Սյունեցու քվեով ԱԺ-ում հայտնված ՔՊ-ական պատգամավորները պարապուրդի՞ են մատնված

Երեկ Սյունիքի Տեղ գյուղի ուղղությամբ ադրբեջանցիների կազմակերպած հերթական դիվերսիայից հետո՝ Սյունիքից ընտրված և ծնունդով սյունեցի ՔՊ-ական պատգամավորները, մեկը մյուսին հերթ չտալով, պաթոսախառն գրառումներ են անում և հարցազրույցներ շռայլում` փորձելով հանրության գլխի տակ փափուկ բարձ դնել: Մինչդեռ ակնկալվում էր, որ սյունեցիների քվեի օգնությամբ մանդատ ստացած պաշտոնյաները այս իրավիճակում պետք է լինեին իրենց ձայն տված սյունեցիների կողքին, կամ առնվազն անվտանգային հարցերի վերաբերյալ ԱԺ-ում քննարկումներ նախաձեռնեին: Սակայն, ինչպես երևում է՝ ընտրվելուց հետո վերջիններս մոռացել են Սյունիքի տեղը:

Դիցուք՝ ՔՊ-ական պատգամավոր Արմեն Խաչատրյանը լրագրողների հարցին, թե տարածք է Հայաստանը կորցրել, պատասխանեց. «Տեղեկություններ ունեմ մոտավոր, որքանով ես դիտարկել եմ, գուցե 100 հեկտար կամ ավելի քիչ»: Պատասխանելով հարցին, թե ինչու Տեղ գյուղի սահմանային հատվածում սահմանապահներ չեն տեղակայվում, այլ կանոնավոր զորքն է տարածքը պաշտպանում` Խաչատրյանը հայտնեց, որ սահմանապահ զորքերը նման հնարավորություններ և ռեսուրսներ չունեն լայնածավալ հարձակմանը դիմակայելու համար։ Խաչատրյանը մի քանի օր առաջ էր Տեղում, սակայն, ինչպես մամուլն էր գրել՝ համայնքապետարանում համայնքի ղեկավարի հետ ֆուրշետի էր մասնակցում:

Իր ֆեյսբուքյան էջում գրառում է արել նաև պատգամավոր Դավիթ Դանիելյանը` նշելով, որ գտնվում է դիրքերում, իսկ երեկ շփվել է նաև բնակիչների, երիտասարդների հետ: Եթե դա իսկապես այդպես է, ապա ինչ խոսք՝ գովելի է: Սակայն, սահմանին կամ առնվազն գյուղում գտնվելու որևէ վիզուալ ապացույց Դանիելյանը չի ներկայացրել:

Պատգամավոր Նարեկ Ղահրամանյանը ընդհանրապես լծվել է ադրբեջանցիների գործողությունները լեգիտիմացնելուն, հակառակ դեպքում` որևէ կերպ հասկանալի չեն վերջինիս ձևակերպումները: Հարցին, թե՝ ինչու չի կրակել հայկական կողմը պիկապով մոտեցող ադրբեջանցիների ուղղությամբ, ՔՊ-ական պատգամավորն ասում է․ «էնպես չէ, որ պիկապը կրակելով է մոտեցել․ էդ պահին եղել է սադրանք, եղել է հրաձգություն, որը վերածվել է մեծ մարտի։ Մենք պետք է անենք մեր անելիքները, որ հասնենք խաղաղության»։

Ղահրամանյանը, անշուշտ, շատ ավելի կարևոր անելիքներ ունի Երևանում՝ ԱԺ-ում և դա է թերևս պատճառը, որ նախընտրում է սահմանին տեղի ունեցող իրադարձություններին գնահատականներ հնչեցնել ԱԺ միջանցքից, այլ ոչ թե Սյունիքում: Մինչդեռ կուսակցական ակտիվի հետ քննարկումներ անցկացնելու և ՏԻՄ ընտրություններին նախապատրաստվելու նպատակով Ղահրամանյանը և թիմակիցները լույսի արագությամբ էին հասնում Սյունիք:

Բացի այդ, վերջինս համոզված է, որ իրենք կաբինետներում նստած երաշխավորել են սյունեցու անվտանգությունը:

Մեկ տարի առաջ, երբ հայտնի դարձավ, որ փակվել է Շուռնուխով անցնող և դեպի Կապան տանող ճանապարհը, մամուլը գրեց նաև, որ դրան գումարվել է Քարահունջից իջնող ճանապարհը: Չնայած ստեղծված իրավիճակին՝ ՔՊ-ի սյունեցի պատգամավորները որևէ խնդիր դրանում չեն տեսնում: 

Արմեն Խաչատրյանը նույնիսկ հարկ չի համարել անդրադառնալ հարազատ մարզում տեղի ունեցող սադրիչ գործողություններին, իսկ ինչպես ասում են՝ լռությունը համաձայնության նշան է: Սյունեցի մյուս պատգամավորը՝ Նարեկ Ղահրամանյանն էլ փափուկ բարձ է դնում սյունեցիների գլխի տակ` հայտարարելով, որ ոչ մի սարսափելի բան տեղի չի ունեցել: Միևնույն ժամանակ, ինքն իրեն հակասելով` պատգամավորը նշում է,  որ եթե այս սահմաններն անցնեն խորհրդային քարտեզների համաձայն, ապա Գորիս-Կապան ճանապարհի որոշ հատվածներ կանցնեն Ադրբեջանին: Այսինքն այն, որ միջպետական ճանապարհի որոշ հատվածներ կանցնեն թշնամուն, դրա մեջ ՔՊ-ական պատգամավորը որևէ լուրջ խնդիր կամ մարտահրավեր չի տեսնում: Փոխարենը` նա սյունեցիներին առաջարկում է մտածել այլընտրանքային ճանապարհների մասին` չբացատրելով, թե ինչու սյունեցին պետք է իր հողի վրա այլընտրանքային ճանապարհ կառուցի՝ սեփական հայրենիքում տեղաշարժվելու նպատակով:

Այս թեմայով Սյունիքի մարզի բարձրադիր գոտիներում մառախուղ է Ալեն Սիմոնյանը «ՔՊ»-ականներին Սյունիք է գործուղում Կապանում վերաբացվեց «Սյունիք» կինոթատրոնը Կայացավ «Սեր Սյունիք» բերքի փառատոնը, յուրովի ներկայացվեց Հայաստանի հարավային զարկերակը՝ Մեղրին Սյունիք-սահմանամերձ. լուսանկարներ