Կոռուպցիայի դեմ պայքարող պաշտոնյաները խթանո՞ւմ են կոռուպցիոն ռիսկերի ավելացումը

Նոր Հայաստանում ստեղծվել է մի իրավիճակ, երբ կոռուպցիայի դեմ պայքարելու կոչված պետական պաշտոնյաներն իրենք են նպաստում կոռուպցիոն ռիսկերի ավելացմանը:

Դիցուք՝ Սասուն Խաչատրայնի ղեկավարած Հակակոռուպցիոն կոմիտեն նախորդ տարի աչքի ընկավ, թերևս, միայն նրանով, որ ժամկետից շուտ սպառել էր իրեն հատկացված գումարն ու կառավարությունից կրկին գումար ուզել՝ մինչև տարեվերջ Հայաստանի Հանրապետության հակակոռուպցիոն կոմիտեի բնականոն գործունեության իրականացման հանգամանքով։ Նշենք, որ Ազգային ժողովի կողմից ընդունված «Հայաստանի Հանրապետության 2022 թվականի պետական բյուջեի մասին» օրենքի 6-րդ հավելվածով, 2022 թվականի ժամանակահատվածում առաջնահերթությունների կարգով, կոռուպցիոն հանցագործությունների բացահայտման և քննության համար նախատեսվել էր 1 մլրդ 269 մլն 400 հզր դրամ: Կոռուպցիայի դեմ պայքերելու նպատակով ստեղծված կոմիտեն նախորդ տարի 189 մլն 300 հզր դրամ (մոտ 455 հզր դոլար) է հատկացրել ավտոպարկի թարմացման համար: Սա միակ տարակուսելի ծախսը չէ:  Հակակոռուպցիոն կոմիտեն մարտի 21-ին պայմանագիր է կնքել «Տիգման Գրուպ» ՍՊ ընկերության հետ, ըստ որի` երկու անօդաչու թռչող սարք՝ դրոն, է ձեռք բերել։ Դրոններից յուրաքանչյուրի արժեքը 1․900․000 դրամ է եղել, ընդհանուր՝ 3․800․000 դրամ։ 790,000 դրամով ձեռք են բերվել հովացման համակարգերի սպասարկման ծառայություններ, այն էլ մեկ անձից գնման ընթացակարգով: Սա էլ դեռ բավարար չէր,  Հակակոռուպցիոն կոմիտեի նախագահ Սասուն Խաչատրյանը, «Ինֆոքոմ» կայքի հետաքննության համաձայն, 2021-ի փետրվարին ընդարձակ բնակարան է ձեռք բերել Երևանի կենտրոնում կառուցվող «Բյուրեղ» բնակելի թաղամասում՝ իր հարևանների համեմատ զգալիորեն ավելի ցածր գնով։ Հետաքննության հեղինակ Մկրտիչ Կարապետյանն ավելի վաղ «Ազատության» հետ զրույցում ասել էր, որ այս գործարքում առնվազն կոռուպցիոն ռիսկ կա. - «Առնվազն ռիսկ, որ պետք է ստուգվի իրավապահ մարմինների կողմից, մասնավորապես՝ Կոռուպցիայի կանխարգելման հանձնաժողովի կողմից, Դատախազության կողմից»:

ՊՎԾ ղեկավար Ռոմանոս Պետրոսյանը, ով նույնպես կոչված է կոռուպցիայի դեմ պայքարելու, ևս հայտնվել է տարբեր պիկանտ պատմությունների կիզակետում: Դիցուք, ամիսներ առաջ հայտնի դարձավ, որ Սևանի ափամերձ տարածքների մաքրման աշխատանքները, որոնք, հիշեցնենք, մրցույթով են կազմակերպվելու, չի բացառվում՝ իշխանությունները շնորհեն իրենց սրտի օլիգարխ Նարեկ Նալբանդյանի ՍՊԸ-ին։ Այդպիսի սցենարի հավանականությունը չի հերքել Սևան ազգային պարկի տնօրենը, ում, հիշեցնենք, այդ պաշտոնին են նշանակել ՊՎԾ պետ Ռոմանոս Պետրոսյանի ջանքերի շնորհիվ։ Ուշագրավ է, որ ըստ մամուլի բազմաթիվ հրապարակումների` Պետրոսյանը մտերիմ է նաև Նարեկ Նալբանդյանի հետ։ Եվ այս տեսանկյունից` Սևանի ափամերձ տարածքներում մաքրման աշխատանքները նրան հանձնելը, ինչը, անշուշտ, յուղոտ պատառ է, նույնպես պատահական չէ և պարզ զուգադիպությունների շարքից չէ։

Մեկ տարի առաջ Հաշվեքննիչ պալատի նախագահի պաշտոնը ստանձնած Ատոմ Ջանջուղազյանը ևս բավական ուշագրավ իրավիճակում է: Բանն այն է, որ մինչ օրս հայտնի չէ, թե Հայաստան հիմնադրամի կողմից կառավարությանը հատկացրած միլիոնները ի վերջո ինչպես են ծախսվել: 100 մլն դոլարի շուրջ քննություն իրականացրեց Հաշվեքննիչ պալատը, սակայն արդյունքները հրապարակված չեն։ Կան կարծիքներ, որ հիմնադրամին դրանք չեն տրվել՝ պատճառաբանելով, որ հաշվեքննության եզրակացությունների մեջ կան «գաղտնի բաներ»։ Իսկ այժմ ամենաուշագրավը՝ Հաշվեքննիչ պալատի ղեկավարը այսօր Ատոմ Ջանջուղազյանն է, այն պաշտոնյան, ով գլխավորում էր ֆինանսերի նախարարությունը և փաստացի հենց նրա ղեկավարած կառույցին են փոխանցվել հիմնադրամին հանգանակած գումարները:

Կոռուպցիայի կանխարգելման հանձնաժողովի նախագահ  Հայկուհի Հարությունյանը ընդհանրապես բավական ուշագրավ հայտարարագիր է ներկայացրել: Նա հայտարարագրել է բնակարան, 42,955,000.00 դրամի ստացված և հանձնված փոխառություն, բանկային ավանդները կազմել են 30,772,547.00 դրամ, բանկային հաշիվների մնացորդը 1,693,114.00 դրամ: Հաշվետու տարվա եկամուտները կազմել են 45,934,464.00 դրամ:

Այսինքն՝ ստացվում  է, որ առանցքային պաշտոնյաները որոնք պետք է պայքարեն պետական կառավարման համակարգում կոռուպցիոն դրսևորումների դեմ՝ իրենք են այս կամ այն չափով, կամա թե ակամա, նպաստում այդ կոռուպցիոն ռիսկերի առաջացմանը և այդ ռիսկերը որևէ կերպ չեն ուսումնասիրվում պատկան կառույցների կողմից, ինչն էլ իր հերթին հանրության մոտ բազմաթիվ հարցեր է առաջացնում՝ կոռուպցիայի դեմ պայքարի արդյունավետության մասով...