Նիկոլ Փաշինյանը Երևանը «հանձնում» է արևմուտքին

Երեկվանից ակտիվորեն լուրեր են պտտվում, որ հրաժարականի դիմում է պատրաստվում ներկայացնել Երևանի քաղաքապետ Հրաչյա Սարգսյանը: Նախորդ տարվա ընթացքում արտահերթ ընտրությունների թեման հաճախ էր օրակարգ բարձրանում, սակայն իշխանությունները չգնացին ռիսկի՝ հաշվի առնելով սոցհարցումները, համաձայն որոնց, ՔՊ թեկնածուն՝ նախկին փոխվարչապետ Տիգրան Ավինյանը, հաղթելու մեծ շանսեր չուներ, պետք էր նրա դիրքերն ամրացնել։ Այդ նպատակով անցած տարվա սեպտեմբերի 23-ին Ավինյանը նշանակվեց Երեւանի փոխքաղաքապետ, թեեւ, իրականում, նա է այժմ դե ֆակտո քաղաքապետը՝ ինքն է որոշում կադրային եւ մյուս բոլոր հարցերը՝ միևնույն ժամանակ ակտիվորեն ներգրավված լինելով քարոզարշավի մեջ:

Սարգսյանին ասպարեզից հեռացնելով Նիկոլ Փաշինյանը ներքաղաքական խնդիր է լուծում՝ առավել հարմարավետ պայմաններ ստեղծելով Տիգրան Ավինյանի նախընտրական PR-ի և ընդհանրապես գործունեության համար: Բանն այն է, որ Սարգսյանը քաղաքապետի պաշտոնում ակնհայտորեն խանգարում էր Ավինյանին: Վերջինս, շռայլելով բազմաթիվ խոստումներ, ըստ էության, դրանք իրականացնելու լծակներ չուներ և շատ դեպքերում անգամ Հրաչյա Սարգսյանը պարզապես առկախում էր Ավինյանի տված այս կամ այն խոստումը: Մոտեցումների միջև տարբերությունը զգացվեց անգամ Տիգրան Ավինյանի համար առանցքային PR նշանակություն ունեցող պրոյեկտի՝ Աջափնյակի մետրոյի կառուցման հարցի քննարկման ժամանակ:  Sputnik Արմենիա-ի հետ զրույցում 50 մլն եվրո արժողությամբ մետրոյի կայարանի կառուցումը Սարգսյանը «ներկա պահին ճոխություն» էր համարել։ Սարգսյանը նշել էր, որ ինքը համատեղությամբ նաև Երևանի մետրոպոլիտենի խորհրդի անդամ է և խնդիրներին ծանոթ է բավական մանրամասն, ասել է թե՝ ակնարկելով, որ Ավինյանը պոպուլիզմով  է զբաղվում: Ի պատասխան դրա՝ Ավինյանը գրառում էր արել՝ նշելով, որ ի հեճուկս բոլոր թերահավատների՝ մետրոյի նոր կայարանը կառուցվելու է: Թերահավատների շարքում նա, թերևս, նկատի ուներ նաև Հրաչյա Սարգսյանին:

Ներքաղաքական խնդիր լուծելուց զատ, Փաշինյանի այս «ռակիրովկան» անշուշտ մեսիջ էր նաև դրսի խաղացողներին, մասնավորապես՝ արևմուտքին: Ուշագրավ է, որ Սարգսյանին քաղաքական հորիզոնից հեռացնելու այս որոշումը կայացվեց անմիջապես այն բանից հետո, երբ պաշտոնական Մոսկվան, ի դեմս ԱԳՆ խոսնակ Մարիա Զախարովայի, արձագանքեց Փաշինյանի՝ վերջին ասուլիսի ժամանակ հնչեցրած մի շարք հայտարարություններին, մասնավորապես նրանց, որոնք վերաբերվում էին ՝ Մոսկվայի՝ ԼՂՀ անվտանգության միակ երաշխավոր լինելուն:  «Երբ ես կարդացի սա՝ չգիտես ինչու՝ հիշեցի երկու այլ մեջբերում ՝ «Ով ում վրա էր կանգնած» (Բուլգակով) և «Պետք է սիրել արվեստը քո մեջ, այլ ոչ թե ինքդ քեզ արվեստում» (Ստանիսլավսկի)։ Ես հարցի այս մասը թողնում եմ ձեր հետագա մշակման համար, փորձեք հասկանալ, թե ինչի մասին է խոսքը», - ասել է Զախարովան։ Ռուս դիվանագետը նաև ընդգծել է, որ Հայաստանի ղեկավարության հայտարարությունները պաշտոնական Մոսկվան դիտարկում է որպես «հոկտեմբերին Եվրամիության հովանու ներքո անցկացված Պրահայի գագաթնաժողովում վերցված գծի շարունակություն»: Ակնհայտ է, որ Զախարովան Փաշինյանին մեղադրում է ՌԴ միջնորդական ջանքերը մերժելու և արևմուտքի հետ «սիրախաղ» անելու մեջ:

Մոսկվայի ահա այս կոշտ արձագանքից ժամեր անց դաշտում հայտնվեց Հրաչյա Սարգսյանի սպասվող հրաժարականի մասին լուրը: Փաստացի, Փաշինյանը արագացնում է պրոցեսները և Ավինյանին առաջին պլան բերելով՝ մեսիջ հղում արևմուտքին: Գաղտնիք չէ, որ Տիգրան Ավինյանը համարվում է արևմուտքի համար ընդունելի և պրո-արևմտյան դիրքորոշում ունեցող պաշտոնյա․ վերջինս հեղափոխությունից հետո և հատկապես փոխվարչապետ եղած ժամանակ բավական լոյալ էր վերաբերվում արևմտյան և հատկապես ՝այսպես կոչված «սորոսական» ՀԿ-ին՝ նրանց արտոնություններ տրամադրելով և հարկերից ազատելով: 

Կարող ենք փաստել, որ այս քայլը Փաշինյանի հերթական ռևերանսն է արևմուտքին և հաջորդել է Մոսկվայի՝ իր հասցեին հնչած բավական կոշտ քննադատություններին: Ըստ էության՝ Փաշինյանը Երևանը «հանձնում» է արևմուտքին. թե ինչպես այս քայլին կարձագանքի Մոսկվան՝ ցույց կտա ժամանակը: