ՔՊ-ական պաշտոնյաների բիզնեսները՝ մինչ հեղափոխությունը և այսօր. Հովհաննես Հարությունյան

Շարունակելով ներկայացնել այն հեղափոխական պաշտոնյաներին, որոնց բիզնեսները կտրուկ ծաղկել են հեղափոխությունից հետո, այսօր կանդրադառնանք Շիրակի նախկին մարզպետ, տարածքային կառավարման փոխնախարար Հովհաննես Հարությունյանի ընտանեկան բիզնեսին:

Բարձրաստիճան ՔՊ-ականների, նրանց ընտանիքների հետ փոխկապակցված տարբեր ընկերություններ շարունակում են պետության հետ գնումների պայմանագրեր կնքել։ Տարածքային կառավարման և ենթակառուցվածքների փոխնախարար Հովհաննես Հարությունյանի ընտանիքին պատկանող «Շինկարկաս» ընկերությունը դեկտեմբերի 6-ին 67 մլն դրամի (ավելի քան 170 000 դոլար) համաձայնագիր է կնքել Շիրակի մարզպետարանի հետ։

Համաձայնագիրը կնքվել է Գյումրիի թիվ 41 հիմնական դպրոցի շենքի տանիքի վերանորոգման համար։ Վերանորոգվող տանիքի մակերեսը ավելի քան 3 800 քառակուսի մետր է։ Պայմանագրով նախատեսվում է աշխատանքներն ավարտել 90 օրվա ընթացքում։ Ըստ իրավաբանական անձանց էլեկտրոնային ռեգիստրի տվյալների՝ «Շինկարկաս»-ը հիմնադրվել է 1999 թվականին Հովհաննես Հարությունյանի հոր՝ Ավետիք Հարությունյանի կողմից Գյումրիում։ Ընկերության 70 տոկոսի բաժնետերը Հովհաննես Հարությունյանի եղբայրն է՝ Անուշավան Հարությունյանը, իսկ 30 տոկոսը պատկանում է մորը՝ Դշխուհի Հարությունյանին։ Քաղաքաշինության կոմիտեն «Շինկարկաս»-ին կապիտալ շինարարության բնագավառում գործունեություն իրականացնելու լիցենզիա է տվել։ Ընկերությունը ժամանակին ներգրաված է եղել նաև Ախուրյանում երկրաշարժի հետևանքով անօթևան մնացած մարդկանց համար բնակելի շենքերի կառուցման գործում։ Կառուցված շենքերի որակից քաղաքացիները դժգոհություն էին հայտնել։

2013 թվականին Շիրակի մարզպետարան մեկ անձից գնման ընթացակարգով Շինկարկաս ՍՊԸ-ից 11,277,436 դրամի ծառայություն է գնել՝ ընկերությունը կատարել է Գյումրու «Կարա-Մուրզայի անվան պետական երաժշտական քոլեջ» ՊՈԱԿ-ի պատուհանների փոխարինման աշխատանքներ:

«Շինկարկաս» ՍՊԸ-ն 11 մլն 620 հազար դրամով 2014-ին վերանորոգել է մարզի Հայկավան համայնքի դպրոցի տանիքը: 

Որևէ այլ կնքված պայմանագրի մասին այլևս հայտնի չէ:

Հովհաննես Հարությունյանի հորեղբորը՝ Հարություն Հարությունյանին է պատկանում «Հայկասար» ՍՊԸ-ն։ Պետեկամուտների կոմիտեի տվյալների համաձայն՝ «Հայկասար»-ը շենքերի ու շինությունների տեխնիկական հետազննության գործունեությամբ է զբաղվում։ Դեկտեմբերի 8-ին «Հայկասար»-ը ավելի քան 2 միլիոն դրամի պայմանագիր է կնքել Շիրակի մարզպետարանի հետ։ Պայմանագրով ընկերությունը պարտավորվել է տեխնիկական հսկողության խորհրդատվական ծառայություններ մատուցել Ախուրյանի Կրաշեն, Քեթի, Աշոցք համայնքի Արփենի, Ցողամարգ, Գեգհովիտ, Ամասիա համայնքի Ալվար և Գտաշեն բնակավայրերի դպրոցներում կատարված շինարարական աշխատանքների համար։

2020 թվականին էլ ընկերությունը պայմանագիր է կնքել Մարմաշենի համայնքապետարանի հետ՝ նույնպես կլորիկ գումար ստանալով։

Ինչպես «Շինկարկաս»-ի դեպքում, այստեղ էլ Հարությունյանների ընկերության հետ պայմանագիր կնքվել է գնանշման ընթացակարգի շրջանակում։ «Հայկասար»-ը տարբեր տարիների հաղթել է գնումների մրցույթներում։ 2013-ին Շիրակի մարզպետարանը այս ՍՊԸ-ից Հայկասար համայնքի դպրոցի վերանորոգման աշխատանքների որակի տեխնիկական հսկողության ծառայություններ է ձեռք բերել՝ 195 հազար դրամով:

Ինչպես տեսնում ենք՝ Հարությունյանի ընտանեկան բիզնեսը հեղափոխությունից հետո ոտքի է կանգնում, ինչը չի կարելի ասել շարքային քաղաքացիների բիզնեսների մասին, որոնց այս իշխանությունները ճնշում են դրակոնյան հարկերով և տուգանքներով: