Ինչ գործունեությամբ է աչքի ընկնում ԱՄԷ-ում ՀՀ դեսպան Կարեն Գրիգորյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Արաբական Միացյալ էմիրություններում ՀՀ արտակարգ և լիազոր դեսպան Կարեն Գրիգորյանի գործունեությանը:  Վերջինիս կենսագրությունը բավական ուշագրավ է՝

1999-2001թթ․ Լիբանանի Հանրապետությունում ՀՀ դեսպանության երկրորդ քարտուղար

2001-2002թթ․ Սիրիայի Արաբական Հանրապետությունում ՀՀ դեսպանության երկրորդ քարտուղար

2002-2004թթ․ ՀՀ ԱԳՆ Մերձավոր և Միջին Արևելքի երկրների վարչության արաբական երկրների և Իսրայելի բաժնի երկրորդ քարտուղար, բաժնի վարիչի պարտականությունները կատարող

2004-2005թթ․ ՀՀ ԱԳՆ Ամերիկայի վարչության Ամերիկայի և Կանադայի բաժնի առաջին քարտուղար

2005-2006թթ․ ՀՀ ԱԳՆ Մերձավոր և Միջին Արևելքի երկրների վարչության արաբական երկրների և Իսրայելի բաժնի վարիչի պաշտոնակատար

2006-2009թթ․ Սիրիայի Արաբական Հանրապետությունում ՀՀ դեսպանության խորհրդական

2009-2011թթ․ ՀՀ ԱԳՆ Մերձավոր և Միջին Արևելքի երկրների վարչության արաբական երկրների և Իսրայելի բաժնի վարիչի պաշտոնակատար

2011-2014թթ․ Հալեպում  Հայաստանի Հանրապետության գլխավոր հյուպատոս

2014-2018թթ․ Իրաքում  Հայաստանի Հանրապետության արտակարգ և լիազոր դեսպան

2018-2021թթ. Եգիպտոսի Արաբական Հանրապետությունում Հայաստանի Հանրապետության արտակարգ և լիազոր դեսպան (նստավայրը՝ Կահիրե)

2019-2021թթ. Սուդանի Հանրապետությունում Հայաստանի Հանրապետության արտակարգ և լիազոր դեսպան (նստավայրը՝ Կահիրե) 

2021-2022թթ. Արաբական Միացյալ Էմիրություններում Հայաստանի Հանրապետության դեսպանության գործերի ժամանակավոր հավատարմատար

2022թ. հոկտեմբերի 6-ից Արաբական Միացյալ Էմիրություններում Հայաստանի Հանրապետության արտակարգ և լիազոր դեսպան (նստավայրը՝ Աբու Դաբի)։

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է: Համայնքի գործադիր մարմինը Ազգային վարչությունն է, որն ընտրվում է Թեմական մարմնի կողմից` 2 տարի ժամկետով: Գործադիր մարմինն ի պաշտոնե նախագահում է քահանա հայրը: Եկեղեցին ունի հոգեւոր մնայուն հովիվ, որը ծառայում է ԱՄԷ հայ համայնքին, ինչպես նաեւ պարբերաբար այցելում է Կատար եւ Բահրեյն: Իր հերթին Ազգային վարչությունը նշանակում է Թաղական խորհուրդ եւ դպրոցի հոգաբարձություն, ինչպես նաեւ տարբեր հանձնախմբեր, ըստ կարիքի: Պաշտոնական որևէ տեղեկություն հնարավոր չեղավ գտնել, թե նշանակման պահից ի վեր դեսպանատուն - համայնք համագործակցության ինչ օրինակներ և դրվագներ են առկա:

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Այս մասով պետք է նշել, որ հունվարի 24-ին տեղի է ունեցել դեսպան Կարեն Գրիգորյանի հանդիպումը ԱՄԷ մշակույթի և երիտասարդության նախարար Նուռա ալ-Քաաբիի հետ: Քննարկվել են երկկողմ մշակութային համագործակցությանն առնչվող մի շարք հարցեր: Բացի այդ, Գրիգորյանը հանդիպում է անցկացրել ԱՄԷ կրթության նախարար Ահմեդ Բելհուլ ալ-Ֆալասիի հետ: Հանդիպման ընթացքում քննարկվել են գիտակրթական ոլորտում երկկողմ փոխգործակցության վերաբերյալ մի շարք հարցեր: Փետրվարի 6-ին ԱՄԷ-ում ՀՀ դեսպան Կարեն Գրիգորյանը իր հավատարմագրերն է հանձնել ԱՄԷ փոխնախագահ, վարչապետ, Պաշտպանության նախարար և Դուբայի էմիրության կառավարիչ Մուհամմեդ բին Ռաշիդ ալ-Մաքթումին:

Ինչ վերաբերվում է հանրային դիվանագիտությանը, ապա այստեղ բացերն ավելի քան ակնհայտ են: Դեսպանատան պաշտոնական ֆեյսբուքյան էջում որպես կանոն ԱԳՆ տարածած ռելիզներն են, փաստացի այս ընթացքում դեսպան Գրիգորյանը հանդես չի եկել և ոչ մի հարցազրույցով, անդրադարձ չի կատարվել նաև Լաչինի միջանցքի ապօրինի շրջափակմանը: Փոխարենը՝ լայնորեն  լուսաբանվում են ՀՀ պետական պաշտոնյաների այցերը Միացյալ Էմիրություններ:

Թեև դեսպան Գրիգորյանն ընդամենը ամիսներ առաջ է նշանակվել տվյալ պաշտոնում, պետք է արձանագրենք, որ նրա կողմից դեռևս տեսանելի քայլեր չեն կատարվել: Համայնք-դեսպանատուն համագործակցությունը գտնվում է սաղմնային փուլում, իսկ քաղաքական իսթեբլիշմենթի հետ հանդիպումները կրում են որպես կանոն արարողակարգային բնույթ:

Շարունակելի...