակազմ, 1-ին կարգի մասնագետ, ապա՝ առաջատար մասնագետ,
1998-1998թթ. ՀՀ նախագահի աշխատակազմի վերլուծական ծառայություն, առաջատար մասնագետ,
1998-2002թթ. ՀՀ նախագահի մամուլի քարտուղարի գրասենյակ, գլխավոր մասնագետ,
2002- 2018թթ. ՀՀ նախագահի աշխատակազմի արտաքին կապերի վարչություն, գլխավոր մասնագետ, խորհրդատու, վարչության պետ,
2018-2020թթ. ՀՀ վարչապետի աշխատակազմի արտաքին կապերի վարչության պետ։2020թ. հունիսի 1-ին ՀՀ նախագահ Արմեն Սարգսյանի հրամանագրով նշանակվել է Իտալիայի Հանրապետությունում Հայաստանի Հանրապետության արտակարգ և լիազոր դեսպան (նստավայրը՝ Հռոմ):

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է: Դեսպանատուն - համայնք համագործակցության շրջանակներում պետք է առանձնացնել հետևյալ դրվագները; Բոլոնյայի համալսարանի և ISMEO ասոցիացիայի նախաձեռնությամբ Ռավեննայում և Բոլոնյայում կազմակերպված «Հայաստան՝ բազմահազարամյա ժողովուրդ» միջազգային համաժողովի առիթով ս․թ․ փետրվարի 17-ին Բոլոնյայի համալսարանի Մեծ դահլիճի նախասրահում տեղի ունեցավ «Հայկական հետքերը Բոլոնյայի համալսարանական գրադարանում» խորագրով ցուցահանդեսը Աննա Շիրինյանի և Պաոլո Տինտիի գիտական ​​համակարգմամբ: Ռավեննա կատարած աշխատանքային այցի ընթացքում դեսպան Համբարձումյանը այցելել էր Ռավեննայի Սան Վիտալե բազիլիկ եկեղեցի, որտեղ գտնվում է Իտալիայի հայազգի էկզարք /փոխարքա/ Սահակի (625-643թթ․) դամբարանը։ 

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Փետրվարի 14-ին դեսպան Ծովինար Համբարձումյանը հանդիպել էր Իտալիայի Սենատի արտաքին հարաբերությունների և պաշտպանության մշտական հանձնաժողովի նախագահ, «Առաջ Իտալիա» կուսակցության ներկայացուցիչ Ստեֆանիա Կրաքսիի հետ։  Համբարձումյանը Իտալիայի ներկայացուցիչների պալատում հանդիպում է ունեցել նաև  «Հինգ աստղ» շարժման ներկայացուցիչներ, Արտաքին հարաբերությունների հանձնաժողովի անդամներ Ֆեդերիկա Օնորիի և Արնալդո Լոմուտիի հետ, ինչպես նաև՝ «Հինգ աստղ» շարժման ներկայացուցիչ, Բյուջեի, գանձապետական և ծրագրավորման հանձնաժողովի փոխնախագահ Ջանմաուրո դելլ՛Օլիոյի հետ։  Ծովինար Համբարձումյանը ՀՀ դեսպանությունում հյուրընկալեց Վենետոյի մարզի Ազոլո քաղաքի քաղաքապետ Մաուրո Միլյորինիին, որը հանդիսանում է նաև Cittaslow International ցանցի նախագահը, ինչպես նաև՝ նույն կազմակերպության գլխավոր քարտուղար Պիեր Ջորջո Օլիվետիին։ Քննարկվեցին համագործակցության հեռանկարները Ազոլոյի և Ջերմուկի միջև՝ որպես քույր քաղաքներ, ինչպես նաև՝ հնարավոր համագործակցությունը Cittaslow International-ի շրջանակում։ Փետրվարի 4-ին դեսպան Ծովինար Համբարձումյանը Ֆլորենցիայի քաղաքապետ Դարիո Նարդելլայի հրավերով մասնակցեց արգենտինահայ գործարար Էդուարդո Էռնեկյանին Ֆլորենցիա քաղաքի բանալիների հանձնման արարողությանը, որը տեղի ունեցավ պատմական Պալացցո Վեկիոյի սրահներից մեկում։  

Իսկ ինչ իրավիճակ է հանրային դիվանագիտության դաշտում: Պետք է նշել, որ դեսպանատունը հատկապես Լաչինի միջանցքի ապօրինի շրջափակումից հետո ակտիվորեն բարձրաձայնում է ադրբեջանական կողմի ցեղասպան գործողությունների մասին: Այդ նպատակով հրապարակվում են տարաբնույթ հոդվածներ, տարածվում են իտալացի քաղաքական գործիչների հայանպաստ հարցազրույցները: