Ինչ գործունեությամբ է աչքի ընկել Ավստրալիայում ՀՀ դեսպան Արեգ Հովհաննիսյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Ավստրալիայում ՀՀ արտակարգ և լիազոր դեսպան Արեգ Հովհաննիսյանի գործունեությանը: Վերջինիս կենսագրությունը բավական հարուստ է: 2001-2006թթ․աշխատել է Լիբանանի Հանրապետությունում ՀՀ արտակարգ և լիազոր դեսպան, 2006-2007թթ․` ՀՀ ԱԳՆ խորհրդական, 2007-2010թթ․` ՀՀ ԱԳՆ Ասիայի, Օվկիանիայի և Աֆրիկայի վարչության պետ, 2010-2013թթ․` ՀՀ ԱԳՆ Մերձավոր Արևելքի վարչության պետ, 2013-2017թթ․` Վիեննայում միջազգային կազմակերպություններում ՀՀ մշտական ներկայացուցչի տեղակալ, 2017-2021թթ․` ՀՀ ԱԳՆ Ասիայի, Օվկիանիայի վարչության պետ, 2021թ․ փետրվարի 16-ից Ճապոնիայում Հայաստանի Հանրապետության արտակարգ և լիազոր դեսպան (նստավայրը՝ Տոկիո):

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է: Ավստրալիայում ազգային կյանքը կազմակերպում են բազմաթիվ մշակութային, բարեգործական, մարզական ու երիտասարդական միություններ։ Հրատարակվում են հայերեն պարբերականներ (Գարուն, Լույս, Հույս, Արմենիա), գործում են թատերախմբեր, երգչախմբեր, հայկական ռադիոժամեր (Նոր սերունդի ձայն, Էրեբունի)։ 2002 թ.-ից Մելբուռնում գործում է Հայ արտ մշակութային կենտրոնը, որը կազմակերպում է հայ գեղանկարիչների և լուսանկարիչների ցուցահանդեսներ։ Հաշվի առնելով, որ Ավստրալիայում հայ համայնքը այնքան էլ բազմամարդ չէ՝ դեսպանատուն-համայնք համագործակցություն որպես այդպիսին առկա չէ: Սակայն, դեսպան Հովհաննիսյանի վերջին հանդիպումներից կարելի է առանձնացնել Նոր Զելանդիայի Օքլենդ քաղաք կատարած աշխատանքային այցելության շրջանակներում Նոր Զելանդիայի Հայկական Միության 25-ամյակին նվիրված միջոցառման մասնակցությունը:

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Սխալ կլինի ասել, որ դեսպանը հագեցած աշխատանքային հանդիպումների շարք  է ունենում ավստրալիացի  պաշտոնյաների հետ: Կարելի է ասել, որ այդ հանդիպումները հիմնականում կրում են արարողակարգային բնույթ:

Ինչ իրավիճակ է հանրային դիվանագիտության դաշտում: Այստեղ իրավիճակը շատ ավելի տխուր է:  Դեսպանատանպ պաշտոնական էջում կարելի է պարբերաբար հանդիպել համայնքի ծանուցման համար նախատեսված այս կամ այն իրադարձության ռելիզին, սակայն, ոչ ավելին

Դեսպանը որևէ կերպ հանրային հարթակներում չի անդրադարձել Ադրբեջանի կողմից սանձազերծած երկու պատերազմներին և Լաչինի շրջափակման թեմային: Դրա փոխարեն դեսպանատան էջում կարելի է գտնել ԱԳՆ նախարարի ելույթների ռելիզները, այն էլ՝ ֆրանսերենով։

Միևնույն ժամանակ, նշենք, որ դեսպան Հովհաննիսյանը իր անձնական ֆեյսբուքյան էջում կիսվել է Ավստրալիայի հայկական ազգային կոմիտեի գրառմամբ, որտեղ ոգեկոչվում էր սումգայիթյան ջարդերի զոհերի հիշատակը։