Ինչու Նիկոլ Փաշինյանը չի «կտրում» ընտրությունը կեղծելու մեջ կասկածվողների «ձեռքերը»

Հեղափոխությունից անմիջապես հետո Նիկոլ Փաշինյանը հայտարարում էր, որ Հայաստանը փակել է ընտրակեղծիքների ամոթալի էջը, իսկ արդեն 2021-ի խորհրդարանական արտահերթ ընտրությունների նախաշեմին հայտարարել էր, որ կկտրի յուրաքանչյուրի ձեռքը, ով կհանդգնի ընտրակեղծիք կատարել:

Չնայած Փաշինյանի այս խոստմանը՝ պարբերաբար ջրի երես են դուրս գալիս ընտրակեղծիքների դրվագներ, որոնք պատշաճ ուշադրության չեն արժանանում պատկան մարմինների կողմից:

Դիցուք՝ Սիսիան համայնքի 34/07 ընտրատեղամասում ընտրական հանձնաժողովի ղեկավարի հստակ ուղղորդմամբ տեղի է ունենում ընտրախախտում, որի մասին դիտորդների կողմից կա հստակ արձանագրված փաստ՝ կազմվել է արձանագրություն։ Այս մասին իր ֆեյսբուքյան էջում գրել է ՀՀԿ երիտասարդական կազմակերպության նախագահ Հենրիխ Դանիելյանը: Դանիելյանը հայտնել է, որ քաղաքացիների փոխարեն կատարվում է քվեարկություն, հենց քվեախցիկում։ Նա նաեւ հայտնել է, որ Սիսիան համայնքի 34/07 ընտրատեղամասի դիմաց քաղաքացիներին ուղղորդում են ընտրել համար 6՝ ՔՊ թեկնածուին:

Երեկ «Հրապարակը» ֆիքսել է, թե ինչպես է Սիսիանում՝ ընտրատեղամասի դիմաց ՔՊ-ական թեկնածու Արմեն Հակոբջանյանին մոտենում մի քաղաքացի և նշում՝ ամեն ինչ նորմալ ա: Հակոբջանյանն էլ իր հերթին նշում է՝ շնորհակալ եմ, այնուհետև քաղաքացին մոտենում է ՔՊ-ական թեկնածուին, վերջինս իր ձեռքը մտցնում է քաղաքացու գրպանը: 

Արարատի մարզի Վեդի համայնքում ընտրությունների առաջին փուլից դժգոհ ՔՊ-ն համառորեն հասավ երկրորդ փուլին: Վեդիում նախորդ տարի անցկացված ՏԻՄ ընտրություններն անցել են կրկնաքվեարկության, առերեւույթ ընտրախախտումների մասին 10 դեպքի մասին ահազանգերով, իշխող ուժի մասնակցությամբ ծեծուջարդով: ՔՊ-ական Գարիկ Սարգսյանը Վեդիում երկրորդ փորձից հաղթել է՝ պաշտոնյա թիմակիցների աջակցությամբ:

«Իրազեկ քաղաքացիների միավորում» հասարակական կազմակերպության ծրագրերի համակարգող Դանիել Իոաննիսյանն 2021-ի դեկտեմբերին կայացած ՏԻՄ ընտրությունների ժամանակ ահազանգում էր Սյունիքի մարզի Տեղ համայնքում «Քաղաքացիական պայմանագիր» կուսակցության ներակայցուցիչների կողմից ընտրախախտումների մասին։ Իր ֆեյսբուքյան էջում նա գրել է․«Սյունիքի մարզի Տեղ համայնքում Քաղաքացիական Պայմանագիր կուսակցության ներակայցուցիչները` մեքենաներով ընտրողներին տանում ու բերում էին։ Ըստ առկա տեղեկությունների, այդ նպատակի համար ներգրավվել էին նաև վարձակալված «Նիվաներ»։ Ընտրողներին բերել-տանելու համար օգտագործվող մեքենաների համարները հանած էին։ Դիտորդների կողմից այդպիսի մի «Մազդաի» հետապնդման փորձը չստացվեց, առանց համարների մեքենան փախավ։ Բազմաթիվ տեղերում պաստառներ էին փակցրել օրենքի խախտմամբ և վարչական ռեսուրսի չարաշահմամբ։ Միաժամանակ 3 վստահված անձանցով գտնվել են ընտրական տեղամասում, երբ օրենքը, ՏԻՄ ընտրությունների համար, թույլատրում է միայն մեկը»։ 

Գյումրիում ՏԻՄ ընտրություններին ընդառաջ մի շարք ահազանգեր էին հնչել, որ այսպես կոչված՝ սոցօգնություն է բաժանվում իշխող քաղաքական ուժի կողմից: Հիշեցնենք, որ ՔՊ թեկնածուն այն ժամանակ Հովհաննես Հարությունյանն էր՝ Շիրակի մարզպետը

Նախորդ տարի մամուլը գրել էր, որ  Անի խոշորացված համայնքի կազմի մեջ մտնող Ձիթհանքով գյուղում ՔՊ-ի համար ձայներ ապահովելուն ներգրավված է եղել քրեական հեղինակություն, «Չաղ Ռուստամ» մականվամբ Ռուստամ Ստեփանյանը, ով պարբերաբար հայտնվում է սկանդալային պատմություններում: Ըստ ԶԼՄ հրապարակումների՝ նա վայելում է Ազգային ժողովի ՔՊ-ական պատգամավոր Հայկ Սարգսյանի (Շիշ բռնող) բարձր հովանանավորությունը: Վերջինս հենց Ձիթհանքով գյուղից է, և դեռևս ընտրություններից 4-5 օր առաջ է գործող իշխանությունների կողմից «գործուղվել» ծննդավայր՝ ՔՊ-ի համար ցանկալի արդյունք ապահովելու համար: Եվ հենց Ձիթհանքովում ՔՊ-ն հաղթել է: Հիշեցնենք, որ Անիում ՔՊ թեկնածուն Արման Սարիբեկյանն էր:

Երեկ «Քաղաքացու որոշում» կուսակցությունը ահազանգ էր հնչեցրել, որ ՔՊ-ական պատգամավոր Կարեն Համբարձումյանը ժամեր շարունակ չի հեռանում Սիսիանի թիվ 34/06 ընրատեղամասից, ինչն ակնհայտորեն օրենքի խախտում է:

ArmLur.am-ի թղթակիցը Սիսիանի 34/03 հանձնաժողովից երեկ հաղորդում է ներկայացրել խախտման մասին: Ավագանու ՔՊ-ական թեկնածու Հովսեփ Առաքելյանը շրջել է ընտրատեղամասի տարածքում, զրուցել տարբեր քաղաքացիների հետ: Երբ ոստիկանին հորդորել են ընտրատեղամասից հեռացնել ՔՊ-ական թեկնածուին, որը չի պահպանել օրենքով պահանջվող 50մ շառավիղ հեռավորությունը ընտրատեղամասից, ոստիկանն ասել է, որ մետր չունի, չի կարող չափել հեռավորությունը:

Վանաձորում 2021 թվականի դեկտեմբերի 5-ին ՏԻՄ նույնպես ընտրություններ էին, որոնց մասնակցում էր 10 ուժ, այդ թվում՝ «Քաղաքացիական պայմանագիրը», որի թեկնածուն մարզպետ Արամ Խաչատրյանն է։ Մարզպետը նախընտրական քարոզարշավն իրականացնում էր  մի շարք խախտումներով և վարչական չարաշահումներով։ Նախ նա քարոզարշավը սկսել էր մինչ արձակուրդ վերցնելը։ Բացի այդ՝ քարոզարշավին մասնակցում էր ծառայողական ավտոմեքենայով․ սա պնդում չէ, այլ՝ կասկած, քանի որ քարոզարշավին մասնակցում է Hundai մակնիշի ավտոմեքենայով, իսկ մարզպետի ծառայողականը հենց այդպիսի ավտոմեքենա է:

2021-ի ՏԻՄ ընտրությունների ժամանակ «Իմ քայլի» նախկին պատգամավոր,այժմ ԿԸՀ նախագահ Վահագն Հովակիմյանի եղբոր կինը խոստովանել էր, որ կնիքը տուն էր տարել։ Վերջինս, հիշեցնենք, հանձնաժողովի անդամ էր: Իհարկե, պատկան մարմինները չուսումնասիրեցին այս պատմությունը և պատժվողներ այդպես էլ չեղան:

2021-ին Մալաթիա-Սեբաստիա վարչական շրջանի արդեն նախկին ղեկավար Դավիթ Կարապետյանը, ով նաև ԱԺ «Իմ քայլը» խմբակցության պատգամավորի թեկնածու է, մտնելով թիվ 7/8 ընտրատեղամաս, ասել է. «ՔՊ»-ից ո՞վ ա ստեղ, դուխներդ տեղը, հաղթելու ենք»։

Ինչպես հասկանում ենք՝ վերը նշված պաշտոնյաների մեծ մասը մինչ այս պահն էլ ոչ միայն չեն պատժվել՝ առնվազն նրանց գործողությունների մասով որևէ ուսումնասիրություն չի իրականացվել պարզելու համար՝ այդ գործողությունները տեղավորվում էին օրենքի սահմաններում, թե ամեն դեպքում օրենքին հակասում էին: Դեռ մի բան էլ վերջիններս շարունակում են պաշտոն զբաղեցնել և նույնիսկ այդ պաշտոնի բարձրացման են գնում: Փաստացի, պոպուլիզմ էր թե՛ Նիկոլ Փաշինյանի պնդումը, որ պատժելու է ընտրակեղծիք կատարած յուրաքանչյուր քաղաքացու, թե՛ այն պնդումը, որ Հայաստանը փակել է այդ ընտրակեղծիքների ամոթալի էջը: