Նախկին գործարար պաշտոնյաների բիզնեսները՝ մինչ հեղափոխությունը և այսօր. Վարդան Հարությունյան

Թե նախկին կառավարության, թե հեղափոխական կառավարության արտոնյալ բիզնեսների շարքում էր ՊԵԿ նախկին նախագահ Վարդան Հարությունյանի ընտանեկան բիզնեսը: Դեռ Հովիկ Աբրահամյանի կառավարությունն էր երկու հարկային արտոնություն տրամադրեց «Գրին ֆարմեր» ՍՊԸ-ին: Առաջին որոշմամբ՝ 630 մլն դրամ ընդհանուր արժեքով 132 տեսակի իտալական ապրանք ազատվում է ներմուծման մաքսատուրքից: Հիմնավորման մեջ ասվում է, որ դրանք ներկրվում են ոչ ԵՏՄ երկրներից, քանի որ ԵՏՄ անդամ-երկրների տարածքում անհրաժեշտ քանակության և որակի ապրանքներ չկան։ Գյուղատնտեսական այս ծրագրով նախատեսվում է 1,4 մլրդ ՀՀ դրամի ներդրում, 250 սեզոնային աշխատատեղ՝ 120 000 ՀՀ դրամ միջին աշխատավարձով։ 4-րդ տարում արտադրանքը կհասցնի 733 մլն 100 հազար դրամի և կիրացնի կես-կես՝ Հայաստանում և ԵՏՄ-ում: Երկրորդ հարցով էլ հարկային արտոնությունը վերաբերում էր ապրանք ներմուծելիս ԱԱՀ գումարների վճարման ժամկետը երեք տարով հետաձգելուն: 

 

Ընկերությունը արտոնյալ է նաև հեղափոխությունից հետո: Նիկոլ Փաշինյանի կառավարությունը 2020-ի մայիսի 22-ից մինչեւ 2021-ի դեկտեմբերի 31-ը ներառյալ ներմուծվող ապրանքների համար ավելացված արժեքի հարկի վճարման ժամկետը այս ընկերության համար հետաձգել էր 3 տարի ժամկետով: 

 

Այս ընկերության բողոք դիմումները բավարարում է անգամ ՊԵԿ-ը։

 

Այս ընկերության լոբբինգով զբաղվում էր անգամ Արարատի նախկին մարզպետ Գարիկ Սարգսյանը, ով ընկերության ղեկավարության հետ PR արշավների շրջանակներում բերքահավաքի էր մասնակցում։

 

2019-ին Հրազդանի համայնքապետարանը ուղղակի վաճառքով վաճառել է համայնքի սեփականություն հանդիսացող հողամասերը։

 

 

Հեղափոխությունից հետո տարածվեց տեղեկություն, համաձայն որի՝ Վարդան Հարությունյանը դատական հայց է ներկայացրել ընդդեմ «Հետաքննող լրագրողներ» ՀԿ-ի։ ՊԵԿ նախկին նախագահը պահանջում էր հերքել «ՀԴՄ-ները կառավարության գաղտնի որոշումով ձեռք են բերվել բարձր արժեքով. հարուցվել է քրեական գործ» հոդվածում զրպարտություն համարվող տվյալները՝ հրապարակելով պատասխանը, ինչպես նաև «Հետաքննող լրագրողներ»-ից հօգուտ Վարդան Հարությունյանի բռնագանձել 1 դրամ՝ որպես փոխհատուցում։ Մասնավորապես՝ ՊԵԿ նախկին նախագահը պահանջում է հերքել «Հետքի» օգոստոսի 7-ի  հրապարակումը, որի համար հիմք է հանդիսացել ՊԵԿ-ի տարածած հաղորդագրությունը։ Մասնավորապես՝ այն վերաբերում է ՀԴՄ-ների ձեռքբերմանը, որով ՊԵԿ-ը հայտնել էր. «Հսկիչ-դրամարկղային մեքենաների ձեռքբերման համար ՀՀ կառավարության կողմից ավել գումար է հատկացվել, ինչը եղել է ակնհայտ անշահավետ գործարք Հայաստանի Հանրապետության համար»։ Հիշեցնենք, որ ամիսներ շարունակ «Հետք»-ը չէր կարողանում ՊԵԿ-ից ստանալ Հսկիչ դրամարկղային մեքենաների (ՀԴՄ) գնման պայմանագրերը, քանի որ կոմիտեն հղում էր կատարում «Պետական և ծառայողական գաղտնիքի մասին» օրենքին։ Պատճառաբանում էր, որ դրանք համարվում են այնպիսի տեղեկություններ, որոնց հրապարակումը կարող է ծանր հետևանքներ առաջացնել Հայաստանի անվտանգության համար: Ավելորդ է նաև ասել, որ պատկան մարմինները անգամ չուսումնասիրեցին այս տեղեկությունը ճշտելու համար՝ արդյոք Վարդան Հարությունյանն իսկապես նոր յուղոտ բիզնես է հիմնել, թե սա պարզապես լրագրողական երևակայության արգասիք է:

 

Ուշագրավ է, որ 2016 թվականին Նիկոլ Փաշինյանի ընտանիքին պատկանող կայքը նյութ էր հրապարկել, որում կասկածի տակ էր դնում Հարությունյանին պատկանող անշարժ գույքի օրինականությունը: Մասնավորապես՝ նշվում էր, որ Վարդան Հարությունյանի կինը 789 միլիոն դրամով (1.6 միլիոն դոլար) ձեռք է բերել անշարժ գույք Ազատության պողոտայում՝ նախկին վարչապետ Հովիկ Աբրահամյանի շքեղ առանձնատան մոտակայքում: Հեղափոխությունից հետո իշխանությունները, կարծես թե, մոռացել են 2016-ին իրենց իսկ կողմից բարձաձայնված մտահոգությունների մասին, իսկ Հարությունյանի ընտանիքին պատկանող բիզնեսը շարունակում է մնալ արտոնյալների շարքում: