Թիմակիցներից հաջորդիվ ում է «զոհաբերելու» Նիկոլ Փաշինյանը

Հեղափոխությունից հետո հետևելով Նիկոլ Փաշինյանի վարքած քաղաքականությանն իր իսկ յուրայինների և թիմակիցների հանդեպ` կարելի  է անել եզրակացություն, որ վերջինս սեփական իշխանությունը պահպանելու համար պատրաստ է զոհաբերել անգամ նրանց: Դա ապացուցվում է կոնկրետ օրինակներով, երբ Նիկոլ Փաշինյանը, խնդիր ունենալով ջրից չոր դուրս գալ այս կամ այն հարցում, կամ փորձելով վերջիններիս լոյալության դաս տալ, առանց վարանելու սլաքները թեքել է դեպի իր թիմակիցները` ժերտվա տալով հենց նրանց:

Դիցուք՝ օղակը ՀՀ առողջապահության նախկին նախարար, այժմ ԱԺ ՔՊ խմբակցության պատգամավոր Արսեն Թորոսյանի շուրջ սեղմվում է: Չի բացառվում, որ Թորոսյանն առաջիկայում ձերբակալվի: Երկու օր առաջ նախաքննական մարմինը՝ Հակակոռուպցիոն կոմիտեն, ձերբակալեց Երեւանի փոխքաղաքապետ Գեւորգ Սիմոնյանին, քանի որ Սիմոնյանը առողջապահության նախարար Արսեն Թորոսյանի օրոք նրա տեղակալն էր:  Շղթան այսքանով չի ավարտվում: Հարցաքննվել են նաեւ 5 հիվանդանոցի տնօրեններ, որոնք Քովիդով հիվանդների են սպասարկել: Հարցաքննվել են նաեւ առողջապահության արդեն նախկին նախարար Թորոսյանի աշխատակազմի երեք ղեկավարները, որոնցից Լուսինե Քոչարյանը եւ Ծաղիկ Վարդանյանն անգամ առերեսվել են: Ավելին՝ ըստ մամուլում առկա տեղեկությունների՝ իրավապահները Թորոսյանի գործունեության շուրջ միայն Քովիդի գործընթացով չէ, որ բացահայտումներ են արել:

Հաջորդ պոտենցիալ «զոհը» սոցապ նախկին նախարար Զարուհի Բաթոյանն է: Դատախազությունն ուսումնասիրել է եւ պարզել, որ 2020 թվականից հետո մանկատան նախկին սաներին պետական ծրագրով բնակարան ապահովելու ընթացքում եղել են չարաշահումներ։ Քեական գործ է հարուցվել «Պաշտոնեական անփութություն» հոդվածով (ՀՀ քրեական օրենսգրքի 315- րդ հոդվածի 1-ին մաս)։ Պարզվել է, որ ցուցակում ներառված անձանցից 1-ը մահացել է 2018 թվականին, 27 հոգի գտնվել է ՀՀ-ից դուրս, 47-ի բնակվելու փաստը կասկածի տակ է, 6 շահառու ունի սեփականության իրավունքով գրանցված գույք եւ այլն: Մեկ այլ հնչեղ քրեական գործ էլ վերաբերվում էր տարեցների խնամքի տների ձախողված ծրագրին: Շուկայականից զգալի թանկ գնված այս տների գործարքն իրականացվել է ՔՊ-ական Զարուհի Բաթոյանի պաշտոնավարման տարիներին, հիմա նա պատգամավոր է:

