Զարեհ Սինանյանի տապալված 2022-ը. ինչ «տիտանական» աշխատանք է կատարել հանձնակատարը

Վերլուծական 16 Մարտ, 2023 23:40

Սփյուռքի գործերի գլխավոր հանձնակատար Զարեհ Սինանյանը որոշել է հաշվետու լինել նախորդ տարի կատարած իր աշխատանքների մասին: Պարզվում է՝ նրա գլխավոր ձեռքբերումը կայանում է անցկացված սկանդալային համաժողովը կազմակերպելու, տասնյակ սփյուռքահայ ուսանողների ուսման վարձը փոխհատուցելու մեջ: Եվ, իհարկե, նրանում, որ 25 հազար հոգի է դիմել ՀՀ քաղաքացիություն ստանալու համար: Այս վերջին կետը, թերևս, կարելի է մի կողմ դնել, պարզից էլ պարզ է, որ այդ անձանց մեծ մասը ՌԴ քաղաքացիներն էին, ովքեր հանգրվանել են Հայաստանում՝ Ուկրաինայում ծայր առած ռազմական գործողությունների ֆոնին:

Բուն համաժողովը, որով այդքան հպարտանում է Սինանյանը, այլ կերպ, քան սկանդալային չես անվանի: Սինանյանը, ով վերջերս առաջարկում էր Հայաստանը արաբների հայրենիքի վերածել, իր իսկ կողմից կազմակերպված համաշխարհային հայկական համաժողովի ընթացքում էլ ավելի դարակազմիկ միտք է արտահայտել՝ ոչ ավել, ոչ պակաս պատերազմի պարտության մեջ մեղադրելով աշխարհի բոլոր հայերին: Նրա կարծիքով՝ եթե սփյուռքը լուռ է եղել, տեսել է, որ կոռուպցիա է եղել, տեսել են, որ մարդիկ միլիոնով հեռանում են երկրից, կարող կադրերը հեռանում են երկրից, տեսնում են, որ բանակում անասելի պայմաններ են, չի կարող նման բանակը դիմագրավել 21-րդ դարի մարտահրավերին, տեսել ու լռել են, ու եթե այս ամենը տեսնելով՝ գնացել են նկարվել են, հանդիպել, ուրախացել են, հետո վերադարձել են սփյուռք եւ հայհոյել նույն ղեկավարներին, ուրեմն մեղք ունեն։ Թե որքանով սփյուռքի հայկական կառույցները պետք է տեղյակ լինեին բանակում տիրող իրական վիճակին, պետական համակարգում առկա կոռուպցիային՝ իհարկե մեծ հարց է, եթե անգամ Սինանյանի քաղաքական ղեկավար Նիկոլ Փաշինյանն է պնդում, որ մինչև պատերազմը վստահ էր, որ բանակում ոչնչի կարիք չկա, բանակն էլ տարածաշրջանում մշտապես, կրկնում էր՝ մշտապես, ամենամարտունակն է եղել: Սակայն, նման դարակազմիկ մտքեր լսելուց հետո անգամ զարմանալու էլ չէր, որ սփյուռքի մի շարք առանցքային կառույցներ և անգամ կաթողիկոսները նախընտրել էին մաս չկազմել այդ համաժողովին:

Բացի վերը նշված անչափ կասկածելի ձեռքբերումներից, 2022 թվականին շարունակվել են սփյուռքի մարդկային ներուժի վերաբերյալ ուսումնասիրությունները, հավաքագրվել է ավելի քան 20 ոլորտում ներգրավված սփյուռքահայ 25.000 բարձրակարգ մասնագետների եւ գործիչների վերաբերյալ տեղեկատվություն: Թե ինչ նպատակով է այդ տեղեկությունը հավաքագրվել և ինչ պրակտիկ նշանակություն է ունենալու՝ նույնպես հասկանալի չէ:

Այս տիտանական աշխատանքներին զուգահեռ՝ Սինանյանը հասցրել է օրենքի նախագիծ էլ մշակել: Մշակվել է «Հայրենադարձության մասին» օրենքի նախագիծը, որի վերաբերյալ երկու քննարկում է կազմակերպվել ՀՀ ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովում: Օրինագիծը լրամշակվել է՝ համաձայն ստացված առաջարկությունների: Նախատեսվում է առաջիկայում շրջանառել օրենքի նախագծի լրամշակված տարբերակը:

Զարմանալի է, որ հանձնակատարն իր նախորդ տարվա կատարած աշխատանքի հաշվետվության մեջ չի ներառել տասնյակ գործուղումները, որոնց տված պտուղների մասին այդպես էլ հանրությունը չտեղեկացվեց, գուցե այն պարզ պատճառով, որ այդ պտուղները պարզապես չկային: