ՔՊ-ական պաշտոնյաների բիզնեսները՝ մինչ հեղափոխությունը և այսօր. Հայկ Գևորգյան

Շարունակելով ներկայացնել այն հեղափոխական պաշտոնյաներին, որոնց հետ փոխկապակցված բիզնեսները կտրուկ ծաղկել են հեղափոխությունից հետո, այսօր կանդրադառնանք ՔՊ-ական պատգամավոր Հայկ Գևորգյանին:

Դիցուք՝ «Դարեսկիզբ» ՍՊԸ-ն, որը «Հայկական ժամանակ» օրաթերթի հրատարակիչ ՍՊԸ-ն է եղել, հեղափոխությունից հետո մի շարք պետական գերատեսչությունների մատակարարն է դարձել:

Մինչեւ պատգամավոր դառնալը «Դարեսկիզբ» ՍՊԸ-ի տնօրեն է եղել «Իմ քայլը» խմբակցության պատգամավոր Հայկ Գեւորգյանը: ՔՊ-ական պատգամավոր, իսկ այժմ շրջակա միջավայրի նախարար Հակոբ Սիմիդյանն էլ եղել է այդ ընկերության տնօրենի տեղակալը՝ 2009-2012թ-ին: Հատուկ ընդգծենք, որ վերը նշված անձինք չեն հանդիսացել ՍՊԸ-ի սեփականատեր, սակայն, տվյալ բիզնեսի հետ ակնհայտ կերպով առնչություն ունեցել են:

Այս ՍՊԸ-ի հետ կապված ուշագրավ փաստական տվյալներ ենք հայտնաբերում, երբ ուսումնասիրում ենք, թե ինչ պայմանագրեր է կնքել ու ինչքան եկամուտ ստացել: Մինչեւ այս ՍՊԸ-ի աշխատակիցների իշխանության գալը, ըստ ֆինանսների նախարարության գնումների Armeps.am համակարգի տվյալների, այն ունեցել է 150 հազար դրամի պայմանագիր, որով տպագրման ծառայություններ է մատուցել ՏՄՊՊՀ-ին:

Իսկ արդեն հեղափոխությունից հետո՝ պայմանագրերի ընդհանուր գումարը կազմել է մոտ 2 մլն դրամ: 2019-ին 1 մլն դրամից ավելի պայմանագիր է կնքել, այս տարի արդեն 840 հազար դրամի է կնքել: Ու այս ընթացքում այս «իշխանամերձ» ընկերությունն սկսել է թերթերում, մամուլում հայտարարությունների տպագրման ծառայություններ մատուցել ՀՀ գլխավոր դատախազության, պետգույքի կառավարման կոմիտեի, էկոնոմիկայի նախարարության պատվերով, ընդ որում, այդ պայմանագրերից 3-ը մեկ անձից կատարված գնման ընթացակարգով է եղել:

ՍՊԸ-ի հիմնադիրն է «Ժողովրդավարական հայրենիք» կուսակցության նախագահ Պետրոս Մակեյանը, որի հետ ՀԱԿ-ում թիմակից է եղել Նիկոլ Փաշինյանը: Ներկայումս այդ ՍՊԸ-ի տնօրենի պաշտոնը զբաղեցնում է «Քաղաքացիական պայմանագիր» կուսակցության անդամ Արուսյակ Մանավազյանը, որը նաեւ ԱԺ ընտրություններում ՔՊ-ի նախընտրական ցուցակում 112-րդ համարն էր:

Ինչ վերաբերում է գործարքների գումարին, պայմանագրերից մեկով այն տեղեկատվական նյութեր է տպագրել ավելի քան 918 հազար դրամի՝ այն ժամանակ Տնտեսական զարգացման եւ ներդրումների նախարարության ներքո գտնվող պետգույքի կառավարման կոմիտեի պատվերով: