Սյունիքում ՔՊ-ականների միջև «մենամարտերը» շարունակվում են

Սյունիքի մարզպետ Ռոբերտ Ղուկասյանը վերջին հարցազրույցներից մեկում անդրադարձ է կատարել մեկ տարվա կատարված աշխատանքին և ներկայացրել համառոտ հաշվետվություն: Սակայն, այսօր կցանկանանք կանգ առնել ոչ այնքան մարզպետի աշխատանքային գործունեության վրա, որքան մարզպետարանի կողմից՝ մեկ անձից կատարված գնումների և իհարկե ամենաակտուալ հարցի՝ Սյունիքում ՔՊ-ականների միջև շարունակվող մենամարտերի վրա:

Դիցուք՝ Սյունիքի մարզպետարանը 2,430,000 դրամի դպրոցականների ամառային հանգստի կազմակերպում և տրանսպորտային ծախսերի փոխհատուցման ծառայություններ է ձեռք բերել «ԿԱՐԵՆ-ԳԱՐԻԿ» ՍՊԸ-ից: 350,000 դրամի ավտոմեքենայի վերանորոգման ծառայություն է ձեռք բերվել Ա/Ձ ՎԱԼԵՐԻԿ ՈՍԿԱՆՅԱՆ-ից: 1,494,000 դրամի դրոշներ են ձեռք բերվել Ա/Ձ Թամարա Պողոսյանից: 135,000 դրամի հուշանվերներ են ձեռք բերվել «Վեգա Ուորլդ» ՍՊԸ-ից։ 991,000 դրամի պաշտոնական պատվիրակության ընդունելության շրջանակում ճաշկերույթի կազմակերպման ծառայություններ են գնվել «ՍԻԼԿ ՌՈՈՒԴ-ՍՊԸ»-ից: 438,000 դրամի ծառայություն է գնվել «ՍՅՈՒՆԷԴ» ՍՊԸ-ից: 468,435 դրամի տնտեսական ապրանք է գնվել  Ա/Զ Ծովինար Գևորգյան Լենդրուշից: 

Ամիսներ առաջ մամուլը գրել էր, որ Սյունիքի մարզպետ Ռոբերտ Ղուկասյանի եւ մարզից ընտրված ՔՊ-ական 5 պատգամավորների միջեւ կապը չի ստացվում։ Պատգամավորները չեն հաշտվում Փաշինյանի որոշման հետ, որ մարզպետի պաշտոնին կարգել է իր խորհրդականին, որը ՔՊ-ական չէ։

Ինչպես երևում է` Սյունիքից ընտրված ՔՊ-ական պատգամավորները որոշել էին կոալիցիա կազմել ընդդեմ Ղուկասյանի, իսկ դա իր հերթին նշանակում էր ընդդիմանալ ոչ թե Ղուկասյանին, այլ նրան նշանակող Նիկոլ Փաշինյանի կամքին և քաղաքական որոշմանը: Փաստացի, քաղաքական պայքարը տարատեսակ լծակների համար ՔՊ-ի ներսում այնքան է սրվել, որ բանը հասել է անգամ Փաշինյանի նշանակած կադրերի ոտքի տակ փորելուն:  Վերը նշված խորհրդարանականների կոալիցիան, ըստ էության, ղեկավարում է Սյունիքի նախկին մարզպետ Արմեն Խաչատրյանը, ով չի հաշտվել մարզպետի պաշտոնը կորցնելու մտքի հետ:

Նրա հարաբերությունները այնքան էլ հարթ չէին Սյունիքի նախորդ ՔՊ-ական մարզպետների հետ և արդյունքում՝ Փաշինյանը փոխարինեց նրանցից վերջինին՝ Մելիքսեթ Պողոսյանին ոչ ՔՊ-ական Կալավանցի Ռոբերտ Ղուկասյանով, սակայն այստեղ էլ ՔՊ-ականները համաձայն չեն, քանի որ Ղուկասյանը որոշել է վարել ինքնուրույն քաղաքականություն և չի համաձայնեցնում իր որոշումները սյունեցի պատգամավորների հետ: Արդյունքում՝ էականորեն տուժում է մարզը:   Սյունիքի հարցերով միջգերատեսչական աշխատանքային խմբի ֆինանսավորման հարցը երկար ամիսներ օդում կախված էր մնացել:

Սա միակ թեժ պայքարը չէ Սյունիքում՝ ՔՊ տարբեր թևերի միջև: Մամուլը վերջերս գրել էր, որ «Քաղպայմանագրի» Սիսիանի կառույցում երկու թեւի են բաժանվել եւ, կարելի է ասել, պատերազմում են իրար դեմ: Մի թեւը համակարգում է Ներսես Խաչատրյանը, ակտիվ կուսակցական Արսեն Ավագյանը եւ ուղնուծուծով այլ ՔՊ-ականներ: Մյուս թեւը՝ նախկինների ճամբարից հեռացած Կարեն Համբարձումյանը՝ իր թիմով: 

ՔՊ-ականների շրջանում խորհրդի նախագահի պաշտոնի համար ևս շաբաթներ առաջ թեժ մրցակցություն կար։ ԱԺ պատգամավոր Դավիթ Դանիելյանը, որ վարչապետի աշխատակազմի ղեկավար Արայիկ Հարությունյանի մտերիմն ու սանիկն է, հավակնում էր ոչ միայն այդ պաշտոնին, այլեւ՝ առաջնորդել մարզի կուսակտիվին։ Ըստ մամուլի՝ նա մարզպետական հավակնություններ էլ ունի։ Ի դեպ, նրա մրցակիցը հարազատ զարմիկն էր՝ Նարեկ Բաբայանը, որը նախկինում Սյունիքի փոխմարզպետ էր նշանակվել, իսկ ամիսներ առաջ գործուղվեց ԶՊՄԿ։  Բանն այն է, որ կուսակցության բարձրագույն մարմնից՝ վարչությունից հետո խորհուրդն է լինելու այն կառույցը, որի անդամները հնարավորություն կունենան, թեկուզ ձեւականորեն, մասնակցել որոշումների կայացմանը կամ գոնե մոտիկ գտնվել վերեւներին, կարճ ասած՝ համարում են կարեւոր լծակ։ Բացի այդ, խորհրդի նախագահի կարգավիճակը կշիռ ու ազդեցություն է տալիս տվյալ տարածքում։ Արդյունքում, սակայն, անակնկալ գրանցվեց և խորհրդի նախագահ ընտրվեց Նարեկ Հարությունյանը:

Ի դեպ, կալավանցի Ռոբերտ Ղուկասյանն իր հերթին կոնտր քայլեր է անում, դիցուք նա փոխմարզպետի պաշտոնը տվել է ոչ թե ՔՊ-ականներից մեկին, այլ լրագրող Նարե Ղազարյանին, ով հայտնի է Նիկոլ Փաշինյանին քննադատելով: Ղուկասյանը նաև ամեն կերպ փորձում է ընդգծել, որ եթե Փաշինյանի ընտրությունը կանգ է առել իր վրա, ապա ՔՊ-ականները պետք է այդ փաստի հետ հաշտվեն: