Ովքեր են միմյանց դեմ հանցագործության մասին հաղորդումներ ներկայացրած ՔՊ-ական պաշտոնյաները

Բավական լարված էին Սյունիքի նախկին մարզպետ Մելիքսեթ Պողոսյանի և պատգամավոր Արմեն Խաչատրյանի հարաբերությունները: Գորիսում կայացած վերջին ՏԻՄ ընտրություններում ՔՊ թեկնածուն Վլադիմիր Աբունցն էր: Նա Ագարակի մաքսատան նախկին պետն է եղել՝ 2019 թվականի մարտի 8-ից սկսած չի աշխատում, ժամանակին բավականին ջերմ հարաբերություններ է ունեցել ՀՀԿ-ականների հետ եւ ՃՈ պետի նախկին տեղակալ Արմեն Խաչատրյանի մտերիմն է, ու վերջինիս շնորհիվ է ՔՊ-ում նրա թեկնածությունը հաստատվել։ Սյունիքի արդեն նախկին մարզպետը ցանկացել է իր տեղակալ Կարո Ավանեսյանին առաջ հրել, սակայն՝ ապարդյուն։ Ներթիմային պայքարին ներգրավվել են նաեւ ընտանիքների անդամները. փոխմարզպետի կինն օրերս Արմեն Խաչատրյանին ու նրա թեկնածուին քննադատող ստատուս էր գրել, ապա ջնջել:

 

Առողջապահության նախկին նախարար, այժմ ԱԺ «Քաղաքացիական պայմանագիր» խմբակցության պատգամավոր Արսեն Թորոսյանը համավարակի տարածման ամենաթեժ փուլում այն համոզմանն էր, որ «հատկապես կառավարությունն ու առողջապահության նախարարությունը պետք է տիտանական ջանքեր գործադրեն (պարզապես այլ բանով չզբաղվեն), որ պատվաստումների հարցը լուծեն: Այս մասին Թորոսյանն ասել էր լրատվականներից մեկին տված հարցազրույցում: Դա փաստացի քննադատություն էր Ավանեսյանի հասցեին: Թորոսյանի քննադատությունը, սակայն, Ավանեսյանն այսպես էր մեկնաբանում. «Մյուս բոլոր հիվանդությունները կամ, օրինակ, կապիտալ շինարարության ծրագրերը, նույնպես ուշադրություն են պահանջում»: Ուշագրավն այն է, որ Թորոսյան-Ավանեսյան հակամարտության մեջ Թորոսյանը, կարծես թե, արդեն բաց է խաղում: Նա Ավանեսյանին քննադատում է արդեն ոչ թե միջնորդավորված, տարբեր սորոսական խողովակների միջոցով, այլ իր իսկ անունից: Սա նշանակում է, որ նախկին նախարարը գնում է վա-բանկ: Մյուս կողմից` ուշագրավ է, որ Ավանեսյանը հիշատակում է կապիտալ շինարարության ծրագրերը: Դեկտեմբերի 1-ից ՊՎԾ-ն ընդլայնել է իր ներգրավվածությունը մեծածավալ շինարարական ծրագրերի վերահսկողության գործում, իսկ ԲԿ-ների կապիտալ շինարարությունն ավելի քան մեծածավալ է: Ստուգումները կարող են տարածվել նաև նախկին ղեկավարների օրոք իրականացրած ծախսերին:

 

Իր հերթին, երբ նախարար էր Արսեն Թորոսյանը, լարված էին նրա հարաբերությունները պատգամավոր Նարեկ Զեյնալյանի հետ: Զեյնալյան-Թորոսյան հարաբերությունների լարվածությունը երևան եկավ այն պահին, երբ հարցազրույցներից մեկում Զեյնալյանը մատնանշեց՝ համավարակի թեժ պահին Թորոսյանի արձակուրդ գնալու աննպատակահարմարությունը: «Կարծում եմ, որ արձակուրդ գնալն այս փուլում այնքան էլ նպատակահարմար չէր, քանի դեռ վարակակիրների՝ 100-ից ավելի հաստատված դեպքեր կան, հատկապես, որ առաջիկայում վերսկսվելու են բուհերի, դպրոցների աշխատանքը և նախապատրաստական աշխատանքները վերահսկելու անհրաժեշտություն է լինելու»,-ասել էր Զեյնալյանը։ Մամուլը անգամ գրում էր, որ Թորոսյանը ընտրություններից առաջ ծրագիր ուներ. նա ցանկանում էր, որպեսզի առողջապահության այն ժամանակվա նախարարի ԺՊ Ավանեսյանը խորհրդարանում զբաղեցնի ԱԺ առողջապահության և հանրային հարցերի հանձնաժողովի նախագահի պաշտոնը, և այս դեպքում Թորոսյանը մեկ զարկով երկու նապաստակ կխփեր. Նարեկ Զեյնալյանին կհեռացներ ճանապարհից և իր մարդը կունենար այդ հանձնաժողովում: Թե ինչու այդ ծրագիրը ձախողվեց՝ դժվար է ասել:

 

ՔՊ-ական պատգամավոր Դավիթ Դանիելյանը ամիսներ առաջ ուշագրավ հարցազրույց է տվել լրատվամիջոցներից մեկին, որում կամա թե ակամա հանցագործության մասին հաղորդում է ներկայացրել իր քաղաքական թիմի ղեկավար, վարչապետ Նիկոլ Փաշինյանի դեմ: Սկզբում Դանիելյանը փորձում էր ապացուցել, որ այն տարածքները, որոնք մենք կորցրել ենք մեկ տարի առաջ Հայաստանում և շաբաթներ առաջ Արցախում, մենք հեշտությամբ և առանց պայքարի չենք զիջել: Իսկ ահա պատասխանելով հարցին, թե ինչպես ստացվեց, որ Հայաստանի իշխանությունները այդպես հեշտությամբ զիջեցին Սև լճի մի մասը, որոշակի տարածքներ Սյունիքից, պատգամավորը պատասխանեց՝ հաշվի առնելով աշխարհաքաղաքական իրավիճակը, Հայաստանում իրավիճակը, Հայաստանի մարտունակության աստիճանը եւ տարբեր ժամանակներում տարբեր փաստաթղթեր, այո՛, եղել են որոշակի պայմանավորվածություններ, փորձվել է Ադրբեջանի հետ գնալ այն ճանապարհով, որպեսզի կնքենք խաղաղություն։ Այս հայտարարությունը ուշագրավ է այնքանով, որ Նիկոլ Փաշինյանը մինչ օրս փորձում է բոլորին համոզել, որ նշված տարածքները ինքը չի հանձնել ո՛չ բանավոր, ո՛չ գրավոր ձևով, ավելին՝ դրանք օկուպացվել են և նա պահանջում է որպեսզի ՀՀ սուվերեն տարածքը օկուպացված ադրբեջանական զորամիավորումները դուրս գան Հայաստանից: Այժմ պարզվում է` մեր մարտունակությունը թույլ է եղել, բացի այդ եղել են որոշակի պայմանավորվածություններ, տարբեր փաստաթղթեր: Ինչի՞ մասին է խոսում պատգամավորը և արդյո՞ք սա բացահայտ հանցագործության մասին հաղորդում չէ, որով պետք է զբաղվեն իրավապահ մարմինները...

 

Վերջին ամիսներին մամուլում տեղեկություններ են տարածվում առ այն, որ ՊԵԿ նախագահ Ռուստամ Բադասյանը իր նախկին տեղակալ Շուշանիկ Ներսիսյանի գործունեության մեջ չարաշահումներ, կոռուպցիոն դրսեւորումներ է հայտնաբերել եւ դրանք ներկայացրել է Նիկոլ Փաշինյանին։ Սակայն, քանի որ Շուշանիկ Ներսիսյանը հանդիսանում է Նիկոլ Փաշինյանի ընտանիքի մտերիմը՝ վարչապետը, բնականաբար, դեմ է արտահայտվել նրա նկատմամբ որևէ գործողություն իրականացնելուն և հրահանգել է յուրայինին ձեռք չտալ: Բադասյանը, իհարկե, իր հարցազրույցներում թեև հերքել է նման տեղեկատվությունը, սակայն մյուս կողմից էլ հայտարարել, որ, բնականաբար, խնդիրները շարունակում են շատ մնալ, այո, կան նաեւ կոռուպցիոն հնարավոր դրսեւորումներ, նման տեղեկություններ եւ նման ռիսկեր անընդհատ լինում են, դրա մասին խոսում են, դրանցով զբաղվում են: Հասկանալի է, որ Բադասյանը չէր կարող բաց տեքստով ասել, որ այդ խնդիրները մաքսային ոլորտում ի հայտ են գալիս իր տեղակալի ոչ կոմպետենտության պատճառով` հաշվի առնելով նաև այն հանգամանքը, որ Ներսիսյանը գտնվում է Փաշինյանի անձնական պաշտպանության տակ: Սակայն, պարզից էլ պարզ է, որ եթե առկա են խնդիրներ, ապա այդ խնդիրների թիվ մեկ մեղավորը և թիվ մեկ պատասխանատուն՝ ոլորտը կուռացիա անողն է, այս դեպքում՝ Ներսիսյանը: Ըստ այդմ, Բադասյանի այս հայտարարությունը ընդհանրապես կարելի է դիտարկել իբրև հանցագործության մասին հաղորդում՝ իր արդեն նախկին տեղակալի դեմ, որքան էլ որ դա ուռճացված չհնչի:

 

Շիրակի նախկին ՔՊ-ական մարզպետ Նազելի Բաղդասարյանի եղբայրը՝ Գյումրիի ավագանու՝ կրկին ՔՊ-ական անդամ Արման Բաղդասարյանը վերջերս կրկին աչքի էր ընկել, մեղմ ասած, տարօրինակ վարքագծով՝ հերթական անգամ հրապարակայնորեն կոնֆլիկտի մեջ մտնելով Գյումրու քաղաքապետարանի ղեկավար կազմի հետ: Նա ոչ կոմպետենտության մեջ էր մեղադրել Գյումրիի փոխքաղաքապետ Արթուր Պապիկյանին՝ պնդելով, որ ավագանին իրեն դատարանի ու դատախազի ֆունկցիաներ է վերապահում։ Այս կոնֆլիկտը սկսվել էր այն բանից հետո, երբ ՔՊ ներսում երկար քննարկումներից հետո որոշվել էր փոխքաղաքապետ կարգել ոչ թե Բաղդասարյանին, այլ Պապիկյանին։