Տոկիոյում սակուրան ծաղկել է (լուսանկարներ, տեսանյութ)

Երեքշաբթի օրը Տոկիոյում պաշտոնապես մեկնարկել է սակուրայի (բալենու) ծաղկման սեզոնը: Այս մասին հայտարարել է Օդերևութաբանության ազգային վարչությունը, որն արձանագրում է սեզոնի սկիզբը Տոկիոյի Յասուկունի սինտոյական տաճարի հատուկ «հսկիչ» ծառի օրինակով։

Ընդգծվում է, որ այս տարի սակուրայի ծաղկման սեզոնը սկսվել է միջինից 10 օր շուտ և 2020-ի և 2021-ի հետ մեկտեղ դարձել է ամենավաղը՝ 1953 թվականից ի վեր։

Տոկիոյում սակուրայի ծաղկման սեզոնը պաշտոնապես սկսվում է, երբ առաջին հինգ ծաղիկները բացվում են մայրաքաղաքի կենտրոնում գտնվող հատուկ «հսկիչ» ծառի վրա։ Դրան ուշադրությամբ հետևում են Ճապոնիայի Օդերևութաբանական վարչության մասնագետները, որոնք մարտի սկզբից ստուգում են բալի բոլոր այգիները: Այս տարի, ամենայն հավանականությամբ, տեղի բնակիչների համար ավանդական տոնակատարությունների սահմանափակումներ չեն լինի այգիներում և հասարակական վայրերում, որտեղ ծաղկում է սակուրան, քանի որ Ճապոնիայում նոր կորոնավիրուսի տարածումը գործնականում մարել է։

Ճապոնիայում հինգ թերթիկներով բալի ծաղիկը ոչ պաշտոնական ազգային զինանշանի կարգավիճակ ունի: Հեռավորարևելյան բալի լիարժեք ծաղկման ժամանակը կլինի ապրիլին, երբ երկրի այգիները բառացիորեն կթաղվեն վարդագույնի բոլոր երանգների ծաղիկների ծովում: Այս պահին տեղացիների ու զբոսաշրջիկների բազմությունը հավաքվում է այնտեղ՝ ծառերի տակ խնջույքներ կազմակերպելու։

Սակուրայի մասին առաջին հիշատակումը ճապոնական գրականության մեջ հայտնվել է 712 թվականին: Երկրի մշակույթում բալենու ծաղկումը կապված է թախիծի մի փոքր զգացողության հետ և հիշեցնում է գեղեցկության անցողիկությունը: Ընդհանուր առմամբ, Ճապոնիայում կա սակուրայի հինգ հիմնական տեսակ և առնվազն 200 հիբրիդային տարատեսակներ: