ՔՊ-ական որ պաշտոնյաներն են լրջագույն վնաս հասցրել ՀՀ միջազգային վարկանիշին

Մի քանի օր շարունակ ՀՀ իշխանությունները՝ ի դեմս տարբեր կալիբրի պաշտոնյաների, փորձում են հիմնավորել, որ ծանրամարտի ԵԱ բացման արարողության ժամանակ Ադրբեջանի դրոշը այրումը հսկայական վնաս է հասցրել Հայաստանի միջազգային վարկանիշին: Մի կողմ դնենք այն հարցը՝ արդյոք դա այդպես է, թե ոչ: Պետք է փաստել, որ այս դեպքում գործ ունենք գերանը սեփական աչքի մեջ չտեսնող պաշտոնյաների հետ, քանի որ այնքան վնաս ՀՀ միջազգային վարկանիշին, որքան այդ պաշտոնյաներն են հասցրել, անգամ դժվար է պատկերացնել:

Հայաստանի հպարտ քաղաքացիների հիշողության մեջ դեռ վառ է, որ նախորդ տարի Աբու Դաբիում ընթացող IDEX-2021 միջազգային ռազմարդյունաբերական ցուցահանդեսին Հայաստանը մասնակցում էր դատարկ տաղավարներով՝ միայն բուկլետ բաժանելով։ Նման «շքեղ» պրեզենտացիայի պատասխանատում Բարձր Տեխնոլոգիական արդյունաբերության նախարարությունն էր` ի դեմս այն ժամանակվա նախարար Հակոբ Արշակյանի։ Նախարարը հայկական տաղավարի աչք ծակող դատարկությունը բացատրեց լոգիստիկ խնդիրներով. հաշվարկներն այնպես էին արել, որ ցուցահանդեսի բացմանը տեսականին տեղում լիներ, սակայն, արի ու տես, պարզվեց` անգամ հաշվարկ անելը նախարարի համար չափից դուրս բարդ առաջադրանք էր։

Այս դեպքից հետո ամիսներ անց էկոնոմիկայի նախարար նշանակված Վահան Քերոբյանը սրտնեղել էր, որ Հակոբ Արշակյանին չի հաջողվել ավելին քամել վերը նշված ցուցահանդեսից և մեր տնտեսությունը առանձնապես ոչինչ չի շահել։ Քերոբյանին այս տարի շանս ընձեռվեց ուղղել Արշակյանի շահերը` Դուբայ 2020 էքսպոյում ՀՀ պատվիրակության ղեկավարը հենց էկոնոմիկայի նախարարն էր։ Հաշվի առնելով Վահան Քերոբյանի կատակասիրությունը` կարելի է հասկանալ, թե ինչու են այս տարի հայկական ազգային արժեքները ներկայացնող ստենդում տեղ գտել «американские горки»-ն։ Ըստ ՔՊ-ական պաշտոնյայի` մենք ազգովի պետք է հպարտանանք հենց դրանով։ 

Մամուլը գրել էր, որ նախորդ տարվա ապրիլի 25-ին ՀՀ ԱԺ իշխանական խմբակցության մի խումբ պատգամավորներ գործուղվել են Ժնև, սակայն ժամանակին տեղ չեն հասել: Աղբյուրները պատմում են, որ ՔՊ խմբակցության մի քանի անդամներ Վիեննայի օդանավակայանում սրճարան են նստել, գինովցել են ու մոռացել, որ պետք է Ժնև մեկնեն: Նրանք երկար դեգերումներից հետո մի կերպ կարողացել են Ժնև մեկնող հաջորդ օդանավին հասնել և ուշացած միացել են պատվիրակությանը: Պատգամավորների անունները նույնպես շրջանառվում էին՝ Արփի Դավոյան, Վահագն Հովակիմյան, Վահագն Ալեքսանյան, Արթուր Հովհաննիսյան: Վերջիններս կամ հրաժարվել են պատասխանել՝ համապատասխանում է այդ լուրը իրականությանը, թե ոչ, կամ ասել են, որ անլուրջ հարցերի չեն պատասխանում: Թե որքանով է սա հերքում՝ դատեք ինքներդ:

Սփյուռքի գործերով գլխավոր հանձնակատար Զարեհ Սինանյանի պատմության իմացությունը քիչ էր մնում միջազգային սկանդալի հանգեցներ, քանի որ վերջինս ոչ ավել, ոչ պակաս ճապոնացիներին անվանել էր չինացիների և կորեացիների սինթեզ:

ՔՊ-ական պատգմավոր Վիգեն Խաչատրյանը շաբաթներ առաջ ԱԺ ամբիոնից համոզմունք հայտնեց, որ Լաչինի միջանցքի փակումը պատասխան է Հայաստանի այն դիրքորոշմանը, որ իբրև թե Արցախի հարցում կիսում են Ռուսաստանի տեսակետը:

Սակայն, միջազգային գործընկերների և այդ մասնավորապես՝ դաշնակիցների հետ թարսվելու առաջամարտիկը շարունակում է մնալ վարչապետ Փաշինյանը: Ամիսներ առաջ նա կառավարության նիստում մեղադրել էր ռուս խաղաղապահներին, թե պատերազմից հետո նրանց ներկայությամբ ու թողտվությամբ են տեղի ունեցել Արցախում մի շարք միջադեպեր, Խծաբերդ և Հին Թաղեր գյուղերի գրավումը, հայ զինծառայողների գերեվարումը, հրադադարի խախտումները։ Նշենք, որ ռուսական կողմի արձագանքը չուշացավ: Մոսկվայից հայտնեցին՝ Մոսկվան դեռ չի տեսել Լեռնային Ղարաբաղում ռուսական խաղաղապահ առաքելության մանրամասները հստակեցնելուն առնչվող Հայաստանի վարչապետի առաջարկները: Մինչ այդ էլ Նիկոլ Փաշինյանի ընտանեկան թերթը հանդես էր եկել հակառուսական սլիվներով` ռուսական կողմին մեղադրելով խաղաղության պայմանագրի և այսպես կոչված` Զանգեզուրի միջանցքի գլխավոր շահառու լինելու մեջ:

2023 թվականի փետրվարի 28-ից Հայաստանում իր առաքելությունը պաշտոնապես մեկնարկած Վրաստանի նորանշանակ դեսպան Գիորգի Շարվաշիձեին, քաղաքավարական հանդիպումների շրջանակներում, կառավարությունում ընդունելության է արժանացրել ոչ թե ՀՀ վարչապետ Նիկոլ Փաշինյանը, անգամ ոչ փոխվարչապետներից որևէ մեկը, այլ վարչապետի աշխատակազմի ղեկավար Արայիկ Հարությունյանը։ Դիվանագիտական արարողակարգի լեզվով սա անհարգալից վերաբերմունքի նշան է:

ՔՊ-ական պատգամավոր Գագիկ Մելքոյանը ընդամենը շաբաթներ առաջ հայտարարում էր, որ Հայաստանում կարող են Հռոմի ստատուտի համաձայն կալանավորել ՌԴ նախագահ Վլադիմիր Պուտինին, եթե վերջինս ժամանի մեր երկիր: Այս հայտարարությունը ոչ միանշանակ ընդունվեց ռուսական կողմից և նույնիսկ ԱԳՆ մակարդակով հայկական գործընկերներից պարզաբանումներ պահանջվեցին:

Amnesty International միջազգային իրավապաշտպան կազմակերպությունը հրապարակել է «Աշխարհում մարդու իրավունքների վիճակի վերաբերյալ» 2022-2023 թվականների զեկույցը, որում ներկայացվել է 156 երկրների վերաբերյալ ուսումնասիրությունների արդյունքները։ Զեկույցում նշվում է, որ խոսքի ազատությունը ևս շարունակել է անհիմն սահմանափակված լինել։ Քրեական հետապնդումները՝ կապված իշխանություններին ուղղված քննադատության օրինական արտահայտման հետ, բացասական ազդեցություն են ունեցել խոսքի ազատության վրա։ 

Այսինքն՝ մի կողմից Նիկոլ Փաշինյանը հայտարարում է, որ Հայաստանը վեր է ածվել ժողովրդավարության բաստիոնի, մյուս կողմից նրա իսկ մի շարք թիմակիցների պատճառով կառավարությունը հերթական ապտակն է ստանում արևմտյան հեղինակավոր կազմակերպության կողմից: Իսկ ովքե՞ր են նպաստել այս գնահատականի ձևավորմանը:  Դիցուք՝ Ընդերքի մասին օրենքի փոփոխությանը իր դրական եզրակացությունն էր տվել ԱԺ Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի նախագահ Վահե Ղալումյանը, իսկ հիմնական զեկուցողը՝ Հիմնական զեկուցող` ՀՀ տարածքային կառավարման եւ ենթակառուցվածքների նախարարի տեղակալ Հովհաննես Հարությունյանն էր: 

Ահա այս բոլոր դրվագներն են որ լրջագույն հարված են հասցրել ՀՀ միջազգային վարկանիշին, սակայն այս դրվագները ՔՊ-ական պաշտոնյաները նախընտրում են չնկատել...