Փաշինյանը կարող է թիրախավորել նաև պատգամավոր Կարեն Համբարձումյանին:  Բանն այն է, որ «Սիսիանի բնակարանային կոմունալ տնտեսություն» ՀՈԱԿ-ի տնօրենը հայտնվել է իրավապահների ուշադրության կենտրոնում, Սիսիանի ոստիկանությունը Հակակոռուպցիոն կոմիտեին է փոխանցել հիմնարկի ղեկավար Դավիթ Մարգարյանի՝ պաշտոնեական լիազորությունները չարաշահելու վերաբերյալ նյութեր, մասնավորապես՝ ՀՈԱԿ-ին պատկանող ավտոմեքենաները, առանց պայմանագիր կնքելու, վարձակալությամբ տարբեր անձանց է տվել, իսկ ստացված գումարը յուրացրել։ Մարգարյանի ցուցումով, առանց որեւէ պայմանագրի, Սիսիան համայնքի Դարբաս եւ Շամբ բնակավայրերի բնակիչներից 2022թ. մարտ ամսից գանձվել է աղբահանության գումար՝ 1 անձի հաշվարկով 100 դրամ, որոնք ՀՈԱԿ-ի բյուջե չեն մուտքագրվել եւ կրկին յուրացվել են ղեկավարի կողմից։ Ուշագրավ է, որ Դավիթ Մարգարյանը ՔՊ-ական պատգամավոր Կարեն Համբարձումյանի մտերիմն է, հարազատը: Մարտի 26-ին նշանակված Սիսիանի ՏԻՄ ընտրություններին ընդառաջ այս գործընթացը տարակուսանք է առաջացրել տեղի իշխանականների շրջանում: Փաստացի փորձ է արվում ջլատել իշխանական թիմը՝ նրանց պահելով իրավապահների ուշադրության կենտրոնում, մինչդեռ ենթադրվում էր, որ հակառակը պետք է լիներ, քանի որ միայն համախմբման դեպքում է հնարավոր իշխանությունը գոնե երկրորդ փորձից հետո վերցնել Սիսիանում։

Հաջորդ թիրախի դերում կարող է հայտնվել նաև էկոնոմիկայի նախարար Վահան Քերոբյանը: Շաբաթներ առաջ  ԱԺ-ում քննարկվել են  ՀՀ հաշվեքննիչ պալատի կողմից ՀՀ էկոնոմիկայի նախարարությունում ՀՀ 2021 թվականի պետական բյուջեի վեց ամիսների կատարման հաշվեքննության արդյունքների վերաբերյալ ընթացիկ եզրակացությունները: Կառույցի կողմից, մասնավորապես, ուսումնասիրվել է կորոնավիրուսի տնտեսական հետևանքների չեզոքացման հետևանքով տրամադրված վարկերի տոկոսադրույքների սուբսիդավորման ծրագրի շրջանակներում ներկայացված հաշվետվությունը: Ըստ այդմ, հաշվետվության մեջ առկա է եղել խեղաթյուրում՝ 1.249.486 հազար դրամի չափով: էկոնոմիկայի ոլորտում պետական քաղաքականության մշակման, ծրագրերի համակարգման եւ մոնիթորինգի ոլորտում առկա է խեղաթյուրում՝ կապված նախարարության կողմից տրված պարգեւավճարների, ինչպես նաեւ հսկողության գործընթացի թերացում՝ կապված թափուր հաստիքների հետ, մասնավորապես՝ քաղաքացիական ծառայության պաշտոնը թափուր մնալուց հետո՝ երեք ամսվա ընթացքում, պետք է հայտարարվեր մրցույթ, ինչը չի իրականացվել: Այլ անհամապատասխանություններ եւս եղել են, որոնց մասին մանրամասն ներկայացված է 57 էջից բաղկացած եզրակացության մեջ:

Ի՞նչ խնդիր է լուծում Նիկոլ Փաշինյանը՝ թիրախավորելով յուրայիններին: Մի կողմից՝ նա իր աջակիցներին և ինչու ոչ միջազգային հանրությանը փորձում է ցույց տալ, որ իրավապահների թիրախում են հայտնվում ոչ միայն ընդդիմադիր հայացքներ ունեցող  պաշտոնյաները, այլ նաև հեղափոխության ակնառու մասնակիցները՝ իր թիմակիցներն ու յուրայինները: Մյուս կողմից՝ սա հենց մեսիջ է վերջիններին, որպեսզի ամրանպդեն իրենց լոյալությունը և գտնվեն դատվելու մշտական վախի մեջ: